Departamenti për Punë të Brendshme Kërçovë ka ngritur kallëzim penal kundër F.D.(51) nga Kërçova për ekzistimin e dyshimit se ka kryer veprën penale “keqpërdorim të pozitës dhe autorizimit zyrtar” në bazë të nenit 353 të Kodit Penal, transmeton TV21.
“Gjatë periudhës prej vitit 2017 deri në vitin 2024, ai në rolin e kryetarit të Komunës së Kërçovës, kundërligjshëm ka arritur disa marrëveshje për kryerjen e shërbimeve noteriale me avokatë nga Kërçova, edhe pse në kuadër të Komunës ekziston Sektori për punë juridike me gjithsej 37 të punësuar, të cilët kanë të drejtë ta përfaqësojnë Komunën para Gjykatave në shtet. Në këtë mënyrë, i denoncuari e ka shfrytëzuar autorizimin e tij zyrtar, ka vepruar kundërligjshëm me dispozitat e Ligjit për parandalim të korrupsionit dhe konfliktit të interesit, të Ligjit për vetëqeverisje lokale, të Ligjit për furnizime publike, i ka shkelur dispozitat nga Ligji për procedurë monetare, Rregulloren për sistematizim të vendeve të punës, me çka avokatëve iu ka mundësuar, në dëm të Buxhetit të Komunës së Kërçovës, të arrijnë pasuri të kundërligjshme prej 3.938.420 milionë denarë apo rreth 64.000 euro”, qëndron në njoftim.