Rektori i Universitetit të Evropës Juglindore, Prof. Dr. Sadudin Ibrahimi, i shoqëruar nga Prorektori për Planifikim, Hulumtim dhe Ndërmarrësi, Prof. Dr. Veland Ramadani dhe Këshilltarja për Komunitetin dhe Marrëdhënie Ndërkombëtare, Prof. Dr. Besa Arifi priti në takim delegacionin e Universitetit “Nexhmedin Erbakan” nga Konia e Turqisë.
Delegacioni përbëhej nga Rektori, Prof. Dr. Xhem Zorlu dhe Prof. Dr. Firat Yaldiz, Koordinator i Përgjithshëm për Çështje Ndërkombëtare, ndërsa vizita u shoqërua edhe nga Drejtori i Shkollave Ndërkombëtare Maarif në Maqedoninë e Veriut, z. Osman Demirgül.
Gjatë takimit u bisedua për mundësitë e bashkëpunimit në fusha të ndryshme akademike, me theks në shkëmbimin e studentëve dhe stafit akademik, projekte të përbashkëta dhe ndërkombëtarizimin e arsimit të lartë.
Takimi u vlerësua si një hap i rëndësishëm drejt ndërtimit të një bashkëpunimi afatgjatë dhe të qëndrueshëm mes dy institucioneve akademike, në dobi të studentëve, stafit akademik dhe zhvillimit të arsimit të lartë në përgjithësi.
