Lajme nga vendi
Aktakuzë ndaj disa personave për vepra penale lidhur me ndikim të paligjshëm në procedurën e ndarjes së mjeteve
Pas zhvillimit të procedurës hetimore, një prokuror publik nga Prokuroria Publike për Ndjekjen e Krimit të Organizuar dhe Korrupsionit (PPNKOK) sot ka dorëzuar në Gjykatën Themelore Penale Shkup aktakuzë ndaj një personi të akuzuar për veprën penale Dhënie ryshfeti dhe veprën penale Dhënie shpërblimi për ndikim të paligjshëm, ndaj tre personave për veprën penale Pranim shpërblimi për ndikim të paligjshëm, si dhe ndaj një personi tjetër për veprën penale Pranim ryshfeti.
I akuzuari kryesor, në cilësinë e tij si drejtues i një personi juridik penalisht përgjegjës, kishte aplikuar në një thirrje publike të Agjencisë për Mbështetje Financiare në Bujqësi dhe Zhvillim Rural të RMV-së, duke paraqitur kërkesë për përfitim të mjeteve financiare nga programi IPARD. Meqë personi juridik nuk i plotësonte kushtet e përcaktuara ligjore, aplikacioni ishte renditur më poshtë dhe nuk i përmbushte kriteret për përfitimin e mbështetjes financiare.
Me qëllim që aplikacioni të renditej padrejtësisht më lart dhe shuma e kërkuar e mbështetjes financiare të miratohej në tërësi, drejtuesi, në emër dhe për llogari të personit juridik, në disa raste kishte premtuar dhe dhënë para. Një zyrtari udhëheqës në Agjenci i ishte premtuar një dhuratë në vlerë prej 50.000 euro, ndërsa tre personave të tjerë u ishin dhënë 5.000 euro për të shfrytëzuar ndikimin e tyre real dhe pozitën zyrtare, me qëllim ushtrimin e presionit për marrjen e një vendimi që nuk duhej të merrej.
Gjatë procedurës hetimore, prokuroria ka konstatuar përgjegjësi penale edhe ndaj katër nëpunësve shtetërorë të punësuar në Agjencinë për Mbështetje Financiare në Bujqësi dhe Zhvillim Rural të RMV-së, ndaj të cilëve është dorëzuar propozim-aktakuzë për veprën penale Keqpërdorim i pozitës dhe autorizimit zyrtar. Ndërkohë, ndaj personit juridik penalisht përgjegjës është ngritur akuzë për veprën penale Dhënie ryshfeti.
Të akuzuarit, duke vepruar në kundërshtim me detyrat e tyre zyrtare, kanë mundësuar miratimin e paligjshëm të aplikacionit. Gjatë përpunimit dhe kontrollit të dokumentacionit, ata kanë kryer përllogaritje të pasakta të përmbushjes së kushteve dhe, mbi bazën e dokumentacionit jo të plotë, kanë përgatitur, kontrolluar dhe miratuar Formularin për kontrollin e kompletësisë së kontratës, si dhe Vendimin për miratimin e mbështetjes financiare. I akuzuari i dytë në aktakuzë, megjithëse ishte i vetëdijshëm se personi juridik nuk i përmbushte kushtet ligjore, e kishte nënshkruar vendimin me qëllim për të përfituar dhuratën e premtuar.
Meqë ende ekzistojnë bazat ligjore për masat e sigurisë të shqiptuara më parë, për katër nga të akuzuarit është propozuar vazhdimi i masës së paraburgimit, ndërsa për një person vazhdimi i masës së arrestit shtëpiak. Për nëpunësit shtetërorë të akuzuar, me propozim të veçantë, janë kërkuar masa kujdesi, përfshirë ndalimin e ushtrimit të aktiviteteve zyrtare që lidhen me veprën penale, ndalimin e ushtrimit të funksioneve si zyrtarë në Agjencinë përkatëse, konfiskimin e dokumenteve të udhëtimit dhe detyrimin për paraqitje periodike para organit kompetent.
Gjithashtu, me aktakuzën, prokurori publik ka propozuar konfiskimin e sendeve të përdorura për kryerjen e veprës penale, përfshirë telefona mobilë, media për ruajtjen e të dhënave digjitale dhe mjete financiare në vlerë prej 35.370 euro, 206.000 denarë dhe 200 franga zvicerane.
Nga materiali dëshmues i mbledhur gjatë kësaj procedure hetimore kanë dalë indicie edhe për mënyrën e veprimit me mjetet nga programet IPARD, për çka PPNKOK ka hapur një procedurë parahomore, e cila është ende në zhvillim.
Lajme nga vendi
Bardovca, Demir Hisari dhe Negorca në projektin “truri në SHBA”: paqartësi për rolin e spitaleve
Spitalet psikiatrike në Bardovcë, Demir Hisar dhe Negorcë kanë qenë të përfshira në një projekt shkencor ndërkombëtar që lidhet me grumbullimin e mostrave të trurit për kërkime shkencore në Shtetet e Bashkuara të Amerikës, por ende nuk është e qartë se cili ka qenë roli konkret i këtyre institucioneve.
Kjo rezulton nga raporti vjetor për vitet 2004/2005 i Departamentit të Psikiatrisë të Universitetit “Kolumbia” në SHBA, i siguruar nga “Sloboden Peçat”.
Në raport përmendet bashkëpunimi me profesorët dhe mjekët e mjekësisë ligjore nga Maqedonia e Veriut, Aleksej Duma dhe Gorazd Rosoklija.
Sipas dokumentit, projektet kërkimore të asaj periudhe përfshinin studime mbi anomalitë strukturore të dendriteve te skizofrenia dhe çrregullimet e humorit, si dhe kërkime mbi korrelacionet neuropatologjike të demencës dhe skizofrenisë. Në kuadër të këtyre projekteve është realizuar edhe grumbullimi i mostrave të trurit dhe të dhënave klinike nga obduksionet e pacientëve psikiatrikë, rasteve të vetëvrasjes dhe rasteve krahasuese në Maqedoninë e Veriut.
Në raport përmenden si institucione bashkëpunuese Instituti i Mjekësisë Ligjore, Spitali Psikiatrik i Shkupit (Bardovcë), spitalet në Demir Hisar dhe Negorcë, si dhe Fakulteti i Mjekësisë. Megjithatë, nuk specifikohet qartë se çfarë roli konkret kanë pasur spitalet psikiatrike në realizimin e projektit.
Raporti thekson se një nga bashkautorët e projektit, doktori Andrew J. Dwork, ka studiuar veçoritë neuropatologjike të skizofrenisë dhe lidhjen e saj me demencën, e cila paraqitet shpesh te pacientët më të moshuar me këtë diagnozë.
Lajme nga vendi
Dosjet “Epstein”: Si u dërguan mostrat e trurit nga Shkupi në New York? Zbardhen detajet tronditëse!
Shkruan: Mentor Mellova
Një valë e re dokumentesh të bëra publike nga Departamenti i Drejtësisë i SHBA-së lidhur me financat e Jeffrey Epstein ka ndezur një debat të ashpër në Maqedoninë e Veriut. Akuzat e fundit në media lokale, që flasin për “eksport të trurit të njeriut” drejt SHBA-së, kanë detyruar shkencëtarët dhe zyrtarët të sqarojnë kufirin midis kërkimit mjekësor legjitim dhe spekulimeve sensacionale.
Si u zbulua skandali “bankë truri”
Shqetësimi nisi kur në rrjetet sociale dhe disa portale maqedonase u publikuan fragmente të një korrespondence elektronike (email), ku përmendej një “bankë truri” në SHBA me rreth 1,000 mostra, përfshirë ato nga Ballkani.
Sipas raportimeve, Maqedonia e Veriut cilësohej si burimi i mostrave “më të freskëta” për kërkime mbi ketaminën dhe vetëvrasjen.
Megjithatë, ajo që po prezantohet si një “skandal i ri” është në fakt një bashkëpunim shkencor i dokumentuar prej dekadash.
Shkenca prapa Sensacionit
Sipas të dhënave të verifikueshme në platformat shkencore si PubMed Central, bashkëpunimi midis Institutit të Mjekësisë Ligjore në Shkup dhe institucioneve psikiatrike në Nju Jork (NYSPI/Columbia University) ka nisur që në vitin 1996.
Qëllimi i këtij bashkëpunimi ishte studimi i ndryshimeve neurobiologjike te personat që kanë kryer vetëvrasje. Dokumentet shkencore sqarojnë se:
• Indet e trurit janë transportuar me fluturime zyrtare si bagazh i regjistruar.
• Procesi ka pasur leje nga Ministria e Shëndetësisë e Maqedonisë.
• Mostrat janë marrë pas pëlqimit të nënshkruar nga familjarët e të ndjerëve.
Mbrojtja e Shkencëtarëve: “Gjithçka ishte Ligjore”
Në deklaratat për mediat lokale (TV 24 dhe Telma), dy figura kyçe të këtij procesi, Prof. Dr. Aleksej Duma (ish-drejtor i Mjekësisë Ligjore në Shkup) dhe Prof. Dr. Gorazd Rosoklija (neuropsikiatër në Universitetin Columbia), kanë hedhur poshtë akuzat për “tregti organesh”.
“Bëhet fjalë për kërkim mjekësor-shkencor sipas standardeve ndërkombëtare. Transporti ishte i organizuar përmes kanaleve zyrtare, me dokumentacion të plotë dhe kontrolle doganore në të dyja shtetet,” deklaroi Duma.
Nga ana tjetër, Rosoklija konfirmoi se një grant nga fondacioni i Epstein ka mbështetur projektin shkencor, duke shpjeguar se financime të tilla janë të zakonshme në SHBA për shkak të lehtësirave tatimore të donatorëve, por kjo nuk ndryshon natyrën etike të punës shkencore.
Mungesa e Provave për “Shitje”
Përkundër pretendimeve në rrjetet sociale se “mijëra trurë kanë përfunduar në shitje”, deri më tani nuk është paraqitur asnjë dokument që vërteton transaksione ilegale apo shkelje të protokolleve etike.
Ekspertët paralajmërojnë se përzierja e fakteve (ekzistenca e koleksionit të trurit) me supozimet (tregtia e paligjshme) rrezikon të dëmtojë reputacionin e institucioneve shkencore dhe të shkaktojë panik të panevojshëm te qytetarët.(INA)
Ministrja e Financave, Gordana Dimitrieska-Koçoska, në emisionin “360 Gradë” në RTVM deklaroi se vendosja e pagës minimale duhet të udhëhiqet nga dialogu mes punëdhënësve dhe punëtorëve, ndërsa Qeveria do të pranojë çdo marrëveshje të arritur mes tyre.
Dimitrieska-Koçoska theksoi se, megjithëse paga e asnjë punëtori nuk është kurrë e mjaftueshme dhe gjithmonë duhet të jetë më e lartë, ekzistojnë rregulla ekonomike që duhet të merren parasysh.
“Le të ulen dhe të dakordohen mes tyre për atë që punëdhënësit mund të përballojnë, sepse ata janë ata që duhet të paguajnë pagat. Më tregoni, ku në botë shteti i mbulon pagat e sektorit privat? Qeveria mund të mbulojë pagat e administratës dhe të pensionistëve, por këtu po flasim për sektorin privat. Nuk mund t’i përziejmë gjërat,” tha ministrja.
Ajo shtoi se Qeveria ka rritur pagat në shëndetësi, arsim dhe MPB dhe ka kujdesur për punonjësit e saj. “Ky është një dialog që duhet të udhëhiqet nga punëdhënësit dhe punëtorët. Qeveria thotë: ‘Ne e vendosëm ligjin, dhe nëse mendoni se duhet të shkojmë përtej ligjit, dakordohuni mes jush’,” përfundoi Dimitrieska-Koçoska.
Bardovca, Demir Hisari dhe Negorca në projektin “truri në SHBA”: paqartësi për rolin e spitaleve
Dosjet “Epstein”: Si u dërguan mostrat e trurit nga Shkupi në New York? Zbardhen detajet tronditëse!
Spanja realizon transplantin e parë të fytyrës në botë
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
