BDI përmes një konference për media ka ngritur shqetësime lidhur me për përkeqësimin serioz të situatës me virusin e Nilit Perëndimor në vend. Sipas tyre, janë regjistruar 38 raste dhe katër viktima. Tridhjetë e shtatë nga të prekurit janë nga rajoni i Shkupit. Integristët dolën me akuza se institucionet reaguan me vonesë, kurse thonë se paralajmërimet ekzistonin, por ka dështuar zbatimi i masave, koordinimi ndërmjet institucioneve dhe kontrolli i komunave. BDI doli me disa kërkesa.
1. Aktivizimin e menjëhershëm të Planit Kombëtar për përballjen me virusin e Nilit Perëndimor.
2. Mbikëqyrje të përforcuar epidemiologjike dhe kontroll sistematik të mushkonjave, veçanërisht në zonat me rrezik të shtuar.
3. Koordinim të qartë ndërmjet Ministrisë së Shëndetësisë, Institutit dhe Qendrave të Shëndetit Publik, komunave, institucioneve veterinare dhe atyre mjedisore.
4. Informim të rregullt të publikut për numrin e të prekurve, zonat me rrezik dhe masat që po ndërmerren.
5. Publikimin e të gjitha kontratave për dezinsektim, kompanive të angazhuara, shumave të paguara, datave të spërkatjes dhe zonave të trajtuara.
Publiku duhet të dijë kush ka vepruar, kush ka dështuar dhe ku kanë përfunduar paratë publike.
I bëjmë thirrje qytetarëve të përdorin mjete kundër mushkonjave, të veshin rroba që mbulojnë duart dhe këmbët, të vendosin rrjeta në dritare dhe të largojnë ujin e ndenjur nga oborret, ballkonet dhe enët.
Pas 38 rasteve dhe katër jetëve të humbura, Qeveria nuk ka më hapësirë për vonesa dhe improvizime.
Nevojiten masa urgjente, transparencë e plotë dhe përgjegjësi.