Çmimi i arit (XAU/USD) vazhdon prirjen rënëse për ditën e dytë me radhë të mërkurën dhe tregtohet pranë nivelit prej 3,285 dollarësh, ose në nivelin më të ulët të më shumë se një jave gjatë gjysmës së parë të sesionit evropian, sipas FX Street.

Dollari amerikan (USD) qëndron i fortë pranë kulmit të dy javëve në mesin e pritjeve se Rezerva Federale (Fed) do të mbajë normat e interesit të larta, për shkak të inflacionit që pritet të përkeqësohet si rezultat i taksave më të larta doganore dhe tregut të qëndrueshëm të punës në SHBA. Kjo gjendje mbështet nivelet e larta të fitimit të obligacioneve të thesarit amerikan dhe ushtron presion mbi metalin e verdhë që nuk sjell të ardhura.

Përveç kësaj, një performancë e qëndrueshme në tregjet evropiane të aksioneve përbën një faktor shtesë që rrit presionin mbi çmimin e arit si strehë e sigurt. Megjithatë, shqetësimet për pasojat e mundshme ekonomike nga tarifat tregtare të presidentit amerikan Donald Trump i mbajnë investitorët të kujdesshëm, çka mund të ndihmojë në kufizimin e humbjeve për çiftin XAU/USD. Tregtarët mund të presin gjithashtu publikimin e Procesverbalit të mbledhjes së FOMC, që mund të japë sinjale mbi rrugën e mundshme të uljes së normave të interesit nga Fed dhe të ofrojë një shtysë të rëndësishme për metalin e çmuar.

Mbretëria e Bashkuar i bën thirrje Iranit dhe Izraelit të “respektojnë armëpushimin”, tha kryeministri i këtij vendi Keir Starmer.

Në një deklaratë për parlamentin, kryeministri, i cili u kthye nga samiti i NATO-s në Hagë gjatë natës, tha se për dekada ka qenë politikë e deklaruar e Mbretërisë së Bashkuar dhe aleatëve të saj, që “Irani nuk duhet të ketë kurrë një armë bërthamore”

“Askush që interesohet për sigurinë e vendit tonë ose të ardhmen e Lindjes së Mesme, nuk mund të jetojë me këtë mundësi”, tha ai, transmeton Telegrafi.

Starmer theksoi të shtunën se SHBA-të ndërmorën një “hap të madh drejt zgjidhjes së këtij kërcënimi”.

“Tani ka një dritare për paqe. Ne i bëjmë thirrje Iranit dhe Izraelit të respektojnë armëpushimin dhe të përdorin këtë mundësi për të stabilizuar rajonin”, tha ai.

Advertisement

Presidenti i Ukrainës, Volodymyr Zelensky, nënshkroi të mërkurën vonë një marrëveshje me Këshillin e Evropës për themelimin e një tribunali të posaçëm që do të gjykonte zyrtarë të lartë përgjegjës për pushtimin e Ukrainës nga Rusia.

Tribunali do t’i ndjekë penalisht “krimet e agresionit” në lidhje me pushtimin dhe mund të gjykojë politikanë të lartë rusë, përfshirë presidentin Vladimir Putin.

“Çdo kriminel lufte duhet ta dijë se do të ketë drejtësi dhe kjo vlen edhe për Rusinë”, tha Zelensky pas nënshkrimit të marrëveshjes në Strasburg me sekretarin e përgjithshëm të Këshillit të Evropës, Alain Berset.

“Do të nevojitet guxim i madh politik dhe ligjor për t’u siguruar se çdo kriminel rus i luftës do të përballet me drejtësinë, përfshirë Putinin”, tha Zelensky në Asamblenë Parlamentare të Këshillit të Evropës pas nënshkrimit të marrëveshjes.

“Duhet ta dërgojmë një mesazh të qartë: agresioni çon në ndëshkim. Dhe, këtë duhet ta bëjmë së bashku, si Evropë”, shtoi ai më vonë në X.

Advertisement

Mandati i tribunalit do të jetë ndjekja penale e drejtuesve të lartë politikë dhe ushtarakë për krimin e agresionit kundër Ukrainës, tha Këshilli i Evropës.

“Kjo vepër penale i referohet vendimit për të përdorur forcën e armatosur kundër një shteti tjetër duke e shkelur Kartën e OKB-së”, tha këshilli.

Shtetas të Bjellorusisë apo Koresë së Veriut mund të ndiqen gjithashtu penalisht nëse provohet se kanë luajtur rol të rëndësishëm në krimin e agresionit kundër Ukrainës, shtoi ai.

Berset theksoi se e drejta ndërkombëtare “duhet të zbatohet për të gjithë, pa përjashtime dhe pa standarde të dyfishta”.

Ai tha se Këshilli i Evropës shpreson se tribunali do ta nisë punën vitin e ardhshëm. Nuk është vendosur ende se ku do ta ketë selinë tribunali.

Advertisement

Kjo është hera e parë që një tribunal i tillë themelohet nën mbikëqyrjen e Këshillit të Evropës, organit më të lartë për të drejtat e njeriut në kontinent.

Këshilli i Evropës, me 46 anëtarë, nuk është pjesë e BE-së, dhe përfshin shtete evropiane të rëndësishme jashtë BE-së si, Turqia, Mbretëria e Bashkuar dhe Ukraina./ REL