Katër fitore të vendasve dhe dy barazime me 25 gola të shënuar është epilogu i ndeshjeve të javës së katërt në Ligën e tretë Perëndim. Derbi në Bogovinë përfundoi me barazim, ndërsa Dobroshti, me fitoren kundër Lubotenit, ngjitet në pozitën e parë.
Derbi i javës së katërt në Ligën e Tretë – Perëndim u zhvillua në stadiumin e Bogovinës para një numri të konsiderueshëm të tifozëve mes Dritës vendase dhe ekipit Liria të Zhelinës.
Në një ndeshje të luftuar deri në fund, Drita – Liria përfundoi me barazim 2-2 edhe pse në dy raste ekipi mysafir ishte në epërsi.
Por duhet theksuar se dy ekipet treguan paraqitje të mirë në fushë dhe barazimi është epilogu më real i kësaj përballje.
Autor i dy golave për ekipin Drita ishte Rushit Ramadani, ndërsa për ekipin Liria shënuan Fehim Islami dhe Lirim Nesimi
Në Dibër, Korabi mundi Gostivarin 1-0 me golin e Trim Ambarit, Xhepçshti në cilësinë e vendasit deklasoi 5-0 Vardarin e Bërvenicës ku Bekim Sadiki dhe Mentor Saliju realizuan nga 2 gola, ndërsa Enes Osmani 1 gol.
Klubi i futbollit Reçica shënoi fitore 3-2 në përballjen me Skënderbeun e Porojit , Jehona e Përshevcës barazoi 3-3 me Cetinskën duke arkëtuar pikën e parë sezonale.
Dobroshti me fitoren 3-1 kundër Lubotenit ngjitet në pozitën e parë në renditjen e tabelës. Gradeci ishte i lirë.
Pas katër xhirove të zhvilluara tabelën e kryeson Dobroshti me 10 pikë, ndërsa vendin e dytë me nga 7 pikë e ndajnë Drita, Gostivari Xhepçishti dhe Liria.
Ndërkohë dje zyrtarisht nisi kampionati 2026/2027 në Ligën e katërt rajoni Tetovë – Gostivar ku u regjistruan këto rezultate: Flamurtari (Debresh) – Renova 4-3, Treboshi – Nerashti 0-3, Besa – Pallatica 4-0, Rinia (Negotinë) – Genç Kalemler Sport 3-3 dhe Dardania 99 – Piroku 2-1.
SHABAN SINANI – TV KOHA
