Lajme nga vendi
25 vjet nga Marrëveshja e Ohrit/ Shkupi bëhet qendër e diskutimeve për bashkëjetesën, dialogun dhe rrugën drejt BE-së
Më 12 dhe 13 gusht, në Shkup do të shënohet 25-vjetori i nënshkrimit të Marrëveshjes Kornizë të Ohrit, përmes një manifestimi dyditor me pjesëmarrjen e personaliteteve të njohura nga Maqedonia e Veriut dhe nga rajoni.
Nën moton 25 dhe përtej, me një seri panelesh diskutimi, debateve dhe aktiviteteve kulturore do të shënojnë këtë përvjetor të rëndësishëm, duke rikthyer në fokus rëndësinë e Marrëveshjes Kornizë të Ohrit, proceset që pasuan nënshkrimin e saj, avancimin e marrëdhënieve ndëretnike dhe rrugën e vendit drejt integrimit evropian.
Manifestimi organizohet nën patronatin e Ministrisë për Marrëdhënie Ndërmjet Bashkësive dhe ministrit Agon Ferati, me synimin që 25-vjetori i Marrëveshjes së Ohrit të shërbejë jo vetëm si moment përkujtimi, por edhe si hapësirë për reflektim, debat dhe përcaktim të vizionit për të ardhmen.
Programi do të fillojë më 12 Gusht, kur përmes disa paneleve tematike do të mblidhen personalitete nga sfera të ndryshme.
Për më shumë se pesë orë, pjesëmarrësit do të diskutojnë tema që lidhen drejtpërdrejt me Marrëveshjen Kornizë të Ohrit, rëndësinë e saj për zhvillimin e shtetit dhe shoqërisë, marrëdhëniet ndërmjet komuniteteve, përvojat e 25 viteve të fundit, si dhe sfidat dhe mundësitë që e presin vendin në procesin e integrimit evropian.
Në fokus do të jenë edhe pyetjet se çfarë ka ndryshuar gjatë këtyre 25 viteve, cilat janë rezultatet e arritura, cilat sfida kanë mbetur ende për t’u adresuar dhe si mund të ndërtohet një shoqëri edhe më gjithëpërfshirëse, demokratike dhe evropiane.
Në panelet e diskutimit pritet të marrin pjesë figura të njohura publike, politike, akademike dhe shoqërore nga Maqedonia e Veriut dhe rajoni, duke krijuar një platformë rajonale për shkëmbimin e ideve dhe përvojave.
Një nga shtyllat kryesore të manifestimit do të jetë ndërlidhja mes përvojës, arritjeve dhe praktikave të 25 viteve të kaluara dhe vizionit për të ardhmen – me fokus në atë se si do të duken 25 vitet e ardhshme të Marrëveshjes së Ohrit dhe si do të ndërthuret ky vizion me rrugëtimin e Maqedonisë së Veriut drejt Bashkimit Evropian.
Diskutimet do të trajtojnë rëndësinë e dialogut, respektimit të të drejtave të komuniteteve, institucioneve demokratike, sundimit të ligjit dhe përfshirjes së të gjithë qytetarëve në proceset shtetërore si pjesë e vizionit evropian të vendit.
Organizatorët synojnë që përvjetori të mos mbetet vetëm një ngjarje simbolike, por të shndërrohet në një mundësi për të hapur diskutime konkrete mbi të ardhmen e vendit dhe mbi mënyrën se si përvoja e 25 viteve mund të shërbejë si bazë për një kapitull të ri.
Programi do të vazhdojë me manifestimin qendror, më 13 Gusht, me një ngjarje të veçantë në mbrëmje, e cila do të zhvillohet në sheshin kryesor të Shkupit, pranë Urës së Gurit.
Mbrëmja do të përfshijë koncert recital, ndërsa para publikut do të mbajnë fjalime edhe personalitete të larta shtetërore.
Kështu, dy ditët e manifestimit do të ndërthurin diskutimin politik dhe institucional me kulturën, duke i dhënë përvjetorit një dimension më të gjerë dhe duke e sjellë atë edhe më pranë qytetarëve.
25-vjetori i Marrëveshjes Kornizë të Ohrit vjen si një moment për të reflektuar mbi një prej marrëveshjeve më të rëndësishme në historinë e re politike të Maqedonisë së Veriut.
Manifestimi i 12 dhe 13
Gushtit synon të sjellë në një hapësirë të përbashkët zëra të ndryshëm nga rajoni, për të diskutuar të kaluarën, për të analizuar të tashmen dhe, mbi të gjitha, për të folur për të ardhmen.
Nga Marrëveshja e Ohrit te perspektiva evropiane – dy ditë diskutime, ide, kulturë dhe mesazhe për një shoqëri më gjithëpërfshirëse dhe një të ardhme të përbashkët evropiane.
Nisma, nën patronatin e Ministrisë për Marrëdhënie Ndërmjet Bashkësive dhe ministrit Agon Ferati, synon që 25-vjetori të shënohet si një moment i rëndësishëm i dialogut dhe reflektimit, por edhe si një mesazh se proceset e nisura 25 vite më parë duhet të vazhdojnë të ndërtohen përmes bashkëpunimit, dialogut dhe orientimit të qartë evropian.
BDI sot u përpoq përsëri të ndërtojë një aferë ku ka investime të raportuara publikisht, të ligjshme dhe plotësisht të verifikueshme. Nga të dhënat që vetë Nedim Rama i ka paraqitur në KSHPK, partia që ka krijuar perandori biznesi familjar për dy dekada ka përpiluar një deklaratë me shumë pyetje, por pa asnjë provë.
Prandaj, së pari faktet:
Investimet në aksione janë bërë disa herë vitet e fundit, dhe vlera totale e raportuar e portofolit të tij është rreth 30.000 euro.
Fakti që Nedim Rama personalisht në një dokument zyrtar dhe publik në të cilin çdo qytetar ka qasje, konform me ligjin, ka paraqitur të gjitha aktivitetet e tij financiare dhe jofinanciare, paraqet mohim të drejtpërdrejtë të aludimeve të BDI-së.
Tregtimi i aksioneve në “Mercedes” ose kompani të tjera të tilla si “Novo Nordisk” dhe “SOFI Technologies”, është një aktivitet plotësisht i ligjshëm, i lejuar në përputhje me rregulloret në fuqi në vend. Sidomos kur bëhet fjalë për tregtimin e një numri të vogël aksionesh. Përveç kësaj, fitime kapitale u realizuan nga tregtimi i aksioneve, të cilat u raportuan në mënyrë transparente dhe për të cilat iu pagua taksë shtetit.
Është një manipulim i madh të paraqiten pasuritë e deklaruara publikisht si “të zbuluara” ose si kapital i fshehur.
BDI nuk paraqiti asnjë provë se një denar i vetëm është përdorur për aksionet nga “NOMAGAS”, nga buxheti i shtetit, nga një tender publik ose nga një burim i paligjshëm, sepse ata vetë e dinë se kjo nuk është e vërtetë.
Ata paraqitën vetëm të dhëna që vetë Nedim Rama ia dorëzoi KSHPK-së, publikisht dhe në mënyrë transparente.
VLEN nuk ka problem me verifikimin nga asnjë institucion kompetent. Çdo investim, pagesë dhe transaksion mund të verifikohet. Në fund të fundit, pikërisht për këtë arsye ato raportohen publikisht në KSHPK.
Këto janë faktet. Dhe meqenëse BDI tashmë dëshiron të luajë rolin e një hetuesi financiar, le të përgjigjet:
Nga erdhën qindra miliona euro në prona dhe biznese me të cilat është e lidhur familja e Ali Ahmetit, vetëm në territorin e Shkupit?
Si lulëzoi biznesi i vëllait të Bujar Osmanit, ndërsa Osmani mbante disa nga pozicionet më të larta shtetërore dhe çfarë ndodhi me atë biznes?
Cilat lidhje shtetërore dhe institucionale hapën dyert për bizneset dhe angazhimet e vëllait të Arbër Ademit?
Si u bënë saktësisht familjet në krye të BDI-së, pas më shumë se dy dekadash në pushtet, pronarë të kompanive, qendrave të biznesit, pasurive të paluajtshme, koncesioneve dhe bizneseve miliona dollarëshe?
Këto janë pyetjet nga të cilat BDI po ikën. Këto janë milionat që BDI nuk dëshiron kurrë t’u përgjigjet.
Në vend të përgjigjeve, partia nën sundimin e së cilës u rritën perandoritë e biznesit familjar, sot po përpiqet të prodhojë një “mashtrim” nga të dhënat që vetë Nedim Rama ua dorëzoi institucioneve dhe që janë publikuar publikisht në faqen e internetit të KSHPK-së.
Kjo është ikje në panik nga milionat e tyre.
Nedim Rama ka deklaruar pasuritë e tij. BDI po fshihet pas deklaratave të përbëra nga pyetësorë.
Çështja e qindra miliona eurove për të cilat BDI hesht dhe që po fshihet pas emrave të fëmijëve dhe vëllezërve të zyrtarëve të saj më të lartë është dhe do të mbetet një aferë.
Komunikata e VLENi vjen pasi sot Bashkimi Demokratik për Integrim (BDI) ngriti dyshime lidhur me deklaratën e pasurisë së drejtorit të NOMAGAS-it, Nedim Rama, duke kërkuar sqarime për mënyrën se si ai ka financuar blerjen e aksioneve në kompani të huaja, përfshirë gjigantin gjerman “Mercedes-Benz Group AG”, gjatë kohës që ushtronte funksionin e drejtorit të ndërmarrjes shtetërore. Në reagimin e saj, BDI thekson se deklarata e pasurisë e Ramës “ka hapur një çështje shumë më serioze sesa ajo që ai tentoi ta mbyllë me dorëzimin e formularit në Antikorrupsion”.
Sipas BDI-së, Rama ka deklaruar aksione në kompani të mëdha të huaja, ndërsa problematike konsiderohet data e fitimit të tyre.
“Sipas vetë deklarimit të tij, këto pjesëmarrje janë fituar më 22 prill 2026, në kohën kur Nedim Rama tashmë ishte në krye të NOMAGAS-it”, thuhet në reagim. Partia opozitare shtron një sërë pyetjesh publike, duke kërkuar transparencë të plotë mbi burimin e mjeteve financiare të përdorura për investimet. përcjell Zhurnal.mk .
Lajme nga vendi
Çështja e emrave të rrugëve në Tetovë drejt zgjidhjes, Albi Qamili: Miratuam edhe 145 emra të rinj!
Çështja shumëvjeçare e emrave të rrugëve në Tetovë po shkon drejt zgjidhjes përfundimtare. Grupi i Punës për Riemërtimin e Rrugëve në Tetovë ka miratuar edhe një listë të re me 145 emra për rrugët dhe sheshet e qytetit.
Në mbledhjen e radhës të Grupit të Punës, të kryesuar nga nënkryetari i Komunës së Tetovës, Albi Qamili, është miratuar edhe Plani i Veprimit dhe dinamika e punës, me qëllim që procesi të përmbyllet sa më shpejt.
“Miratuam një tjetër listë me 145 emra të rinj për rrugët dhe sheshet e Tetovës. Gjithashtu miratuam Planin e Veprimit dhe dinamikën e punës, me qëllim që kjo çështje të finalizohet sa më shpejt”, deklaroi Qamili.
Sipas tij, emrat e rinj reflektojnë realitetin dhe historinë e Tetovës, si dhe bashkësitë etnike që jetojnë në qytet.
Qamili theksoi se puna do të vijojë me përkushtim për zgjidhjen e problemit të emrave të rrugëve, duke paralajmëruar se procesi së shpejti pritet të përmbyllet me një zgjidhje të plotë, gjithëpërfshirëse dhe institucionalisht të qëndrueshme.
“Vazhdojmë punën me përkushtim për zgjidhjen e problemit shumëvjeçar me emrat e rrugëve. Shumë shpejt do ta përmbyllim këtë proces me zgjidhje të plotë, gjithëpërfshirëse dhe institucionalisht të qëndrueshme”, u shpreh Qamili.
Zgjidhja e çështjes së emrave të rrugëve pritet të sjellë edhe një pasqyrim më të plotë të historisë, identitetit dhe realitetit të Tetovës, duke i dhënë fund një prej çështjeve të pazgjidhura prej vitesh në qytet. Emrat jugosllavë, të trashëguar nga qeverisjet e kaluara, përfundimisht shkojnë në histori.(INA)
Lajme nga vendi
Rreth 700 filipinase gjatë këtij viti kanë marrë pasaporta të Maqedonisë përmes ambasadës në Australi
Ndërsa shteti po zbrazet, diaspora e Maqedonisë së Veriut jashtë vendit po bëhet gjithnjë e më e madhe – dhe kjo jo vetëm për shkak të emigrantëve të rinj, por edhe përmes familjeve që ata krijojnë jashtë kufijve tanë.
Si ilustrim, sipas të dhënave jozyrtare, gjatë këtij viti në Australi janë lëshuar rreth 700 pasaporta për filipinase, të cilat kanë lidhur martesë me shtetas të Maqedonisë së Veriut dhe mbi këtë bazë kanë fituar të drejtën për të marrë pasaporta maqedonase. Praktikisht, në zgjedhjet e ardhshme ato do të kenë të drejtë vote në shtetin tonë dhe do të ndikojnë edhe në politikën e brendshme, përcjell Fokus.
Dhe filipinaset janë vetëm një segment i shtetasve të huaj që në këtë mënyrë bëhen pjesë e diasporës së Maqedonisë. Nëpër Shkup dhe qytetet e tjera më të mëdha të vendit, çdo vit mund të vërehen të huaj që flasin gjuhën maqedonase, e që vijnë nga Afrika, nga vendet evropiane, nga Azia apo kontinente të tjera. (INA)
VLEN: BDI, partia që vodhi qindra miliona,po luan rolin e hetuesit
Çështja e emrave të rrugëve në Tetovë drejt zgjidhjes, Albi Qamili: Miratuam edhe 145 emra të rinj!
Rreth 700 filipinase gjatë këtij viti kanë marrë pasaporta të Maqedonisë përmes ambasadës në Australi
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Azizi zbulon dyfytyrësinë e Ali Ahmetit: Ja vazali që e mbronte Gruevskin
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
