Me ndeshjen Shkëndija e Haraçinës – Skopje u kompletua java e shtatë e cila solli një fitore për ekipin vendas dhe katër barazime me gjithësejt 19 gola të shënuar. Me tre pikët e djeshme Shkëndija e Haraçinës ngjite në vendin e tretë me 13 pikë.
Me fitoren 1-0 kundër Skopjes në ndeshjen e fundit të javës së shtatë në Ligën e parë të futbollit vendor Shkëndija e Haraçinës tani me 13 pikë është ngjitur në pozitën e tretë në tabelën e klasifikimit pas Shkëndijës së Tetovës me 16 pikë dhe Struga Trim Lum me 14.
Shkëndija e Haraçinës dje shënoi një fitore të vështirë por me peshë të madhe kundër Skopjes , ku autor i golit të vetëm ishte Dashmir Elezi i cili në minutën e 87 të lojës shënoi për fitoren e vendasve.
Fitorja solli shumë gëzim tek tifozët vendas të cilët me siguri do të jenë në numër shumë më të madh në ndeshjen e xhiros së tetë kundër Vardarit .
Pas ndeshjes ndihmës trajneri Burim Sadiki tha se pas dy fitoreve radhazi në transfertë ishte radha të shënojnë fitore edhe stadiumin e Çairit para tifozëve vendas.
“Pas dy fitoreve radhazi në terren mysafirë ishte koha që ta shijojmë fitoren e parë si vendas. Ndeshja ishte e vështirë e kishim parasysh këtë aspekt pasi që gjithë javës kemi përgatit ekipin që do të jetë vështirë do të jetë ndeshja rëndë ku ne do ta dominojmë topin. Ashtu ishte edhe gjatë gjithë ndeshjes , në pjesën e parë patëm disa vështërsi të cilat në pjesën e dytë i mënjanuam. Pjesa e dytë ishte thuajse perfekt , dominim total arritëm të bëjmë disa aksione të bukura dhe çka ishte më e bukura goli erdhi fare në fund. Një gëzim për ne. Vazhdojmë këtë rrugëtim prej tre fitoreve tash na pret një periudhë më të qetë” deklaroi ndihmës trajneri Burim Sadiki
Për Haraçinasit ishte kjo fitorja e katër sezonale në 7-të xhirot e zhvilluara ku kanë edhe një barazim dhe dy disfata. Në xhiron e tetë Shkëndija e Haraçinës është mysafire e Vardarit.
Në xhiron e tetë takohen: Shkëndija – Bashkimi, Sileksi – Tikveshi, Bregallnica – Skopje, Vardari – Shkëndija e Haraçinës dhe Struga Trim Lum – Arsimi.
