Мinistri i shëndetësisë, Azir Aliu, në hapjen e Shkollës së Katërt Ballkanike të Pediatrisë, theksoi se fokusi është në përmirësimin e kushteve në repartet pediatrike, modernizimin përmes pajisjeve të reja mjekësore dhe forcimin e burimeve njerëzore, thuhet në njoftimin e Ministrisë së Shëndetësisë.

“Pediatria, si një nga degët më humane dhe më të përgjegjshme të mjekësisë, ka rol kyç në ndërtimin e gjeneratave të shëndetshme. Kujdesi për më të vegjlit nuk është vetëm detyrë mjekësore, por edhe përgjegjësi shoqërore me prioritet të lartë. Për këtë arsye, Ministria e Shëndetësisë vazhdimisht po investon në përmirësimin e kujdesit shëndetësor pediatrik. Në këtë drejtim, fokusi është vendosur në: përmirësimin e kushteve në repartet pediatrike, modernizimin përmes furnizimit me pajisje të reja mjekësore, forcimin e kapaciteteve njerëzore”, tha Aliu.

Ministri theksoi se pa staf profesional dhe të motivuar nuk mund të ketë sistem shëndetësor të qëndrueshëm. Si pjesë e këtyre përpjekjeve, përmes programit për specializime dhe subspecializime janë ndërmarrë hapa konkretë për plotësimin e mungesës së kuadrit.

Nga atje shtojnë se gjatë vitit të kaluar janë miratuar 17 specializime në pediatri për institucionet publike shëndetësore, ndërsa janë punësuar edhe 15 specializantë privatë, një pjesë e të cilëve janë angazhuar në Klinikën Universitare të Pediatrisë. Këto masa kontribuojnë drejtpërdrejt në uljen e deficitit dhe forcimin e sistemit.

Kryeministri Hristijan Mickoski i hodhi poshtë si të pabaza pretendimet në një pjesë të mediave greke se ambasadori i tyre në SHBA kishte ndërhyrë në fjalimin e Zonjës së Parë të SHBA-së, duke vlerësuar se një gjë e tillë është praktikisht e pamundur dhe paraqet përpjekje për manipulim mediatik.

“A mund të besojë dikush se fjalimi i Zonjës së Parë të Shteteve të Bashkuara, para se të bëhet publik, shkon për rishikim te ndonjë përfaqësues diplomatik? Unë nuk e besoj këtë. Nëse kjo ka ndodhur, atëherë SHBA-të kanë një problem serioz në protokollet e sigurisë. Nga përvoja ime, është shumë e vështirë, për të mos thënë e pamundur, që dikush nga jashtë të ketë qasje në fjalimin e Zonjës së Parë të SHBA-së para se ajo ta bëjë publik. Prandaj, ata që e kanë sajuar këtë, mendoj se kanë bërë një përpjekje të pasuksesshme,” deklaroi Mickoski.

Sipas mediave greke, bashkëshortja e presidentit amerikan Donald Trump, Melania Trump, kishte planifikuar të përdorte emrin “Maqedoni”, pas së cilës Greqia kishte reaguar.

Kryetari i LSDM-së Venko Filipçe, në një brifing për gazetarët sot prezantoi një masë të re që është pjesë e programit të ri të propozuar të partisë, e cila parashikon shkurtimin e javës së punës nga pesë në katër ditë.

Filipçe theksoi synimi është një jetë dinjitoze për punëtorët.

“Prandaj nevojitet siguri dhe stabilitet i garantuar në vendet e punës. Pas një viti pune të vazhdueshme, i japim fund kontratave mujore. Pas maksimumi 12 muajsh, çdo angazhim i përkohshëm bëhet i përhershëm. Të gjithë kanë të drejta të barabarta. Çdo ditë llogaritet në stazh, i jepet fund punësimit përmes agjencive dhe sindikata është mbrojtja juaj”, deklaroi Filipçe.

Një nga shtyllat kryesore të programit, sipas Filipçes është motoja “Shtëpi për të gjithë”, që parashikon masa konkrete për lehtësimin e qasjes në banim, veçanërisht për të rinjtë.

Socialdemokratët propozojnë heqjen e plotë e tatimit mbi qarkullimin për të gjithë deri në moshën 35 vjeç që blejnë banesën e tyre të pare,  kurse shteti të garantojë kredi banesore për të rinjtë deri në 35 vjeç me normë fikse interesi prej vetëm 1% në 10 vitet e para.

Advertisement