Lajme nga vendi
NIS MUAJI I RAMAZANIT: KREU I BFI-së BËN THIRRJE PËR UNITET E SOLIDARITET!
Me rastin e fillimit të muajit të bekuar të Ramazanit, kreu i BFI-së, Shaqir Fetahu, ua uroi besimtarëve muajin e bekuar të Ramazanit duke u dëshiruar besimtarëve paqe, mirësi dhe përkushtim shpirtëror. Theksoi rëndësinë e solidaritetit, bashkëjetesës dhe forcimit të vlerave morale gjatë këtij muaji.
“Të dashur besimtarë,
Me perëndimin e diellit dhe me hyrjen e natës së 19 shkurtit, ne fillojmë agjërimin e muajit të bekuar të Ramazanit. Ky është momenti kur ummeti hyn në një gjendje adhurimi, përulësie dhe reflektimi.
Ramazani nuk është periudhë e zakonshme kohore. Është kohë e zgjedhur. Është muaj në të cilin zemrat bëhen më të ndjeshme, ndërgjegjjja bëhet më e mprehtë dhe lidhja me Allahun bëhet më e thellë. Ramazani vjen si thirrje për qetësi të brendshme dhe për riorganizim të jetës sonë rreth asaj që është thelbësore.
Qëllimi i agjërimit është devotshmëria. Devotshmëria është vetëdije e përhershme për Allahun, që e orienton njeriun në mendim, në fjalë dhe në veprim. Ajo është ndërgjegje morale që e mban njeriun të drejtë edhe kur është vetëm dhe të përgjegjshëm edhe kur askush nuk e sheh.
Ramazani është shkollë e disiplinës dhe e karakterit. Kur përmbahemi nga ushqimi dhe pija – gjëra të lejuara – ne edukojmë vullnetin tonë dhe e forcojmë kontrollin mbi vetveten, që të përmbahemi edhe nga gjërat e ndaluara. Kjo vetëpërmbajtje duhet të shtrihet përtej aspektit fizik. Duhet të përfshijë gjuhën, sjelljen dhe marrëdhëniet tona.
I Dërguari i Allahut ﷺ ka thënë:
“Kush nuk e lë fjalën e rreme dhe veprimin me të, Allahu nuk ka nevojë për urinë dhe etjen e tij.” (Transmeton Buhariu)
Agjërimi synon transformimin e karakterit. Nuk mjafton të heshtë stomaku; duhet të heshtë edhe e keqja në ne. Nuk mjafton të largohemi nga ushqimi; duhet të largohemi nga përçarja, shpifja dhe arroganca.
Ramazani është gjithashtu muaji i Kur’anit. Ky muaj duhet të jetë rikthim serioz te Fjala e Allahut, jo vetëm në lexim, por edhe në reflektim dhe zbatim. Kur’ani e formëson mendjen, e pastron zemrën dhe e drejton veprimin.
Përmes agjërimit, ne mësojmë mirënjohjen për begatitë që shpesh i marrim si të mirëqena, ndiejmë më afër hallet e atyre që janë në nevojë dhe forcojmë përgjegjësinë ndaj njëri-tjetrit. Bujaria, mëshira dhe ndihma ndaj atyre që kanë nevojë janë shprehje konkrete e besimit dhe e agjërimit.
Një mesazh të veçantë kam për besimtarët tanë që jetojnë dhe punojnë jashtë atdheut. Ju jeni ambasadorë të fesë dhe kombit tuaj, të kulturës suaj dhe të vlerave fisnike kudo që jetoni. Përmes sjelljes suaj, integritetit dhe respektit ndaj të tjerëve, ju përfaqësoni bukurinë e Islamit. Prandaj përhapni paqe, mirësi dhe bashkëpunim në shoqëritë ku jetoni, duke forcuar bashkëjetesën dhe respektin e ndërsjellë ndërmjet njerëzve me përkatësi të ndryshme.
Të dashur besimtarë,
Le ta fillojmë këtë Ramazan me vendosmëri për ndryshim të vërtetë. Le ta përdorim këtë muaj për pajtim me Allahun përmes pendimit të sinqertë dhe për pajtim me njëri-tjetrin përmes faljes dhe mirëkuptimit. Le ta bëjmë sinqeritetin themel të çdo veprimi dhe përgjegjësinë kriter të çdo vendimi.
Lusim Allahun e Madhëruar që ky Ramazan të jetë muaj pastrimi të zemrave, forcimi të besimit dhe ngritjeje morale për secilin prej nesh:
– Që zemrat tona të pastrohen nga çdo barrë e panevojshme.
– Që familjet tona të mbushen me qetësi dhe mirëkuptim.
– Që Bashkësia jonë të forcohet në unitet dhe përgjegjësi institucionale.
– Që vendi ynë të begatohet me paqe, drejtësi dhe stabilitet.
Andaj, në prag të fillimit të muajit të bekuar të Ramazanit, kam kënaqësinë dhe nderin që, në emër të Bashkësisë Fetare Islame të Republikës së Maqedonisë së Veriut dhe të gjitha institucioneve të saj, si dhe në emrin tim personal, t’ju uroj nga zemra besimtarëve tanë në vendlindje dhe në mërgim një Ramazan të begatë, agjërim të lehtë dhe të pranuar, si dhe një muaj që do të lërë gjurmë të thella në shpirtin, karakterin dhe jetën tonë, duke na afruar më shumë me Allahun dhe duke na bashkuar më fort në mirësi, drejtësi dhe përgjegjësi.
Për hajr na qoftë ardhja e muajit të Ramazanit.
Allahu ju bekoftë.” thuhet në urrimin e krehut të BFI-së, Shaqir Fetahu.
Lajme nga vendi
Pas shkumës së bardhë në lumin Vardar, analizat paraprake brenda normave, priten rezultatet përfundimtare
Shkuma e bardhë u shfaq më 24 korrik, ndërsa Inspektorati Shtetëror për Mjedisin Jetësor, në koordinim me institucionet kompetente, ndërmori inspektime të jashtëzakonshme në terren dhe analiza laboratorike për të përcaktuar shkakun e rastit.
Sipas Inspektoratit, gjatë kontrolleve të kryera te subjektet industriale në zonën që janë nën kompetencë shtetërore nuk janë konstatuar parregullsi ligjore. Autoritetet bëjnë të ditur se subjektet kanë vepruar në përputhje me kushtet e përcaktuara në lejet ekologjike për menaxhimin e ujërave të ndotura.
Institucioni thekson se cilësia e ujit në këtë pjesë të Vardarit ndikohet nga faktorë të shumtë, përfshirë ujërat komunale dhe atmosferike, si dhe aktiviteti i një numri të madh subjektesh afariste në zonën përreth, prandaj të gjitha institucionet kompetente po veprojnë në mënyrë të koordinuar.
Raporti paraprak i Ndërmarrjes Publike “Ujësjellësi dhe Kanalizimi” – Shkup, i dorëzuar më 29 korrik në Ministrinë e Mjedisit Jetësor dhe Planifikimit Hapësinor, konstaton se parametrat fiziko-kimikë të analizuar nuk i tejkalojnë vlerat kufitare të lejuara.
Njëkohësisht, me kërkesë të Inspektoratit Shtetëror për Mjedisin Jetësor, mostra janë analizuar edhe nga një laborator i akredituar. Raporti përfundimtar pritet t’i dorëzohet Inspektoratit dhe Ministrisë më 4 gusht, pas së cilës institucionet kanë paralajmëruar se do ta informojnë opinionin për rezultatet përfundimtare.
Inspektorati Shtetëror për Mjedisin Jetësor bëri të ditur se do të vazhdojë me inspektime të rregullta dhe të jashtëzakonshme për të siguruar mbrojtjen e mjedisit jetësor dhe shëndetit të qytetarëve.
Ndryshe, në lumin Lepenc, i cili e furnizon Lumin Vardar, u shfaq një vëllim i madh i shkumës së bardhë në rrjedhjen e tij në Shkup. Shkuma u raportua si ndotje e madhe e lumit, lum i cili në Karposh bashkohet me Vardarin. Rasti ishte raportuar në orën 14:10./portalb.mk/
Një fëmijë dyvjeçar nga Kumanova është helmuar pasi ka konsumuar një mjet për tretjen e ngjyrës, njofton Ministria e Punëve të Brendshme.
Sipas policisë, rasti është raportuar dje rreth orës 14:00, kur Spitali i Përgjithshëm i Kumanovës ka njoftuar SPB Kumanovë se tek ta ishte sjellë për trajtim një fëmijë dyvjeçar nga Kumanova me shenja helmimi.
Pas marrjes së ndihmës së parë mjekësore, fëmija është transferuar në Kompleksin e Klinikave “Nëna Terezë” në Shkup për trajtim të mëtejshëm.
Nga SPB Kumanovë bëjnë të ditur se po ndërmerren masa për zbardhjen e plotë të rrethanave të rastit.
Ky nuk është rasti i parë i helmimit të fëmijëve në rajonin e Kumanovës. Gjatë vitit të kaluar u regjistruan disa raste të ngjashme, ku fëmijë të moshave të ndryshme u helmuan pasi konsumuan mjete për pastrim, dezinfektues ose tableta të lëna në vende të arritshme për ta.
Autoritetet shëndetësore dhe institucionet kompetente apelojnë që produktet kimike, barnat dhe substancat e rrezikshme të ruhen gjithmonë jashtë mundësisë së fëmijëve, për të parandaluar raste të tilla.
Gjatë muajit korrik, mesatarisht janë regjistruar rreth 15 zjarre në hapësira të hapura në ditë. Falë ndërhyrjeve të shpejta të zjarrfikësve dhe mbështetjes nga mjetet ajrore të Drejtorisë për Mbrojtje dhe Shpëtim (DMSH), të gjitha zjarret janë vënë me sukses nën kontroll dhe janë shuar. Reshjet e shiut gjatë periudhës së kaluar ndikuan në uljen e numrit të zjarreve dhe ngadalësuan përhapjen e tyre, njoftojnë nga DMSH-ja. Megjithatë, periudha me reshje ka përfunduar. Mjafton vetëm një shkëndijë! – thonë autoritetet.
Zjarri në Leshnicë të Tetovës është lokalizuar –thuhet në njoftimin në Facebook të Komandantit të Zjarrfikësve të Tetovës, Avni Ameti, I cili thotë se në koordinim të plotë me të gjitha institucionet përgjegjëse, në terren intervenuan dy avionë të Drejtorisë për Mbrojtje dhe Shpëtim, si dhe ekipet e zjarrfikësve të Tetovës, të cilat punuan pa ndërprerje dhe me përkushtim maksimal.
“U bëj apel të gjithë qytetarëve që gjatë ditëve në vijim të tregojnë kujdes maksimal, të mos ndezin zjarr në ambiente të hapura dhe të raportojnë menjëherë çdo tym apo vatër zjarri në numrin emergjent 112” – thotë Avni Ameti.
Por, jo vetëm kaq!
Sipas tij, pas çdo zjarri që shuhet, fshihet një histori sakrifice, guximi dhe përkushtimi.
Zjarrfikësit përballen çdo ditë me rrezikun për të mbrojtur jetën, familjet dhe pronën e qytetarëve. Nuk është thjesht një profesion – është një mision që kërkon zemër, disiplinë dhe vendosmëri.
Shumica e zjarreve shkaktohen pa qëllim. Qytetarët zakonisht nuk synojnë të shkaktojnë zjarr, por një pakujdesi e vetme mund të ketë pasoja të rënda.
Prandaj bëhet thirrje që të mos hidhen bishta cigaresh në hapësira të hapura, veçanërisht nga automjetet në lëvizje.
-Mos ndizni zjarr apo skara në pyje dhe në vende me bimësi të thatë.
-Pastroni barin e tharë dhe shkurret rreth shtëpive dhe uikend-shtëpizave -dhe krijoni një brez mbrojtës.
-Mos digjni kashtën dhe kullotat. –
-Tregoni kujdes gjatë përdorimit të veglave që krijojnë shkëndija, si gurët prerës dhe aparatet e saldimit.
-Fermerët të jenë të kujdesshëm gjatë përdorimit të pajisjeve për largimin e shpendëve, të cilat mund të shkaktojnë zjarr.
U bëhet thirrje qytetarëve që çdo sjellje të dyshimtë ta raportojnë menjëherë në stacionin më të afërt policor ose në numrin 112.
Raportoni persona që mbajnë lëndë të dyshimta të lëngshme, pishtarë, fishekzjarre të mëdha ose mjete e aktivitete të tjera që mund të shkaktojnë zjarr.
Në kushtet e temperaturave jashtëzakonisht të larta kërkohet kujdes maksimal.
Një shkëndijë mund të shkaktojë një tragjedi të madhe!” – apelojnë nga Drejtoria për Mbrojtje dhe Shpëtim./Tv Koha/
Pas shkumës së bardhë në lumin Vardar, analizat paraprake brenda normave, priten rezultatet përfundimtare
Dyvjeçar nga Kumanova helmohet me tretës ngjyre, dërgohet në Klinikën “Nëna Terezë”
KUJDES MAKSIMAL NGA ZJARRET: NJË SHKËNDIJË MUND TË SHKAKTOJË TRAGJEDI!
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Azizi zbulon dyfytyrësinë e Ali Ahmetit: Ja vazali që e mbronte Gruevskin
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
