Aleanca për Shqiptarët kundërshton ashpër projektligjit për lojërat e fatit, i cili, në vend që të mbrojë qytetarët, i lejon industrisë së bixhozit të vazhdojë të ushtrojë ndikim shkatërrues mbi familjet, të rinjtë dhe fëmijët tanë.

Ne vlerësojmë se industria e lojërave të fatit nxit varësi, shkakton kolaps ekonomik në familje, rëndon sistemin shëndetësor dhe atë të mbrojtjes sociale, si dhe rrit problemet sociale që kërcënojnë stabilitetin e komuniteteve tona. Statistikat dhe përvojat familjare në terren tregojnë qartë pasojat e rënda që kjo industri sjell me vete.

Propozimi i VLEN-it që parashikon distancë prej 500 metrash midis kazinove dhe shkollave nuk mjafton. Kjo masë është vetëm një fasadë që e legalizon dhe i jep leje funksionimi një industrie që vazhdon të prodhojë varësi dhe shkatërrim. Aleanca për Shqiptarët kërkon mbylljen e plotë të veprimtarisë së lojërave të fatit në Republikën e Maqedonisë së Veriut, si hap i domosdoshëm për mbrojtjen e fëmijëve, të rinjve dhe familjeve.

Ne i bëjmë thirrje deputetëve që të dëgjojnë zërin e qytetarëve dhe familjeve të prekura, të heqin dorë nga çdo zgjidhje që legalizon bixhozin, dhe të miratojnë masa të qarta dhe të guximshme për parandalimin e varësisë, mbështetjen e familjeve dhe përforcimin e sistemeve shëndetësore dhe sociale. Aleanca për Shqiptarët do të vazhdojë të luftojë kundër çdo politike që rrezikon mirëqenien e qytetarëve tanë.

Kryeministri Hristijan Mickoski në konferencën e sotme për media deklaroi se nuk ka ndërmend të kandidojë për president të shtetit në zgjedhjet e vitit 2029 dhe se, pas përfundimit të mandatit si kryeministër, do t’i rikthehet punës në fakultet.

Deklaratën e bëri në kontekst të diskutimeve për Kodin e ri Zgjedhor, duke thënë se po përhapen spekulime se propozimi i VMRO-DPMNE-së që diaspora të votojë në mënyrë elektronike lidhej me një kandidaturë të tij të mundshme për president.

HRISTIJAN MICKOSKI – Kryeministër

“Ja, t’ua lehtësoj punën – nuk do të kandidoj. Kur të më përfundojë mandati si kryetar i Qeverisë, do të kthehem në fakultet, mes studentëve. Nuk kam një ambicie apo dëshirë të tillë. Vetëm le ta mundësojnë që diaspora ta ushtrojë të drejtën e saj të votës në mënyrë elektronike, duke filluar nga zgjedhjet e ardhshme presidenciale”

Gjatë prononcimit, Kryeministri Mickoski deklaroi se tashmë I ka marrë propozimet e VLEN-it dhe partisë ZNAM për ministrat e rinj në Qeverinë e riformatuar dhe se këto propozime, sipas tij, janë në rregull dhe pret punë më të suksesshme të përbërjes së re qeveritare.

Advertisement

Ai nuk I bëri publike emrat, duke pohuar se këtë duhet ta bëjnë VLEN dhe ZNAM.

Institucioni Publik Parku Kombëtar Mali Sharr, me një ceremoni solemne të organizuar në lokalitetin Leshnicë, shënoi pesëvjetorin e shpalljes së Malit Sharr Park Kombëtar. Nga institucioni theksojnë se shpallja ishte një akt historik, me të cilin u plotësua pjesa e fundit e mozaikut të zonave të mbrojtura dhe Ballkani fitoi një nga zonat më të mëdha ndërkufitare të mbrojtura, me një sipërfaqe prej afro 240.000 hektarësh natyrë të pandërprerë, të përbashkët për Maqedoninë e Veriut, Kosovën dhe Shqipërinë.

Parku Kombëtar Mali Sharr administron pothuajse të gjithë masivin e Sharrit, nga Jazhinca deri në Duf, një territor që përbën strehë për biodiversitet të jashtëzakonshëm, dhjetëra liqene akullnajore, kullota malore, pyje dhe shumë vendbanime që prej shekujsh jetojnë në harmoni me natyrën.

Me rastin e jubileut u organizua një ecje malore nga Bozovca deri në Leshnicë, ku pjesëmarrësit patën mundësinë të përjetojnë nga afër bukuritë natyrore të Malit Sharr. Përmes prezantimeve të rojtarëve të zonës së mbrojtur dhe vullnetarëve udhërrëfyes, ata u njohën me pasurinë e biodiversitetit, vlerat natyrore dhe aktivitetet që zhvillon institucioni.

Një nga rezultatet më të rëndësishme është edhe regjistrimi i rrëqebullit të parë nga vetë institucioni, pikërisht në Luginën e Leshnicës, duke konfirmuar se kjo zonë vazhdon të jetë një strehë e sigurt për disa nga kafshët e egra më të rralla dhe më të rëndësishme të Ballkanit.

Edhe pse Parku Kombëtar Mali Sharr është një nga institucionet më të reja të këtij lloji në vend, ambicia e tij mbetet e qartë: përmes menaxhimit modern, mbrojtjes së bazuar në shkencë, partneritetit me komunitetet lokale dhe zhvillimit të turizmit të qëndrueshëm, Mali Sharr të shndërrohet në një nga destinacionet natyrore më të njohura dhe më të vizituara në Evropë./Tv Koha/

Advertisement