Komuna e Tetovës ka miratuar Programin e aktiviteteve nga fusha e mbrojtjes së mjedisit jetësor dhe natyrës për vitin 2026. Programi është miratuar nga Këshilli i Komunës më 30 dhjetor 2025 dhe është publikuar në “Fletoren Zyrtare të Komunës së Tetovës” nr.24 më 31 dhjetor 2025.
Në kuadër të projektit “Monitorimi i masave dhe premtimeve zgjedhore në Tetovë dhe Tearcë”, ku IFES me Programin e tij për përkrahje elektorale, organizon monitorimin e Komunave, Shoqata “Për Tetovën” ka monitoruar dy Komuna; Tetovën dhe Tearcën.
Nga kjo Shoqatë thonë se Transparenca e Komunës së Tetovës lë shumë për të dëshiruar.
FLORENT BAJRAMI – Shoqata “Për Tetovën”
Për Komunën e Tetovës i kemi monitoruar masat e subvencionimit të inverterëve dhe bicikletave, masa të cilat janë në Programin e Mjedisit Jetësor të Komunës për vitin 2026, por nuk janë transferuar në mënyrë më të dukshme te Buxheti ku ka një subvencionim prej 1.5 milion denarë për efikasitet energjetik, mirëpo nuk janë të përmendura në mënyrë eksplicite masat për inverterë. Kështu që edhe pse kemi kërkuar dy herë përgjigje për informata me karakter publik, nga Komuna e Tetovës kemi marrë përgjigje se për këtë vit nuk janë paraparë subvencionime, por në mënyrë të përgjithshme, gjithsesi presim të kemi informata më të sakta dhe më të detajuara lidhur me këtë planifikim.
Me rebalancin e Buxhetit të Komunës, ka tendencë të rritet kjo linjë buxhetore për subvencionimin e efikasitetit energjetik, prej 1.5 në 2 milion denarë, mirëpo Shoqata “Për Tetovën” ende nuk i ka informatat e sakta se për cilën pjesë do të subvencionohen këto mjete.
Një prej masave më konkrete është subvencionimi i qytetarëve për blerjen e klimave inverter. Komuna ka paraparë 6.5 milionë denarë për këtë masë. Programi parashikon publikimin e thirrjes, aplikimin e qytetarëve, kontrollin e dokumentacionit, kontrollin në terren dhe më pas pagesën e subvencioneve.
FLORENT BAJRAMI – Shoqata “Për Tetovën”
Në Programin për vitin 2026 janë paraparë 6.5 milion denarë për inverterë dhe 1.25 milion den për biçikleta, por fatkeqësisht në Buxhet këto mjete nuk janë të transferuara në mënyrë eksplicite, por në mënyrë të përgjithshme për R10 se bëhet fjalë për 1.5 milion, me rebalancin do të bëhen 2 milion, mirëpo ne nuk kemi informacione të sakat se cfarë saktësisht do të subvencionohet me këto mjete për efikasitet energjetik, besoj se Komuna e Tetovës do të na informojë në pyetjen e radhës që do t`u parashtrojmë.
Programet vjetore si listë dëshirash! Kjo është një ndër gjetjet e kësaj shoqate, ku bëhet thirrje për sinkronizim të programeve dhe Buxhetit.
FLORENT BAJRAMI – Shoqata “Për Tetovën”
Absolutisht, ndoshta kjo është një prej atyre mjeteve dhe metodologjive ku IFES tenton ta bart deri tek Komunat që të kenë llogaridhënie kur ka premtime gjatë programeve të cilat i përpilojnë në departamentet e tyre dhe pastaj i transferojnë në Buxhet. Dmth, jo të themi se kemi Program me vlerë 300 milion ndërsa buxhetin e kemi 30 – 40 milion. Do të thotë gjithmonë të ketë një sinkronizim ndërmjet programeve dhe Buxhetit që të mund të jenë sa më të realizueshëm edhe vet Programet edhe vet Buxheti, njëkohësisht edhe Komuna me këtë do të tregojë seriozitet se u përmbahet premtimeve të dhëna.
Ndërkohë më 26 Tetor, Komuna e Tetovës ka formuar Sektorin për Mbrojtje të Ambientit Jetësor dhe Energjetikë. Udhëheqës i sektorit është emëruar Memet Jonuzi, sic u tha, për të forcuar kapacitetet institucionale në mbrojtjen e mjedisit dhe zhvillimin e qëndrueshëm
Kreu i Komunës së Tetovës, Bilall Kasami, këtë vendim e bëri publike në seancën e 20-të e Këshillit të Komunës së Tetovës.
BILALL KASAMI – Kryetar i Komunës së Tetovës
“Kemi themeluar një sektor të ri, që detyrën kryesore do ta ketë vitin e ardhshëm, të përpilojë programe, një ndër ta është dhe për mbrojtjen e Ambientit Jetësor, ku sigurisht besoj se do të parashihen mjete edhe për subvencionimin e inverterëve edhe për format tjera të ruajtjes së Ambientit Jetësor”
Këtë vit nuk kemi paraparë mjete për efikasitetin energjetik, do të shohim në Buxhetin e vitit 2027. Kështu është përgjigjur kreu I Komunës së Tetovës, Bilall Kasami, në pyetjen e Tv Koha, lidhur me subvencionimin e programeve nga Mjedisi Jetësor.
Ai tha se pret që mandati i dytë të jetë më i suksesshëm se mandati i parë, sepse siç tha, në mandatin e parë e gjeti Komunën në shumë borxhe dhe në përmbarues. Ndërsa tani, Kasami thotë se me këtë dinamikë, pret që deri në janar të vitit 2027 të del nga përmbaruesit, që sipas tij, do të ia mundësojë që të punojë më shumë në projektet që kanë të bëjnë me efiksitetin energjetik.
BILALL KASAMI – Kryetar i Komunës së Tetovës
“Ne kemi patur një situatë të pakëndshme me subvencionimin e nxënësve. Në dy-tri raste kur kemi ardhur për t`ua paguar ato 100 eurot që ua premtuam nxënësve dhe që solli vendim Këshilli, fatkeqësisht mjetet janë marrë nga përmbaruesit. Ne sollëm vendim, bëmë ndryshimin e Buxhetit dhe siguruam mjete për t`ua paguar diku 6.000.000 denarë nxënësve nga 100 euro. Por, derisa ne nuk menaxhojmë veçmas dhe të vetëm me Buxhetin, të kota janë ato që do t`i kalojmë në Këshill dhe nuk do t`i realizojmë pagesat, prandaj ne do të bëjmë një plan të tillë për vitin 2027 dhe kur do ta kemi në menaxhim të plotë Buxhetin, atëherë atë që do ta premtojmë do ta kemi më lehtë ta realizojmë”
Një tjetër masë në Programin e Mjedisit është subvencionimi i qytetarëve për blerjen e biçikletave, për të cilin ishin planifikuar 1.25 milionë denarë. Edhe këtu, megjithatë, të dhënat e monitorimit tregojnë një hendek mes planit dhe zbatimit.
Adhuruesit e biciklizmit që kontaktoi Tv Koha nuk janë të njoftuar për ndonjë Program Komunal për subvencionimin e bicikletave.
JUSUF BEJTULLAI – Biçiklist
‘’Ka pas raste individuale në Shkup, disa Komuna kanë dhënë ndihmë, sponsorisim. Tek ne, nuk ka shans, as që ka pas iniciativë qind për qind. Taman puna, ato nuk na ndihmojnë me shtigje me lëvizje të përhapet biçiklizmi e jo të bëjnë financimin e biçikletave ‘’
Shoqatat që monitorojnë programet vjetore të Komunave por edhe realizimin e tyre në terren, bëjnë thirrje që Komunat t`i sinkronizojnë programet dhe Buxhetet që të mund të jenë sa më të realizueshëm edhe vet Programet edhe vet Buxheti, njëkohësisht, sipas tyre, edhe Komuna me këtë do të tregojë seriozitet se u përmbahet premtimeve të dhëna qofshin ato elektorale por edhe me programet vjetore./Tv Koha/
Monitorimi i realizimit të premtimeve zgjedhore dhe i masave të pushtetit lokal është aktivitet në kuadër të projektit zviceran „Programi për Mbështetjen e Zgjedhjeve“, i zbatuar nga Fondacioni Ndërkombëtar për Sistemet Zgjedhore (IFES). Përmbajtja dhe opinionet e shprehura në asnjë mënyrë nuk mund të konsiderohen si pasqyrim i qëndrimeve të Qeverisë së Zvicrës dhe të Fondacionit Ndërkombëtar për Sistemet Zgjedhore (IFES).
