Rikthimi i temperaturave të larta përvëluese ka bërë që mjekët të vazhdojnë me apelet për kujdes të shtuar, veçanërisht për grupet më të rrezikuara.
Mjeku Harkan Memedi, në një prononcim për TV Koha, ka theksuar se temperaturat e larta mund të shkaktojnë pasoja serioze për shëndetin.
Ai u bën thirrje qytetarëve të shmangin ekspozimin në diell gjatë orëve më të nxehta të ditës, të konsumojnë sa më shumë lëngje dhe të respektojnë rekomandimet e mjekëve.
Sipas Memedit, kujdes i shtuar duhet të kenë edhe të rinjtë. Ai paralajmëron se konsumimi i tepërt i pijeve energjetike, veçanërisht gjatë ditëve me temperatura ekstreme, mund të ketë pasoja negative për organizmin, duke rritur rrezikun e dehidratimit dhe problemeve kardiovaskulare.
Ndryshe, sipas parashikimeve meteorologjike, vala e të nxehtit pritet të vazhdojë edhe gjatë ditëve në vijim, me temperatura që në disa zona do të tejkalojnë 40 gradë Celsius.
Autoritetet shëndetësore u bëjnë thirrje qytetarëve të respektojnë masat mbrojtëse dhe rekomandimet e mjekëve për të shmangur pasojat që mund të shkaktojë moti ekstrem./Tv Koha – Shkup/