Lajme nga vendi
Kontrabandë nën petkun e mjekësisë: Lojëra në biznesin e kanabisit
Policia dhe Prokuroria për Krim të Organizuar dhe Korrupsion e Maqedonisë së Veriut kryen kontrolle vonë mbrëmë, më 5 shkurt, në fabrikën “ALFAFARM GRUP” në Shkup, me bazë në rrethin e ish-fabrikës OHIS, ndërsa paralelisht u kryen kontrolle edhe në disa lokacione në rajonin e Strumicës.
Jozyrtarisht, disa media raportuan se gjatë aksionit policor janë konfiskuar 27 tonë kanabis mjekësor nga magazinat, një sasi rekorde. Informacionet zyrtare nga MPB-ja dhe Prokuroria pritet të publikohen sot.
Aksioni në territorin e Maqedonisë së Veriut erdhi pasi autoritetet serbe sekuestruan pesë tonë marihuanë të kontrabanduar, për të cilën u tha se e ka origjinën nga një fabrikë në Shkup, me licencë për prodhim kanabisi për qëllime mjekësore.
Ende nuk ka epilog as nga vizita e mëparshme në terren e MPB-së dhe Komisionit për miratimin e kultivimit të kanabisit për qëllime mjekësore, në kuadër të Ministrisë së Shëndetësisë, e cila me ligj është e obliguar të ushtrojë mbikëqyrje mbi kompanitë që prodhojnë kanabis mjekësor.
“Komisioni për kanabis, në koordinim me Ministrinë e Punëve të Brendshme, ka kryer një kontroll të jashtëzakonshëm. Procedura është ende në zhvillim dhe po bëhet verifikim shtesë i gjendjes. Në këtë moment nuk është e mundur të jepen informacione shtesë”, thanë nga Komisioni për Radion Evropa e Lirë.
Më 29 janar, policia serbe sekuestroi pesë tonë marihuanë në fshatin Konjuh, afër Krushevcit, me një vlerë të vlerësuar nga 7 deri në 10 milionë euro në tregun e zi.
Përveç marihuanës, u gjetën edhe armë zjarri – të paktën katër pushkë automatike dhe një “zollë”, si dhe para në vlerë rreth 12.700 euro.
Sipas informacioneve të Prokurorisë serbe për Krim të Organizuar (TOK), një grup i organizuar kriminal e kishte sjellë marihuanën në janar 2026 nga Maqedonia e Veriut në territorin serb.
Edhe Prokuroria Publike në Shkup hapi një lëndë lidhur me sekuestrimin e pesë tonëve marihuanë në fshatin Konjuh.
Prokuroria i tha Radios Evropa e Lirë se ka vendosur “komunikim intensiv dhe të vazhdueshëm” me institucionet kompetente në Serbi, “me shkëmbim aktiv të informacioneve relevante dhe koordinim të veprimeve”.
Biznesi i kultivimit të kanabisit për qëllime mjekësore u legalizua në Maqedoninë e Veriut në vitin 2017. Legalizimi kishte për qëllim të siguronte produkte të sigurta dhe të standardizuara për pacientët me gjendje të rënda shëndetësore – sëmundje onkologjike, HIV/AIDS, epilepsi dhe dhimbje kronike neuropatike, ndërsa vaji i kanabisit ofron terapi për lehtësimin e simptomave, reduktimin e të përzierave nga kimioterapia dhe përmirësimin e oreksit dhe cilësisë së jetës.
Në Serbinë fqinje, përdorimi i kanabisit është i ndaluar me ligj në çdo formë.
Ligj i dobët, kontroll i fshehtë
Më shumë se tetë vjet pas miratimit të Ligjit për legalizimin e kultivimit dhe eksportit të kanabisit për përdorim mjekësor, pothuajse një e treta e të gjitha licencave të dhëna kompanive kanë shkelur ligjin për shkak të parregullsive në punë.
Gjatë kësaj periudhe, kompanitë kanë “prodhuar” edhe një sërë aferash për kontrabandë të marihuanës, duke e zbehur përfitimin real shëndetësor nga prodhimi i vajit të kanabisit për qëllime mjekësore.
Nga hyrja në fuqi e Ligjit për kontrollin e drogave narkotike dhe substancave psikotrope, më 27 dhjetor 2017, deri më 3 shkurt 2026, Qeveria ka marrë vendime për dhënien e lejeve për kultivimin e kanabisit për qëllime mjekësore për 61 persona juridikë.
Mbikëqyrjen ndaj kompanive me leje për kultivimin e kanabisit për qëllime mjekësore e ushtron Komisioni për miratimin e kultivimit të kanabisit për qëllime mjekësore, i cili funksionon nën Ministrinë e Shëndetësisë.
Komisioni përbëhet nga gjithsej pesë anëtarë, prej të cilëve dy janë nga Ministria e Shëndetësisë (kryetari dhe një anëtar), të cilët njëkohësisht janë të sistemuar dhe të angazhuar edhe në sektorë të tjerë të institucionit. Ndërsa tre janë anëtarë të jashtëm, nga një përfaqësues nga Ministria e Bujqësisë, Pylltarisë dhe Ekonomisë së Ujërave, nga Agjencia për Barna (MALMED) dhe një specialist nga fusha e bimëve mjekësore.
Komisioni e informon Ministrinë e Shëndetësisë për punën e tij, e cila më pas i dërgon Qeverisë propozime për dhënien ose heqjen e licencave.
Në kërkesat e dërguara për të dhëna – sa kontrolle të rregullta dhe të jashtëzakonshme janë kryer gjatë vitit 2025, në sa dhe cilat kompani janë konstatuar parregullsi dhe cilat janë ndëshkimet – Komisioni nuk dha përgjigje konkrete dhe të sakta.
“Gjatë vitit 2025, Komisioni për kanabis ka kryer kontrolle të rregullta dhe të jashtëzakonshme te subjektet juridike me licencë për kultivim kanabisi për qëllime mjekësore. Gjatë kontrolleve janë konstatuar parregullsi në punën e disa subjekteve juridike, të lidhura me mosrespektimin e dispozitave ligjore dhe detyrimeve të përcaktuara me lejen për kultivim. Në rastet kur janë konstatuar parregullsi, Komisioni vepron në përputhje me kompetencat ligjore dhe merr masa përkatëse, në varësi të peshës dhe karakterit të gjendjeve të konstatuara”, u përgjigjën nga Komisioni.
Ministri i Shëndetësisë, Azir Aliu, theksoi se tashmë po punohet në ndryshime ligjore në këtë fushë dhe se një grup pune kishte nisur analizat edhe para se afera me marihuanën e sekuestruar në Serbi të bëhej publike. Sipas ministrit, në ligjin ekzistues janë identifikuar disa dobësi që duhet të tejkalohen me zgjidhjen e re ligjore.
“Le të shohim se çfarë kanë për të thënë ekspertët për Ligjin dhe për nenet që janë shtuar në zgjidhjen e re ligjore. Mendoj se do të kemi një Ligj me të cilin do të mund t’i ndjekim aktivitetet”, deklaroi Aliu.
Përveç Komisionit Ndërinstitucional, sipas ligjit, inspektime kryejnë edhe Ministria e Bujqësisë dhe Inspektorati Shtetëror i Bujqësisë. Në përshkrimin e punës së tyre thuhet se ata ushtrojnë mbikëqyrje dhe kontroll mbi prodhimin e materialit faror, vetë prodhimin, si dhe para dhe pas korrjes.
Kryeministri Hristijan Mickoski deklaroi se rasti me pesë tonë drogë që përfunduan në Serbi, e që sipas prokurorisë serbe e kanë origjinën nga Maqedonia e Veriut, është një “rast serioz”, dhe paralajmëroi aksione policore edhe ndaj kompanive të tjera që kanë keqpërdorur licencat për kultivimin e kanabisit.
“Pres që ditëve në vijim MPB-ja të dalë me dhjetëra tonë – jo me disa tonë, por me dhjetëra tonë të këtij lloji të mjeteve të ndaluara, përkatësisht substancave të ndaluara, drogë, marihuanë në këtë rast – e cila aktualisht ndodhet në depot në Maqedoni ose ka pasur në ndonjë mënyrë marrëdhënie ndërmjet subjekteve të caktuara juridike, jo vetëm brenda shtetit, por edhe jashtë tij, për të cilat është konstatuar se janë hedhur ilegalisht në qarkullim dhe janë ruajtur ilegalisht”, deklaroi Mickoski mbrëmë në një intervistë për transmetuesin publik MRT.
Nga grabitje filmike te kontrabanda ndërkufitare
Kjo nuk është afera e parë që lidh fabrikat maqedonase të kanabisit mjekësor me tregun e zi në Serbi. Paralelja me rastin “Jovanjica”, për plantacionin më të madh të marihuanës në Evropë para gjashtë vitesh, i kujton opinionit publik lidhjet e thella mes Maqedonisë së Veriut dhe Serbisë në kontrabandën e marihuanës. Atëherë u sekuestruan më shumë se një ton e gjysmë marihuanë.
Gjatë shpërthimit të aferës “Jovanjica” në Serbi, opozita e atëhershme VMRO-DPMNE kërkoi hetim edhe në Maqedoninë e Veriut, duke e lidhur pronarin e plantacionit, Predrag Koluvija, me ish-kryeministrin maqedonas, Zoran Zaev, dhe bizneset e familjes së tij me marihuanë.
“Skandali është edhe më i madh sepse i arrestuari Predrag Koluvija është partner biznesi pikërisht i partnerit të biznesit të Zaevëve, Goran Krstev, i cili së bashku me Zaevin, po ju kujtoj, ishte amnistuar për rastin ‘Global’”, deklaroi Igor Janushev në prill 2021.
Në këtë rast, para Gjykatës Speciale në Beograd po zhvillohen dy procese gjyqësore kundër Predrag Koluvijas, pronar i pronës “Jovanjica”.
Në të dy lëndët ai akuzohet se ka qenë organizator i një grupi që kultivonte marihuanë për shitje dhe mbrohet në liri.
Gjatë viteve të fundit janë shënuar edhe disa raste të tjera të veprimtarisë së paligjshme të kompanive, vjedhjeve dhe përpjekjeve (të suksesshme dhe të pasuksesshme) për kontrabandë marihuane.
Para gjashtë vitesh, në fshatin Araçinovë afër Shkupit, policia sekuestroi 231 kilogramë nga gati dy tonë marihuanë që ishin vjedhur nga kompania “Herb Industry” në Vallandovë. Kamioni me pjesën më të madhe të marihuanës u braktis pranë pikëkalimit kufitar Bllacë, me Kosovën. Në publik u shfaqën edhe pamje nga magazina e marihuanës, duke përfaqësuar rastin e parë me prova video për vjedhje nga një kompani e licencuar.
Në vitin 2022, policia gjeti rreth 250 kilogramë marihuanë të paketuar në 67 thasë, me vlerë të vlerësuar rreth 800.000 euro, që e kishin origjinën nga kompania e Manastirit “Medical 420”. MPB-ja bastisi ambientet një vit më vonë, pasi Qeveria ia kishte hequr lejen në vitin 2021 për shkak të paligjshmërive.
Po atë vit, policia sekuestroi nga kompania strumicase “Solidis Herbal” gjithsej 1.6 tonë marihuanë, me vlerë të vlerësuar 3.2 milionë euro.Transmeton TV KOHA
Qytetarët nuk po shohin përfitime nga ulja e TVSH-së për karburantet dhe derivatet e naftës, pasi pavarësisht kësaj mase, çmimet janë rritur”, theksoi kryetari i LSDM-së, Venko Filipçe në konferencën e sotme për shtyp. Ai shtoi se u vërtetua ajo për të cilën LSDM kishte paralajmëruar në javët e fundit – rritja e çmimeve të karburanteve ka ndikuar drejtpërdrejt edhe në shtrenjtimin e ushqimeve.
“Rritja e çmimeve të energjisë, derivateve dhe naftës do të sjellë rritje të çmimeve fillimisht të produkteve ushqimore, e më pas edhe të të gjitha produkteve të tjera në vend. Nafta ishte 71 denarë, ndërsa tani është 95,5 denarë dhe qytetarët tashmë ankohen se nuk mund të mbushin as shportën bazë, pra nuk mund të përballojnë ushqimin. Janë shtrenjtuar produktet bazë si vezët, mishi, produktet e qumështit, frutat dhe perimet, dhe dihet se kur këto produkte rriten një herë, çmimet rrallë kthehen pas. Nga masa e Qeverisë për uljen e TVSH-së nga 18% në 10% nuk po përfitojnë as kompanitë. E vetmja gjë që mund të pritet është vazhdimi i rritjes së çmimeve, të cilat, siç ju kujtoj, kishin nisur të rriteshin që në fund të vitit të kaluar dhe në fillim të këtij viti, para fillimit të luftës në Iran. Pra, kjo është vetëm një arsye shtesë pse çmimet në vend do të vazhdojnë të rriten”, tha Filipçe.
Në konferencë, ai theksoi gjithashtu se vendet e rajonit tashmë kanë ndërmarrë masa konkrete. Si shembull përmendi Kroacinë, ku përveç kufizimit të çmimeve të karburanteve dhe gazit, janë mbështetur edhe kategori të caktuara qytetarësh si bujqit, familjet në nevojë, peshkatarët dhe të tjerë – pra ata që kanë më shumë nevojë për ndihmë.
Lajme nga vendi
Rritet çmimi i naftës një fuçi naftë Brent sot në mëngjes tregtohet për mbi 100 dollarë
Një fuçi naftë Brent sot në mëngjes tregtohet për mbi 100 dollarë. Rritja e çmimit të naftës ndodhi pasi dje kishte rënë për 10% pas vendimit të presidentit amerikan, Donald Trump, për të shtyrë sulmet ndaj Iranit dhe për të shpallur bisedime me Teheranin.
Në bursat aziatike sot në mëngjes, çmimi i naftës Brent nga Deti i Veriut u rrit për 2,9 përqind dhe një fuçi u tregtua për 102,84 dollarë.
Një rritje prej 3,5 përqind u regjistrua edhe tek çmimi i naftës amerikane referencë “West Texas Intermediate”, i cili tregtohej për 91,20 dollarë për fuçi.
Kit-Go, përmes një ndryshimi të regjistruar të emrit të kompanisë, ditët e fundit zyrtarisht ka marrë emrin e zinxhirit ndërkombëtar të supermarketeve Spar.
Kit-Go tani quhet “Spar North Macedonia”, ndërsa 62 markete të shitjes me pakicë në të gjithë vendin janë riemërtuar me emrin e ri. Numri më i madh i pikave të shitjes është në Shtip, por edhe në Shkup, si dhe pothuajse në të gjitha qytetet më të mëdha dhe më të vogla në vend, të cilat tani janë të regjistruara zyrtarisht si Spar.
Në janar u njoftua se Spar do të riemërtojë marketet Kit-Go në Maqedoni dhe do të kalojë nën emrin e brendit të njohur holandez. Marketet Kit-Go, rreth 60 në të gjithë shtetin, për rreth 60 milionë euro u blenë nga kompania kosovare Viva Fresh disa vite më parë, por ende operonin me emrin e tyre të vjetër.
Më herët u publikua edhe një informacion mediatik se zinxhiri holandez i tregtisë me pakicë planifikon të hapë një market në Kavadar. Nga komuna kanë deklaruar, sipas informacioneve të tyre, se kompania tashmë po kërkon një lokacion të përshtatshëm. Në rajon, Spar është i pranishëm në Kosovë dhe Shqipëri.
Në mars të këtij viti, zinxhiri tregtar kosovar Viva Fresh Group, i pranishëm edhe në Maqedoni përmes Viva Fresh Store, Super Kit Go dhe Modern Studio & Top Shop, e mori nën kontroll Spar Albania nga Balfin Group. Spar është themeluar në vitin 1932. Brendi është i pranishëm në 48 vende me 13.800 dyqane. Deri më tani nuk kishte markete në Maqedoni.
Spar kishte interes për të hyrë në tregun e Maqedonisë edhe para fillimit të pandemisë së Covid-it. I themeluar në vitin 1932 në Holandë, SPAR është shndërruar në një brend global i pranishëm në rreth 48 vende me mbi 13.900 dyqane në mbarë botën. Ai dallohet nga të tjerët veçanërisht për përshtatjet lokale të çdo dyqani në komunitetin ku operon. Ndryshe nga zinxhirët e mëdhenj të centralizuar, SPAR funksionon përmes partnerëve të licencuar dhe operatorëve të pavarur, që do të thotë se çdo dyqan është në gjendje t’i përgjigjet nevojave specifike të popullsisë lokale.
FILIPÇE: S`KA PËRFITIME NGA ULJA E TVSH-së, ÇMIMET TASHMË JANË RRITUR!
Rritet çmimi i naftës një fuçi naftë Brent sot në mëngjes tregtohet për mbi 100 dollarë
“SPAR” do të hyj zyrtarisht në Maqedoni përmes riemërtimit të “Kit-Go”
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
Shkup, panairi i patundshmërive të Dubait! Citi Casa rikthehet në hapësirat e COWORK21 më 31 maj dhe 1 qershor
-
Lajme nga vendi2 months agoRrjeti i madh i dyqaneve për produkte të shtëpisë Comodita Home po rritet akoma më tepër, tash me dyqanin më të madh në Re Mall, Tetovë
-
Sport2 months agoOLIMPIADA DIMËRORE ‘’MILANO CORTINA 2026’’ FILLON MË 6 SHKURT
-
Lajme nga bota2 months agoGjermania në krizë për punëtorë të kualifikuar, spitalet dhe shkollat kanë mungesa të mëdha