Kryetari i Federatës së Kik Boksit të Kosovës, Fatmir Makolli, nderohet me Medaljen Presidenciale të Meritave për kontributin në sport. Gjatë një prononcimi për Tv Koha, Makolli ka folur edhe për sfidat me të cilat përballet sporti i Kikboksit.
Fatmir Makolli është nderuar me Medaljen Presidenciale të Meritave nga Presidentja e Kosovës, Vjosa Osmani, për kontributin e tij të jashtëzakonshëm në sportin e Republikës së Kosovës, veçanërisht në kick-box.
‘’Për mua kjo mirënjohje ka qenë një nderë i madh që më është bë dhe punës time dhe rrugës time. Rrugëtimin tim që e kam bë në sport kjo në fund u kurorëzua me këtë medalje dhe besoj që unë kam qenë shumë i nderuam dhe jam i priveligjuar që kam arrit ta kem këtë medalje prej presidentes. Gjithashtu kisha falënderua shumë presidenten për këtë çmim që ma ka nda dhe besoj që kjo tregon që unë 50 vite merrem me sport dhe ia kam kushtua sportit . Besoj që kjo u kurorëza në fund me këtë mirënjohje’ ’ deklaroi Fatmir Makolli
Duke marrë parasysh se sportet luftarake paraqesin sinonim të suksesit sportiv, sipas Makollit sfida kryesore mbetet që Kosova sa më denjësisht të prezantohet në arenën ndërkombëtare.
‘’Me të thënë të drejtën, tani ne nuk kemi shumë sfida, se dihet neve na përkrah gjithmonë ministria e sportit, shteti, e kemi përkrahjen dhe besoj se në arenën ndërkombëtare ku e përfaqësojmë vendin tonë, flamurin tonë dhe shtetin tonë, besoj se ka vend edhe me i pas kushtet edhe më të mira. Besoj që në të ardhmen do t`i kenë sportistët tonë dhe do të na përfaqësojnë sa ma denjësisht në arenën ndërkombëtare’’ tha Fatmir Makolli
Fatmir Makolli, ndër vite, ka dhënë një kontribut të jashtëzakonshëm në sportin e Republikës së Kosovës, fillimisht si garues, veçanërisht gjatë periudhës së gjeneratës së sakrificës në vitet ’90.
Pas luftës, ai vazhdoi angazhimin e tij në sport si kryetar i Federatës së Kick-Box-it të Kosovës, detyrë të cilën e ushtron edhe sot.
