Lajme nga vendi
Kandidatët e pavarur mund të marrin pjesë në zgjedhje pa mbledhjen e nënshkrimeve
Në zgjedhjet e ardhshme lokale do të mund të marrin pjesë edhe kandidatë të pavarur për kryetarë komunash dhe lista këshilltarësh, gjë që del nga deklarata e kryetarit të Komisionit Shtetëror të Zgjedhjeve (KSHZ), Boris Kondarko, dhënë pas miratimit të afateve për zgjedhjet. Ai iu referua nenit 60 të Kodit Zgjedhor, duke sqaruar se KSHZ nuk ka të drejtë t’ia mohojë askujt të drejtën ligjore për të marrë pjesë në zgjedhje.
Kondarko tha se, sipas Kushtetutës dhe Ligjit, çdo qytetar ka të drejtë të votojë dhe të zgjidhet, dhe se kjo e drejtë nuk mund t’i mohohet askujt. Sipas tij, neni 60 i Kodit Zgjedhor garanton qartë të drejtën për pjesëmarrje në zgjedhje, si për partitë politike dhe koalicionet, ashtu edhe për grupet e votuesve, përkatësisht për kandidatët e pavarur.
Ky sqarim i Kondarkos erdhi si reagim ndaj njërit prej konkluzioneve të miratuara në seancën e sotme të KSHZ-së, me të cilin u shfuqizua Rregullorja e KSHZ-së për rregullimin e procedurës për mbledhjen e nënshkrimeve. Siç shpjegoi kryetari i komisionit, shfuqizimi është në përputhje me vendimin e Gjykatës Kushtetuese, e cila i shfuqizoi nenet 61 dhe 62 të Kodit Zgjedhor që kishin të bëjnë me rritjen e kuotave për nënshkrimet që kandidatët e pavarur për kryetarë komunash dhe listat këshilltarësh duhej t’i mblidhnin për të marrë pjesë në zgjedhje.
Kondarko theksoi se kjo nuk është një vendim i KSHZ-së, por një zbatim i drejtpërdrejtë i rregullores ligjore, që ndjek vendimin e Gjykatës Kushtetuese për shfuqizimin e këtyre neneve nga Kodi Zgjedhor që kishin të bëjnë me numrin dhe përqindjen e nevojshme të nënshkrimeve për kandidim.
Në nenin 60, paragrafi 1 i Kodit Zgjedhor, të cilit iu referua Kondarko, thuhet:
“Të drejtë për të paraqitur listë kandidatësh për deputetë, listë kandidatësh për anëtarë këshilli, përkatësisht listë kandidatësh për kryetar komune kanë partitë politike të regjistruara në mënyrë të pavarur, koalicionet, si dhe grupet e votuesve.”
Pavarësia e pjesëmarrjes së kandidatëve pa mbledhjen e nënshkrimeve ishte e pasigurt për shkak të shfuqizimit të këtyre neneve në muajin maj të këtij viti. Ndryshimet në Kodin Zgjedhor që përfshinin këto kuota ishin miratuar në mars të vitit të kaluar, para zgjedhjeve presidenciale dhe parlamentare, dhe pritej të zbatoheshin në zgjedhjet lokale të vitit 2025. Megjithatë, Kuvendi nuk ka miratuar ndryshime të reja ligjore që atëherë.
Për të konfirmuar këtë të drejtë, profesori universitar Denis Preshova në një intervistë për “Prizma” theksoi se kandidatët e pavarur kanë të drejtë të marrin pjesë në zgjedhje pa pasur nevojë të mbledhin nënshkrime, duke theksuar se Kodi Zgjedhor aktualisht nuk parasheh një numër apo përqindje të caktuar nënshkrimesh për dorëzimin e listave të kandidatëve.
Kryetari i Kuvendit, Afrim Gashi, sot zyrtarisht i shpalli zgjedhjet. Raundi i parë për zgjedhjet e kryetarëve të komunave dhe këshillave komunalë është caktuar për më 19 tetor, ndërsa raundi i dytë për kryetarë komunash do të mbahet më 2 nëntor.(INA)
Qeveria ka shpallur gjendje krize 30-ditore në Komunën e Gostivarit më 21 korrik 2026, pasi vetëqeverisja lokale nuk ka kapacitet të përballet në mënyrë të pavarur me ndotjen serioze të ujit të pijshëm dhe përhapjen e epidemisë në qytet.
Çfarë do të thotë shpallja e gjendjes së krizës?
Gjendja e krizës shpallet kur ekzistojnë rreziqe që kërcënojnë seriozisht të mirat materialo-teknike, shëndetin dhe jetën e njerëzve, kurse parandalimi i tyre kërkon volum më të madh të burimeve dhe menaxhim të centralizuar. Në rastin e Gostivarit, ky vendim nënkupton:
-Marrja e kontrollit: Qeveria qendrore merr përgjegjësinë për menaxhimin e krizës, pasi ndërmarrjet lokale dështuan në sanimin e situatës.
-Mobilizimi maksimal: Të gjitha institucionet shtetërore, ndërmarrjet publike dhe burimet në dispozicion vihen në funksion të zgjidhjes së problemit me furnizimin me ujë.
-Aktivizimi i QMK-së: Aktivizohet Shtabi Kryesor pranë Qendrës për Menaxhim me Kriza, i cili mblidhet vazhdimisht dhe koordinon të gjitha aktivitetet në terren.
Cilat masa po ndërmerren në Gostivar?
Qëllimi i gjendjes së shpallur të krizës është vënia urgjente në funksion e një sistemi të sigurt të furnizimit me ujë përmes këtyre masave:
-Sanim urgjent: Inxhinierët dhe ekspertët shtetërorë marrin menjëherë përsipër pastrimin, dezinfektimin dhe aftësimin e ujësjellësit të qytetit.
-Sigurimi i ujit alternativ: Vazhdon shpërndarja urgjente e 50.000 litrave ujë të pijshëm falas në ditë përmes pikave të posaçme për qytetarët.
-Inspektime dhe hetime të rrepta: Inspektoratet shtetërore kryejnë kontrolle të jashtëzakonshme në punën e ndërmarrjes lokale, ndërsa Prokuroria Publike po zhvillon një hetim të detajuar për të përcaktuar përgjegjësinë penale për rrezikimin e shëndetit të qytetarëve.
-Angazhimi i burimeve: Nëse lind nevoja, shteti mund të angazhojë edhe burimet e Direksionit për Mbrojtje dhe Shpëtim (DMSH) dhe të Armatës.
Kur shpallet ligjërisht gjendja e krizës?
Sipas Ligjit për Menaxhim me Kriza, Qeveria me propozim të Komitetit Drejtues e merr këtë vendim kur plotësohen kushtet e mëposhtme:
-Intensitet i lartë i rrezikut: Kur ka rrezik akut për shëndetin (epidemi, burime të helmuara), katastrofa natyrore (zjarre, përmbytje) ose kërcënime të sigurisë.
-Ezaurimi i burimeve lokale: Kur organet e vetëqeverisjes lokale (komuna dhe shtabi i krizës i qytetit) nuk kanë kapacitet, makineri ose financa të mjaftueshme për të lokalizuar dëmin vetë.
-Nevoja për procedura të shpejta administrative: Mundëson furnizimin urgjent me materiale (klor, filtra, gypa) pa procedura të gjata dhe të ndërlikuara burokratike apo tendera, me qëllim që të parandalohen pasojat e mëtejshme.
-Gjendja e krizës në një rajon mund të zgjasë më së shumti 30 ditë, ndërsa nëse ka nevojë për zgjatjen e saj, Qeveria duhet të kërkojë miratimin e Kuvendit.
Në mbledhjen e sotme të 195-të, Qeveria, me propozim të Komitetit Drejtues, të përbërë nga ministri i Mbrojtjes Vlado Misajllovski, ministri i Punëve të Jashtme dhe Tregtisë së Jashtme Timço Mucunski, ministri i Punëve të Brendshme Pançe Toshkovski, ministri i Shëndetësisë Sasho Klekovski, ministri i Transportit Aleksandar Nikolloski dhe drejtori i Drejtorisë për Mbrojtje dhe Shpëtim Stojançe Angellov, si dhe anëtarët e jashtëm – ministri i Mjedisit Jetësor dhe Planifikimit Hapësinor Muhamed Hoxha, ministri i Bujqësisë, Pylltarisë dhe Ekonomisë së Ujërave Borçe Serafimovski, drejtori i Shërbimit për Punë të Përgjithshme dhe të Përbashkëta Ivica Tomovski, drejtoresha e Institutit të Shëndetit Publik Marija Andonovska, drejtori i Agjencisë për Ushqim dhe Veterinari Oliver Milanov, drejtoresha e Inspektoratit të Mjedisit Jetësor Ivana Ginovska dhe kryetari i BNJVL-së dhe njëherësh kryetar i Qytetit të Shkupit Orce Gjorgjievski, mori vendim për shpalljen e gjendjes së krizës në Komunën e Gostivarit për një periudhë prej 30 ditësh.
Duke qenë se vetëqeverisja lokale nuk është në gjendje të përballet me situatën e krijuar në Komunën e Gostivarit, sic thuhet në komunikatë, Qeveria mori këtë vendim me qëllim të koordinimit më të shpejtë të institucioneve, rikthimit në funksion të sistemit të furnizimit me ujë dhe sigurimit të ujit të pijshëm për qytetarët në afatin sa më të shkurtër.
Shëndeti i qytetarëve të Komunës së Gostivarit mbetet prioritet i Qeverisë dhe institucionet janë të përkushtuara për zgjidhjen e plotë të këtij problemi – thuhet në komunikatën e Qeverisë.
Njëkohësisht, Qeveria pret që Prokuroria Publike të zhvillojë një hetim të detajuar dhe ta zbardhë plotësisht rastin, duke theksuar se duhet të ketë përgjegjësi për secilin që ka rrezikuar shëndetin dhe jetën e qytetarëve të Gostivarit.
Në kuadër të manifestimit “Tetova n’Festë”, mbrëmë fëmijët por edhe shumë qytetarë të rajonit të Tetovës dhe jo vetëm, patën mundësinë të shijojnë një mbrëmje të veçantë me SHKA “Xheladin Zeqiri”, maskota të dashura dhe shumë lojëra argëtuese, ku kaluan çaste të bukura plot buzëqeshje, argëtim dhe atmosferë festive në zemër të Tetovës.
Mbrëmja u organizua nga Komuna e Tetovës kurse organizatorët e kësaj mbrëmjeje ishin Elez Mema dhe Albin Ajredini, të cilët me shumë përkushtim kishin bërë të mundur realizimin e këtij aktiviteti.
Valle e Shqipërisë së Mesme nga Grupi i fëmijëve, këngë për fëmijë, SH.K.A “Xheladin zeqiri” Vallja “Kongresi i Manastirit” dhe “14 Marsi”, këngët “Tetova qyteti im”, “Kitara ime”, “Fjalët e Qiririt”, “Ndalu Vlla ta Puthi Pushkën”, Xhamadani Kuq si Gjaku” si dhe Koreodrama “ Kur dasma u be luft e lufta Liri” nga Grupi i vajzave entuziazmuan publikun dhe fëmijtë e pranishëm në Sheshin e Tetovës.
Kjo natë e bukur u përmbyll me interpretimin e fundit nga Adea Munishi me këngën “Lulkuqja e Gjakovës” ku të gjithë fëmijët u bashkuan në skenë dhe kënduan së bashku.
Mbrëmë skena u takoi fëmijëve. Ata na dhuruan këngë, valle dhe emocione të bukura, një mbrëmjen e mbushur me emocione, buzëqeshje dhe shumë talent, duke dëshmuar se fëmijët tanë janë pasuria më e madhe dhe se arti është gjuha më e bukur për të shprehur ëndrrat, dashurinë dhe kulturën tonë./Tv Koha/
ÇFARË DO TË THOTË SHPALLJA E GJENDJES SË KRIZËS NË GOSTIVAR ?
QEVERIA SHPALL GJENDJE KRIZE 30-DITORE NË KOMUNËN E GOSTIVARIT
“TETOVA N`FESTË”: TETOVA FESTOI ME FËMIJËT!
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Azizi zbulon dyfytyrësinë e Ali Ahmetit: Ja vazali që e mbronte Gruevskin
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
