Federata e Paqes Universale Shqipëri u bë pjesë e veprimtarisë përmbyllëse të Projektitit INNOV8PEACE, i zbatuar nga IAYSP Europe and the Middle East (EUME) në bashkëpunim me Universitetin e Tetovës dhe i bashkëfinancuar nga Bashkimi Evropian. Konferenca “From Youth Initiatives to Sustainable Peace” u mbajt në Universitetin e Tetovës, duke bërë bashkë rreth 150 profesorë, akademikë, studentë dhe aktivistë të paqes.
Veprimtaria u hap me fjalët përshëndetëse të Prof. Dr. Jusuf Zejneli, Rektor i Universitetit të Tetovës, e ndjekur nga znj. Olga Borodankova, Menaxhere e Sektorit për Arsim dhe Rini në Delegacionin e Bashkimit Evropian në Maqedoninë e Veriut. Fjalët hapëse u mbajtën nga z. Jacques Marion, President i Federatës së Paqes Universale për Evropën dhe Lindjen e Mesme, si dhe znj. Ejona Icka, Drejtore Ekzekutive e IAYSP për Ballkanin.
Sesioni i parë, i moderuar me mjeshtëri nga Prof. Afet Mamuti, vijoi me një panel diskutimi me pjesëmarrjen e znj. Klajda Gjosha, ish-Ministre e Integrimit Evropian të Shqipërisë; z. Fatmir Xheladini, profesor në Fakultetin Juridik të Universitetit të Tetovës dhe ish-Ambasador i Maqedonisë së Veriut në Kinë dhe Poloni; z. Gani Rroshi, Drejtor Ekzekutiv i Federatës së Paqes Universale për Ballkanin; dhe z. Qebir Avziu, profesor në Fakultetin Juridik të Universitetit të Tetovës. Reflektimet e tyre theksuan rolin jetik të të rinjve në një kohë kur paqja mbetet e brishtë.
Një moment veçanërisht domethënës i konferencës ishte vlerësimi me titullin “Ambasador për Paqe” i katër personaliteteve me kontribute të vecanta në Maqedoninë e Veriut. Në fjalën e tij përshëndetëse me këtë rast, Kryetari i Federatës së Paqes Universale Shqipëri, z. Defrim Methasani, theksoi domethënien dhe peshën e këtij titulli dhe pse figurat e përzgjedhura e meritojnë plotësisht. Personalitetet që u nderuan ishin: Z. Arif Ziberi – solisti i shquar i grupit ELITA 5; Dr. Ilir Demiri – Deputet i Kuvendit të Maqedonisë së Veriut dhe mjek I nderuar; znj. Rina Ajdari – Deputete e Kuvendit të Maqedonisë së Veriut; Prof. Drenusha Palloshi – profesoreshë e arteve dhe piktore e mjirënjohur.
Sesioni i Dytë i konferencës iu dedikua iniciativave të udhëhequra nga të rinjtë, të zhvilluara në kuadër të trajnimit INNOV8PEACE. Gjatë këtij sesioni, pjesëmarrësit u njohën me IAYSP Europe and the Middle East dhe Projektin INNOV8PEACE, pasuar nga prezantimi i iniciativave të rëndësishme të studentëve, si “Deprivation as an Invisible Wound” nga znj. Hafsa Ibishi, “Education on Anti-Corruption” nga z. Mumin Osmani dhe “Education of Children with Special Needs in Their Mother Tongue” nga znj. Elmira Amiti.