Lajme nga vendi
Me çfarë ngrohen qytetarët? Shkupi, ndër 4 qytetet me ajër më të ndotur
Shkupi prej disa ditësh është në krye të listës së qyteteve me nivelin më të lartë të ndotjes së ajrit në botë, kurse në këtë mëngjes kryeqendra u radhit në vendin e katërtë. Mjekët ngrenë shqetësimin për pasojat negative të ajrit në shëndetin e qytetarëve. Autoritetet vendore thonë se po ndërmarrin masa afatgjata dhe afatshkurta për përmirësimin e cilësisë së ajrit në vend.
Ndotja kaq e lartë e ajrit dëmton shëndetin e qytetarëve, sidomos të atyre me sëmundje kronike, thotë mjeku, Sedat Lumani.
“Ndotja është shumë e madhe me materie kimike dhe materie me grimca toksike të imta dhe materie, të cilat lëshojnë punëtoritë ose fabrikat e ndryshme, me makineri të ndryshme, të cilat reagojnë jo mirë për shëndetin e njeriut. Të gjithë njerëzit që janë me sëmundje kronike të sistemit të frymëmarrjes, sistemit kardiovaskular, fëmijët, gratë shtatzëna dhe të moshuarit, në përgjithësi janë target grupe më të rrezikuara. Në këtë kohë kur themi se duhet të bëhet ventilimi i ajrit, duhet të themi që mos të bëhet, sepse ambienti i brendshëm është më i pastër se ai i jashtëm. Duhet të kemi kujdes edhe me veshmbathjen edhe me ushqimin.”, – deklaroi mjeku u përgjithshëm, Sedat Lumani.
Qytetarët shprehen të shqetësuar dhe thonë se ajri i ndotur u shkakton probleme shëndetësore.
“Me nxehje, me radiator. Për atë kam ardhur te mjeku, nuk mundem frymë të marr nga ajri i ndotur. Unë kam ardhur prej Suedie, këtu ajri është i ndotur së tepërmi. Shumë ndikon në shëndetin tim, tepër ndikon. Kjo nuk është normale. 10 vjet jam në Suedi, atje nuk më ka bërë vaki. Këtu si kam ardhur, ja edhe zëri më është marrë. Se çka është puna me ajrin kaq të ndotur nuk e di.”, – tha një qytetar.
“Me dru ngrohemi. Po ndikon ajri i ndotur tek të gjithë.”, – tha një qytetar tjetër.
“Ngrohemi me ngrohëse. Po, ndikon. Kemi shumë lagështi. Burrin e kam të sëmurë me bronkit, me kancer është i sëmurë, ai e ndjen më shumë dhe i bën dëm ajri i ndotur.”, – tha një qytetare.
“Me dru. Jo, nuk kam asnjë problem nga ajri.”, – tha një qytetar.
Me rënien e temperaturave dhe fillimin e sezonit të ngrohjes u krijuan kushte për rritjen e ndotjes së ajrit, thonë nga Ministria e Ambientit, duke shtuar se gjatë këtij sezoni, Ministria po ndërmerr masa konkrete. Nga Ministria, përveç institucioneve, apelojnë edhe te qytetarët që të kenë kujdes se çka përdorin për ngrohje, pasi në mënyrë direkte ndikojnë në ndotjen e ajrit.
“Ministria e Ambientit Jetësor dhe Planifikimit Hapësinor apelon te qytetarët dhe institucionet, kompanitë dhe të gjithë aktorët tjerë, për sjellje të ndërgjegjshme lidhur me mënyrën e ngrohjes, pastrimin e oxhaqeve, hedhjen e mbeturinave, djegien e deponive, shfrytëzimin e automjeteve, punët ndërtimore në ambient të hapur dhe të ngjashme, me qëllim që të gjithë së bashku të japim kontribut për sigurimin e një ambienti më të pastër dhe më të shëndetshëm dhe përmirësimin e cilësisë së jetës për të gjithë ne.”, thonë nga Ministria e Ambientit.
Njëherit bëjnë të ditur se kanë formuar një grup intern të punës për ajër të pastër, i cili do t’i propozojë Qeverisë plan veprimi me masa konkrete afatshkurta dhe afatgjata për arritjen e rezultateve konkrete për uljen e ndotjes.
Po ashtu nga Ministria e Ambientit paralajmërojnë kontrolle të ekipeve të Inspektoratit Shtetëror të Ambientit Jetësor dhe Ministrisë së Ambientit, tek kapacitetet industriale që posedojnë lejen A të integruar ekologjike.
Qëllimi i kontrolleve është të ndikohet në ngritjen e vetëdijes dhe gatishmërisë së kompanive që gjatë sezonit dimëror të ndërmarrin masa shtesë, të cilat do të ndikonin pozitivisht në cilësinë e ajrit.
Me 27 vota pro, Këshilli Komunal ka miratuar buxhetin e Komunës së Tetovës për vitin 2026. Propozim-buxheti kap vlerën mbi 44 milionë euro, nga të cilat rreth 17 milionë euro janë të dedikuara për projekte kapitale. Kryetari i Komunës së Tetovës, Bilall Kasami, theksoi se buxheti për vitin 2026 është më i madh krahasuar me vitin paraprak dhe se bëhet fjalë për një buxhet zhvillimor.
“Për herë të parë, rreth 40 për qind e buxhetit është e dedikuar për investime kapitale. Në buxhetet e mëparshme, 70 deri në 80 për qind shkonin për paga dhe shpenzime operative. Ky buxhet parasheh ndërtimin e shkollave të reja, pishina, rrugë, kanalizim, ujë të pijshëm dhe projekte të tjera në interes të drejtpërdrejtë të qytetarëve”, deklaroi Kasami.
Ai sqaroi se janë paraparë mbi 200 mijë euro për projektimin dhe depërtimin e një rruge të re në fshatin Shipkovicë, e cila do të jetë pjesë e lidhjes rrugore Tetovë-Prizren.
“Në Shipkovicë do të ndërtohet një qarkore, në mënyrë që rruga të mos kalojë përmes fshatit, pasi rruga ekzistuese nuk i plotëson kushtet. Janë ndarë mbi 200 mijë euro për projektimin dhe depërtimin e kësaj qarkoreje. Segmenti nga Tetova deri në Shipkovicë i plotëson kushtet, ndërsa pjesa nga Shipkovica drejt fshatrave të tjera do të zgjerohet”, shtoi Kasami.
Këshilltari nga Lista Më Mirë për Tetovën, Agron Arifi, kritikoi disa zëra të buxhetit, duke theksuar se në të janë përfshirë mjete për rrugë që, sipas tij, janë realizuar gjatë fushatës zgjedhore.
“Bëhet fjalë për projekte që janë realizuar gjatë vitit 2025 dhe që do të paguhen nga buxheti i vitit 2026. Gjithashtu, kemi punësime me kontrata në Komunën e Tetovës, me një vlerë rreth 570 mijë euro. Propozova një amendament për rregullimin e fushës sportive në Gjimnazin ‘Kiril Pejçinoviç’, por nuk u pranua me arsyetimin se aty do të ketë investim privat”, tha Arifi.
Gjatë seancës, këshilltarët e Aleanca Kombëtare për Integrim akuzuan se edhe për vitin 2026 është paraparë një buxhet i konsiderueshëm për punësime, të cilat i cilësuan si punësime të militantëve partiakë. Këto akuza u hodhën poshtë nga kryetari Kasami, i cili deklaroi se në Komunën e Tetovës askush nuk merr pagë pa kryer punë. Po ashtu, këshilltarët e AKI-së kërkuan që të ndahen mjete edhe për rrugën në fshatin Gajre, duke theksuar se ajo është lënë në harresë dhe ndodhet në gjendje të rënduar infrastrukturore./TV KOHA/
Deputeti i VLEN-it, Adnan Azizi, ka reaguar me një mesazh publik lidhur me përurimin e bulevardit të ri në Tetovë, duke vlerësuar lart punën e kryetarit të Komunës, Bilall Kasami.
Në reagimin e tij, Azizi thekson se puna, ndryshimi dhe transformimi i Tetovës janë të lidhura drejtpërdrejt me emrin e Bilall Kasamit, të cilin e cilëson si “kryetarin më të suksesshëm të të gjitha kohërave”.
“Urime bulevardi i ri të gjithë qytetarëve”, ka shkruar deputeti Azizi, duke nënvizuar se projektet infrastrukturore janë dëshmi konkrete e angazhimit për zhvillimin e qytetit dhe përmirësimin e jetës së përditshme të banorëve të Tetovës.
Sipas tij, investimet e realizuara në infrastrukturë po e shndërrojnë Tetovën në një qytet më funksional, modern dhe të denjë për qytetarët e saj, ndërsa përurimi i bulevardit të ri paraqet një hap të rëndësishëm në këtë drejtim.
Lajme nga vendi
Nënshkruhet Marrëveshja për hua me BERZH-in me vlerë 20.9 milionë euro – do të furnizohen lokomotiva elektrike për HRMV Transport
Një marrëveshje për hua midis HM Transport dhe Bankës Evropiane për Rindërtim dhe Zhvillim (BERZH) në vlerë prej 20.9 milionë euro është nënshkruar sot në Qeveri. Me huanë do të do të furnizohen lokomotiva elektrike me pjesë rezervë, ndërsa qëllimi është transport më i madh i mallrave dhe gjenerimi i të ardhurave për ndërmarrjen.
Siç u tha para nënshkrimit, projekti është një hap i rëndësishëm drejt modernizimit të HM Transport, si dhe drejt përmirësimit të sigurisë dhe efikasitetit të transportit hekurudhor të mallrave.
Kushtet nën të cilat u siguruan mjetet – një periudhë afatgjatë e shlyerjes, një periudhë e favorshme grejs dhe një normë interesi konkurruese, janë në përputhje të plotë me strategjinë për menaxhim të përgjegjshëm të borxhit publik dhe sigurimin e financave publike të qëndrueshme.
“Sot po flasim për diçka që është lënë pas dore me dekada, por që është me rëndësi thelbësore për ekonominë, eksportin dhe të ardhmen evropiane të Maqedonisë, dhe kjo është hekurudha. Gjendja që trashëguam ishte katastrofike. Deri vonë, HM Transport nuk kishte asnjë lokomotivë plotësisht funksionale”, nënvizoi kryeministri Hristijan Mickoski, sipas të cilit kjo është një ripërtëritje sistematike e sektorit hekurudhor.
Mickoski informoi edhe se Marrëveshjes për hua i parapriu një analizë e nevojave, funksionalitetit dhe operueshmërisë së HM Transport.
Sipas zëvendëskryeministrit dhe ministrit të Transportit Aleksandar Nikolloski dhe ministres së Financave Gordana Dimitrieska-Kochoska, nënshkrimi i Marrëveshjes është një hap kyç për transformimin e plotë të HRMV Transport në një ndërmarrje moderne që do t’u përgjigjet nevojave të klientëve të saj.
“Lokomotivat e reja do ta ndryshojnë plotësisht pamjen dhe, së bashku me ato ekzistuese, do të jenë në gjendje t’i shërbejnë plotësisht transportit”, tha Nikolloski.
Ministrja Dimitrieska-Koçoska theksoi se Marrëveshja për hua është rezultat i negociatave intensive dhe konstruktive dhe është një konfirmim i besimit që institucionet financiare ndërkombëtare kanë në politikat tona dhe në drejtimin në të cilin po lëviz vendi.
“Me ngjarjen e sotme dhe nënshkrimin e Marrëveshjes për borxh për financimin e projektit “Rinovimi i flotës së mjeteve” drejtpërdrejtë investojmë në rritjen e kapaciteteve dhe efikasitetit të Hekurudhave të Republikës së Maqedonisë – Transport SHA Shkup, përmes furnizimit të lokomotivave të reja të cilat do të mundësojnë vëllim dhe siguri më të madhe në transportin hekurudhor transportues. Kjo do të thotë lidhshmëri më e mirë, konkurrencë më e madhe e ekonomisë vendore dhe mundësi të reja për gjenerimin e të ardhurave. Veçanërisht është e rëndësishme që projekti përfshin edhe vendosjen e sistemit bashkëkohor ERP, me të cilin krijohet bazë për menaxhim më të mirë me burimet, efikasitet të rritur operativ dhe nivel më të lartë të menaxhimit korporativ në sektorin hekurudhor”, theksoi ministrja.
Ky është një shembull, shtoi, i një qasjeje të integruar – jo vetëm investime në infrastrukturë, por edhe forcim institucional dhe menaxhues.
Në nënshkrim, përveç përfaqësuesve të BERZH-it, morën pjesë përfaqësues të Ministrisë së Transportit dhe menaxhmentit të HRMV Transport.
Miratohet buxheti i Tetovës, mbi 17 milionë euro për projekte kapitale
Adnan Azizi: Puna, ndryshimi dhe transformimi i Tetovës kanë emër – Bilall Kasami
Zjarr në Prizren, humb jetën një fëmijë njëvjeçar
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
