Zëvendësdrejtori i Doganave, Mustafa Dauti, ka njoftuar për intensifikimin e kontrolleve kundër tregtisë së paligjshme të duhanit dhe produkteve të tjera, pas goditjes së një grupi ndërkombëtar të përfshirë në krimin e organizuar dhe importin e paligjshëm të cigareve.

Dauti bëri të ditur se kontrollet janë shtuar jo vetëm ndaj importeve të duhanit dhe produkteve të tij, por edhe në tregun e brendshëm.

Gjatë kontrolleve të realizuara nga zyrtarët doganorë dhe ekipet mobile, janë konstatuar raste të shitjes së produkteve të duhanit dhe alkoolit pa pulla akcizore dhe pa paguar detyrimet përkatëse ndaj shtetit.
Si rezultat i këtyre kontrolleve, janë sekuestruar 135 kilogramë duhan i prerë dhe 30 litra alkool, ndërsa vlera e akcizës së papaguar për këto produkte arrin në 337.558 denarë.

Sipas njoftimit të Dautit, për dy persona janë ngritur kallëzime për kundërvajtje, ndërsa ndaj një personi, në rastin ku shmangia e akcizës arrin rreth 257 mijë denarë, do të parashtrohet kallëzim penal në përputhje me Kodin Penal.
Dauti theksoi se kontrolli i tregtisë së ligjshme është i rëndësishëm për mbrojtjen e interesit publik, respektimin e ligjit dhe krijimin e kushteve të barabarta për të gjithë tregtarët që ushtrojnë veprimtarinë e tyre në mënyrë të rregullt.

Siguria dhe shëndeti në punë janë e drejtë themelore e çdo punëtori, ndërsa krijimi i një mjedisi pune të sigurt, të shëndetshëm dhe dinjitoz mbetet një nga prioritetet e Ministrisë së Ekonomisë dhe Punës. Këtë e theksoi ministri i Ekonomisë dhe Punës, Besar Durmishi, në aktivitetin e sotëm me rastin e shënimit të Javës Evropiane për Sigurinë dhe Shëndetin në Punë, gjatë të cilit ndahen edhe Çmimet Kombëtare për sistemin më të mirë të zbatuar të sigurisë dhe shëndetit në punë.

“Siguria dhe shëndeti në punë nuk janë vetëm detyrim ligjor apo përmbushje e standardeve të përcaktuara. Ato janë e drejtë themelore e çdo punëtori, çështje e dinjitetit njerëzor dhe përgjegjësi e përbashkët. Qëllimi ynë është i qartë – çdo punëtor të ketë një mjedis pune të sigurt, të jetë i mbrojtur nga rreziqet dhe pas përfundimit të ditës së punës të kthehet në shtëpi i shëndetshëm dhe i sigurt”, theksoi ministri Durmishi.

Në fjalimin e tij, ministri theksoi se zhvillimi i shpejtë teknologjik, digjitalizimi dhe mënyrat e reja të organizimit të punës, krahas mundësive për rritjen e produktivitetit dhe zhvillimit ekonomik, sjellin edhe sfida të reja për mbrojtjen e punëtorëve. Siç theksoi ai, vëmendje e veçantë duhet t’u kushtohet rreziqeve psikosociale, stresit dhe ndikimit të proceseve bashkëkohore të punës në shëndetin mendor të të punësuarve.

“Prioriteti ynë është përmirësimi i vazhdueshëm i kornizës ligjore, forcimi i parandalimit dhe krijimi i kushteve ku përparimi ekonomik dhe teknologjik do të shoqërohet me standarde më të larta për mbrojtjen e punëtorëve. Po ndërtojmë një treg pune ku siguria dhe shëndeti nuk janë detyrim shtesë, por pjesë përbërëse e çdo procesi pune”, theksoi Durmishi.

Ministri vuri në dukje edhe përgjegjësinë e përbashkët të institucioneve, punëdhënësve, sindikatave, shërbimeve inspektuese dhe vetë punëtorëve në krijimin e një kulture të parandalimit, duke theksuar në veçanti rolin e kompanive.

Advertisement

“Investimi në kushte pune të sigurta dhe të shëndetshme nuk duhet të shihet si shpenzim, por si investim afatgjatë te njerëzit, në produktivitetin e kompanive dhe në konkurrueshmërinë e ekonomisë sonë. Vetëm një punëtor i shëndetshëm dhe i mbrojtur mund ta realizojë plotësisht potencialin e tij, ndërsa kompanitë që kujdesen për të punësuarit e tyre krijojnë bazën për zhvillim të qëndrueshëm”, u shpreh ministri.

Në kuadër të aktivitetit, vëmendje e veçantë iu kushtua kompanive që me praktikat e tyre kontribuojnë në avancimin e standardeve të sigurisë dhe shëndetit në punë.

Durmishi shprehu kënaqësinë për interesimin e kompanive që edhe këtë vit aplikuan për Çmimin Kombëtar për sistemin më të mirë të zbatuar të sigurisë dhe shëndetit në punë, duke theksuar se përkushtimi i tyre duhet të shërbejë si nxitje dhe shembull për punëdhënësit e tjerë.

Ai u përcolli urime kompanive të shpërblyera dhe shprehu mirënjohje për Këshillin për Siguri dhe Shëndet në Punë, partnerët socialë dhe të gjithë aktorët që kontribuojnë në përmirësimin e kushteve të punës.

Advertisement

Ministria e Ekonomisë dhe Punës do të vazhdojë me aktivitete të orientuara drejt përmirësimit të legjislacionit, ngritjes së vetëdijes publike, forcimit të masave parandaluese dhe bashkëpunimit me partnerët socialë, me qëllim sigurimin e një niveli më të lartë të mbrojtjes së punëtorëve.

“Qëllimi ynë i përbashkët nuk është vetëm përmbushja e detyrimeve ligjore, por krijimi i një mjedisi pune ku çdo individ do të ndihet i sigurt, i mbrojtur dhe i respektuar. Zhvillimi ekonomik ka vlerë të vërtetë vetëm kur shkon paralelisht me mbrojtjen e shëndetit, sigurisë dhe dinjitetit të punëtorëve”, përfundoi ministri Durmishi.

Një vajzë 16-vjeçare është pacientja më e re që është trajtuar për goditje në tru në Klinikën e Neurologjisë në Shkup, rreth një muaj e gjysmë më parë.

Mjekët thonë se numri i rasteve të goditjeve në tru është në rritje dhe shqetësues është fakti se kjo sëmundje po prek edhe të rinjtë.

Sipas drejtorit të Klinikës së Neurologjisë, Jovan Bozhinovski, faktorët kryesorë të rrezikut janë tensioni i lartë i gjakut, diabeti, kolesteroli i lartë, stili jo i shëndetshëm i jetesës, stresi, konsumimi i alkoolit dhe përdorimi i substancave psikotrope. Rrezik paraqet edhe faktori gjenetik.

Mjekët paralajmërojnë se 30 deri në 40 për qind e pacientëve mbeten me pasoja të përhershme, si paraliza, vështirësi në të folur dhe paaftësi.

Ata theksojnë se trajtimi në kohë është vendimtar për shpëtimin e jetës dhe parandalimin e pasojave të rënda.

Advertisement

“Çdo minutë ka rëndësi. Sa më shpejt të arrijë pacienti në klinikë, aq më të mëdha janë mundësitë për trajtim të suksesshëm”, thotë Bozhinovski.

Me rastin e Ditës Botërore të Goditjes në Tru, Klinika e Neurologjisë në Shkup do të organizojë nesër, nga ora 11:00 deri në 13:00, ekzaminime falas me Doppler të arterieve karotide për të gjithë qytetarët e interesuar.

Gjithashtu, po realizohen matje falas të tensionit të gjakut, sheqerit dhe kolesterolit, si dhe vlerësime të rrezikut për goditje në tru.