Numri i fëmijëve me ngecje në zhvillim është në rritje, alarmojnë defektologët. Sipas tyre, është me rëndësi të madhe që prindërit të detektojnë në kohë zhvillimin e fëmijëve të tyre, që masat të jenë sa më të lehta për trajtimin e tyre.

Me rëndësi të madhe është që shteti të kontribuojë më shumë për këtë kategori të ndjeshme që t’ua lehtësojë jetën prindërve dhe fëmijëve që kanë probleme shëndetësore.

Defektologia Shpresa Rashiti thekson se ka shumë faktorë që e shkaktojnë ngecjen e zhvillimit të fëmijëve, siç janë faktorët biologjikë apo gjenetikë, faktorët socialë apo faktorët mjedisorë.

“Fëmijët nga moshat e hershme mund të vërehen se a e kanë zhvillimin në mënyrë të duhur apo jo. P.sh. gugatjet, kontakti me sy, luajtja me fëmijët në moshat e hershme, thirrja në emër, nëse nuk kthehet një fëmijë në emër p.sh., nëse nuk e ka vështrimin me sy, nëse nuk vështron me sy dhe nuk kthen përgjigje tek prindërit, kjo është një prej simptomave që tregon që një fëmijë nuk është me zhvillimin ashtu siç duhet.”, – deklaroi defektologia, Shpresa Rashiti.

Sipas saj, se në rrethana kur numri i fëmijëve me ngecje në zhvillim po rritet, duhet të bëhet subvencionimi i ilaçeve.

Advertisement

“Natyrisht se shteti duhet të kontribuojë më tepër, t’u ndihmojë prindërve që kanë fëmijë me nevoja të veçanta, duhet t’i përkrahë në çdo aspekt, duhet të bëhet subvencionimi i ilaçeve, duhet të bëhet edhe subvencionimi i tretmanëve individualë, shkaku se numri i fëmijëve po rritet dhe kërkesat janë më të shumta edhe për qendra për fëmijë, d.m.th. ekipe multidisiplinare për trajtimin e fëmijëve që përfshihen dhe janë të shumta, prandaj duhet që edhe institucionet të angazhohen më tepër, edhe Ministria e Shëndetësisë.”, – deklaroi defektologia, Shpresa Rashiti.

Ilaçet për fëmijët me nevoja të veçanta, Aliu: Angazhohemi që t’i fusim në listën pozitive

Ministri i Shëndetësisë, Azir Aliu, informoi se po bëjnë përpjekje që të fusin në listën pozitive ilaçet me të cilët trajtohen fëmijët me nevoja të veçanta.

“Të vetëdijshëm jemi që edhe për kategorinë e fëmijëve me sëmundje të rralla, edhe për kategorinë e fëmijëve të cilët kanë nevojë për një trajtim më intensiv, që barnat tani për tani janë në një nivel të rëndë të kapshëm financiar nga familjet. Për atë shkak punojmë paralelisht edhe me ato, edhe me kompanitë që na furnizojnë me këto barna, që të munden çmimet të jenë më të kapshme. Nga ana tjetër, paralelisht punon grupi punues që një pjesë e këtyre barnave të futet në listën pozitive.”, – theksoi ministri i Shëndetësisë, Azir Aliu.

Defektologët rekomandojnë për kujdes të veçantë që në periudhën e shtatzënisë. Po ashtu fëmijët duhet t’i ushqejmë shëndetshëm, si dhe të merremi më shumë me ta, në mënyrë që të kemi breza më të shëndetshëm dhe pa probleme në të ardhmen.

Advertisement