Lajme nga vendi
ANSAMBLI I TETOVËS DREJT SHKRIRJES, ARTISTËT PENG TË PREMTIMEVE
Në planin strategjik 2026-2030 të Ministrisë së Kulturës, për ansamblin muzikor në Tetovë parashihet një “racionalizim” i institucionit, që mund të çojë në mbylljen ose bashkimin e tij me institucione të tjera, me arsyetimin se ka kapacitete të kufizuara.Blerim Qamili drejtor i ansamblit muzikor në Tetovë thotë se ata do kundërshtojnë këtë plan strategjik dhe se kjo është një goditje direkte ndaj muzikës shqipe.
“Plani strategjik, sipas asaj që kam lexuar në draft, por edhe sipas një komunikimi telefonik që pata me Ministrin. Plani strategjik përfshin fuzionimin e institucioneve. Fuzionimi i institucioneve nënkupton që ansambli do të funksionojë nën kompetencat, më duket, të Pallatit të Kulturës, ashtu siç e kuptova unë. Edhe disa institucione të tjera do të fuzionohen, por për ansamblin muzikor kjo mendoj se nuk është e përshtatshme dhe nuk ia ul vlerën ansamblit. Është mendim personal dhe është qëndrimi i ansamblit muzikor. Për këtë gjë është kërkuar edhe një mendim, të cilin ne po personalisht unë me kolegët po e përgatisim me kujdes për ta kundërshtuar.”
Sipas Qamilit artistëve që punojnë tani më me kontrata në Ansamblin Muzikor të Tetovës u është premtuar punësime nga përfaqësuesit shqiptarë në Ministrinë e Kulturës, por deri tani nuk është përmbushur asgjë.
“ Ka gati është më se e treta, e dyta herë që unë, si drejtor i ri i këtij ansambli, kërkoj punësimet dhe nuk më është dhënë përgjigje në asnjë mënyrë, as a do të realizohen, as a nuk do të realizohen këto punësime dhe arsyeja pse. Ka qenë, gjatë gjithë kohës ka qenë e paqartë. Kolegët, të cilët ne bashkëpunojmë me kontrata të shkurtra, siç e dini edhe ju, reaguan mbi këtë draft sepse ata presin punësimet. Të jemi edhe të sinqertë deri në fund, ne kemi premtuar punësime sepse ashtu na është thënë, dhe ata reaguan, iu drejtuan mua. Unë, në një moment të caktuar, në momentin që ishte postuar ai draft-plan, unë kam qenë totalisht i painformuar rreth zhvillimeve dhe planeve strategjike për këtë çështje. Shihni, premtimet kanë ardhur nga Ministria, si përgjegjësit ose përfaqësuesit tanë atje, të cilët disa herë na kanë premtuar se këto punësime do të realizohen.”
Funksionimi i Ansamblit Muzikor të Tetovës nuk rrezikohet nga fuzionimi i mundshëm me ndonjë institucion tjetër, tha ditë më parë Kryetari i Komunës së Tetovës Bilall Kasami duke shtuar se fokusi kryesor duhet të jetë në punësimin e kuadrove të reja në këtë institucion. Kasami vlerëson se nuk është në pyetje vetëm Ansambli Muzikor i Tetovës kur flitet për fuzionim institucionesh por edhe shumë institucione të tjera nën umbrellën e Ministrisë së Kulturës ndërsa e gjitha kjo sipas tij, bëhet në të mirë të kulturës dhe qytetarëve.
Në këtë institucion për momentin janë vetëm dy të punësuar dhe drejtori. Ndërsa kërkesa është bërë fillimisht për 24 të punësuar. Nga gjithsej rreth 60 sa duhet, duke përfshi rreth 15 administratorë dhe staf teknik dhe rrethë 45 artistë.
Lajme nga vendi
Pas shkumës së bardhë në lumin Vardar, analizat paraprake brenda normave, priten rezultatet përfundimtare
Shkuma e bardhë u shfaq më 24 korrik, ndërsa Inspektorati Shtetëror për Mjedisin Jetësor, në koordinim me institucionet kompetente, ndërmori inspektime të jashtëzakonshme në terren dhe analiza laboratorike për të përcaktuar shkakun e rastit.
Sipas Inspektoratit, gjatë kontrolleve të kryera te subjektet industriale në zonën që janë nën kompetencë shtetërore nuk janë konstatuar parregullsi ligjore. Autoritetet bëjnë të ditur se subjektet kanë vepruar në përputhje me kushtet e përcaktuara në lejet ekologjike për menaxhimin e ujërave të ndotura.
Institucioni thekson se cilësia e ujit në këtë pjesë të Vardarit ndikohet nga faktorë të shumtë, përfshirë ujërat komunale dhe atmosferike, si dhe aktiviteti i një numri të madh subjektesh afariste në zonën përreth, prandaj të gjitha institucionet kompetente po veprojnë në mënyrë të koordinuar.
Raporti paraprak i Ndërmarrjes Publike “Ujësjellësi dhe Kanalizimi” – Shkup, i dorëzuar më 29 korrik në Ministrinë e Mjedisit Jetësor dhe Planifikimit Hapësinor, konstaton se parametrat fiziko-kimikë të analizuar nuk i tejkalojnë vlerat kufitare të lejuara.
Njëkohësisht, me kërkesë të Inspektoratit Shtetëror për Mjedisin Jetësor, mostra janë analizuar edhe nga një laborator i akredituar. Raporti përfundimtar pritet t’i dorëzohet Inspektoratit dhe Ministrisë më 4 gusht, pas së cilës institucionet kanë paralajmëruar se do ta informojnë opinionin për rezultatet përfundimtare.
Inspektorati Shtetëror për Mjedisin Jetësor bëri të ditur se do të vazhdojë me inspektime të rregullta dhe të jashtëzakonshme për të siguruar mbrojtjen e mjedisit jetësor dhe shëndetit të qytetarëve.
Ndryshe, në lumin Lepenc, i cili e furnizon Lumin Vardar, u shfaq një vëllim i madh i shkumës së bardhë në rrjedhjen e tij në Shkup. Shkuma u raportua si ndotje e madhe e lumit, lum i cili në Karposh bashkohet me Vardarin. Rasti ishte raportuar në orën 14:10./portalb.mk/
Një fëmijë dyvjeçar nga Kumanova është helmuar pasi ka konsumuar një mjet për tretjen e ngjyrës, njofton Ministria e Punëve të Brendshme.
Sipas policisë, rasti është raportuar dje rreth orës 14:00, kur Spitali i Përgjithshëm i Kumanovës ka njoftuar SPB Kumanovë se tek ta ishte sjellë për trajtim një fëmijë dyvjeçar nga Kumanova me shenja helmimi.
Pas marrjes së ndihmës së parë mjekësore, fëmija është transferuar në Kompleksin e Klinikave “Nëna Terezë” në Shkup për trajtim të mëtejshëm.
Nga SPB Kumanovë bëjnë të ditur se po ndërmerren masa për zbardhjen e plotë të rrethanave të rastit.
Ky nuk është rasti i parë i helmimit të fëmijëve në rajonin e Kumanovës. Gjatë vitit të kaluar u regjistruan disa raste të ngjashme, ku fëmijë të moshave të ndryshme u helmuan pasi konsumuan mjete për pastrim, dezinfektues ose tableta të lëna në vende të arritshme për ta.
Autoritetet shëndetësore dhe institucionet kompetente apelojnë që produktet kimike, barnat dhe substancat e rrezikshme të ruhen gjithmonë jashtë mundësisë së fëmijëve, për të parandaluar raste të tilla.
Gjatë muajit korrik, mesatarisht janë regjistruar rreth 15 zjarre në hapësira të hapura në ditë. Falë ndërhyrjeve të shpejta të zjarrfikësve dhe mbështetjes nga mjetet ajrore të Drejtorisë për Mbrojtje dhe Shpëtim (DMSH), të gjitha zjarret janë vënë me sukses nën kontroll dhe janë shuar. Reshjet e shiut gjatë periudhës së kaluar ndikuan në uljen e numrit të zjarreve dhe ngadalësuan përhapjen e tyre, njoftojnë nga DMSH-ja. Megjithatë, periudha me reshje ka përfunduar. Mjafton vetëm një shkëndijë! – thonë autoritetet.
Zjarri në Leshnicë të Tetovës është lokalizuar –thuhet në njoftimin në Facebook të Komandantit të Zjarrfikësve të Tetovës, Avni Ameti, I cili thotë se në koordinim të plotë me të gjitha institucionet përgjegjëse, në terren intervenuan dy avionë të Drejtorisë për Mbrojtje dhe Shpëtim, si dhe ekipet e zjarrfikësve të Tetovës, të cilat punuan pa ndërprerje dhe me përkushtim maksimal.
“U bëj apel të gjithë qytetarëve që gjatë ditëve në vijim të tregojnë kujdes maksimal, të mos ndezin zjarr në ambiente të hapura dhe të raportojnë menjëherë çdo tym apo vatër zjarri në numrin emergjent 112” – thotë Avni Ameti.
Por, jo vetëm kaq!
Sipas tij, pas çdo zjarri që shuhet, fshihet një histori sakrifice, guximi dhe përkushtimi.
Zjarrfikësit përballen çdo ditë me rrezikun për të mbrojtur jetën, familjet dhe pronën e qytetarëve. Nuk është thjesht një profesion – është një mision që kërkon zemër, disiplinë dhe vendosmëri.
Shumica e zjarreve shkaktohen pa qëllim. Qytetarët zakonisht nuk synojnë të shkaktojnë zjarr, por një pakujdesi e vetme mund të ketë pasoja të rënda.
Prandaj bëhet thirrje që të mos hidhen bishta cigaresh në hapësira të hapura, veçanërisht nga automjetet në lëvizje.
-Mos ndizni zjarr apo skara në pyje dhe në vende me bimësi të thatë.
-Pastroni barin e tharë dhe shkurret rreth shtëpive dhe uikend-shtëpizave -dhe krijoni një brez mbrojtës.
-Mos digjni kashtën dhe kullotat. –
-Tregoni kujdes gjatë përdorimit të veglave që krijojnë shkëndija, si gurët prerës dhe aparatet e saldimit.
-Fermerët të jenë të kujdesshëm gjatë përdorimit të pajisjeve për largimin e shpendëve, të cilat mund të shkaktojnë zjarr.
U bëhet thirrje qytetarëve që çdo sjellje të dyshimtë ta raportojnë menjëherë në stacionin më të afërt policor ose në numrin 112.
Raportoni persona që mbajnë lëndë të dyshimta të lëngshme, pishtarë, fishekzjarre të mëdha ose mjete e aktivitete të tjera që mund të shkaktojnë zjarr.
Në kushtet e temperaturave jashtëzakonisht të larta kërkohet kujdes maksimal.
Një shkëndijë mund të shkaktojë një tragjedi të madhe!” – apelojnë nga Drejtoria për Mbrojtje dhe Shpëtim./Tv Koha/
Pas shkumës së bardhë në lumin Vardar, analizat paraprake brenda normave, priten rezultatet përfundimtare
Dyvjeçar nga Kumanova helmohet me tretës ngjyre, dërgohet në Klinikën “Nëna Terezë”
KUJDES MAKSIMAL NGA ZJARRET: NJË SHKËNDIJË MUND TË SHKAKTOJË TRAGJEDI!
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Azizi zbulon dyfytyrësinë e Ali Ahmetit: Ja vazali që e mbronte Gruevskin
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
