Lajme nga vendi
Deri 60 gra në vit preken me kancerin e gjirit

Kanceri i gjirit gjithnjë e më shumë është prezent tek gratë. Krahas kësaj, ajo që është më shqetësuese sipas mjekëve është spostimi i pragut të moshës. Nëse në të kaluarën mosha më e prekur ka qenë ajo 60 vjeçare e më lartë, tashmë kjo sëmundje paraqitet edhe tek moshat më të reja .Kështu thotë Vjollca Skenderi, onkologe në Spitalin Klinik të Tetovës. “Tani për fat të keq kemi edhe paciente që janë në moshën më të re, pra bie kufiri dhe ne nuk i jemi shmangur trendit botëror të rritjes së kancerit të gjirit. Rritje të numrit ka, por në këtë kohë edhe kushtet janë më të mira për trajtimin e kësaj sëmundje. Për sa i përket numrit të grave që diagnostifikohen me kancerin e gjirit nuk mund ta them sepse regjistrimi për këtë lloj sëmundje në vendin tonë nuk funksionon ashtu si duhet. Nga eksperienca gjatë vitit, mund të them se 50 deri 60 gra brenda vitit sëmuren nga kanceri i gjirit në rajonin tonë”, thotë Vjollca Skenderi, onkologe.
Sipas saj, shkaqet për përhapjen e kancerit të gjirit ndikojnë më shumë faktorë, duke përfshirë gjenetikën brenda organizmit, poashtu ndikon përdorimi i terapisë hormonale, kur e ka pasur menopauzën, ndotja e ajrit, stresi e kështu me radhë. Edhe pse metodat e diagnostifikimit kanë avancuar, kjo nuk do të të thotë se në të kaluarën ka pasur më pak raste, pasi që sipas mjekëve është evidente se kjo sëmundje tani më shënon rritje nga viti në vit. Por sa është punuar në rritjen e vetëdijes tek gratë. Sipas mjekëve, gratë duhet që të bëjnë mamografi pavarësisht se kanë apo jo simptoma, edhe atë duke filluar nga mosha 30 vjeçare e tutje.
“Është punuar në ngritjen e vetëdijes së grave për sa i përket sëmundjes së kancerit të gjirit, por jo aq sa duhet, si shtet flas, tek ne ka pacientë që paraqiten dhe e gjejmë sëmundjen në fazë të hershme, por 70 për qind kur vijnë tek ne, sëmundjen e gjejmë në fazë më të avancuar dhe problemi është se duhet që të investohet në ngritjen e vetëdijes për të bërë kontrolle, pra gratë të bëjnë kontrolle edhe kur nuk kanë shenja ose simptoma. Njëherë në vit ata duhet që të ndajnë 20 minuta për të bërë kontrolle dhe nëse diagnostifikohet herë ajo më lehtë shërohet”, deklaroi Vjollca Skenderi, onkologe.
Nga Reparti i onkologjisë apelojnë që në të ardhmen të organizohen kontrolle edhe nëpër vendbanime rurale sepse ka shumë gra të moshuara të cilët e kanë të pamundur që të vijnë deri në qytet për të bërë kontrolle prandaj duhet që të aplikohet edhe mamografia mobile./TV KOHA /
Lajme nga vendi
BE-ja 16 milionë euro për Maqedoninë e Veriut, për reforma dhe projekte infrastrukturore

Bashkimi Evropian ka miratuar lëshimin e dytë të mjeteve për Maqedoninë e Veriut në kuadër të Instrumentit për Reforma dhe Rritje për Ballkanin Perëndimor, në vlerë totale prej 16 milionë eurosh, përcjell TV21. Shuma përfshin grante të pakthyeshme dhe hua, nga të cilat 7,4 milionë euro do të paguhen direkt në buxhetin shtetëror, ndërsa pjesa tjetër do të shfrytëzohet për projekte infrastrukturore përmes Kornizës së Investimeve për Ballkanin Perëndimor (WBIF).
Vendimi vjen pas vlerësimit pozitiv të Komisionit Evropian për reformat e Qeverisë, duke përfshirë progresin në digjitalizim, sigurinë kibernetike, dokumentet elektronike dhe luftën kundër ekonomisë joformale. Për hapat që nuk janë përmbushur plotësisht, Komisioni ka caktuar një periudhë shtesë deri në qershor 2026.
Lajme nga vendi
MPB: Mashtrim i ri në Shkup me “aksident të rremë”, një grua 71-vjeçare humb 36.300 euro

Ministria e Punëve të Brendshme ka njoftuar për një rast të ri mashtrimi në Shkup, ku një grua 71-vjeçare ka humbur 36.300 euro pas një skenari të rremë për një “aksident trafiku”, raporton alfax.mk.
Sipas MPB-së, më 16 tetor 2025, rreth orës 17:20, viktima është kontaktuar telefonikisht nga një person që është prezantuar si zyrtar policor, i cili i ka thënë se vajza e saj kishte shkaktuar një aksident të rëndë dhe se për të shpëtuar jetën e saj duhej të paguheshin para për një operacion urgjent.
Më pas, gruaja është kontaktuar sërish nga një person tjetër që është paraqitur si mjek, i cili i ka dhënë udhëzime se ku t’i dorëzonte paratë. Pas kësaj, ajo ka kuptuar se ishte mashtruar dhe ka njoftuar policinë.
Nga MPB bëjnë të ditur se po ndërmerren masa për zbardhjen e plotë të rastit dhe identifikimin e autorëve të këtij mashtrimi, ndërsa apelojnë te qytetarët që të jenë të kujdesshëm ndaj thirrjeve të tilla telefonike dhe të mos dorëzojnë para pa verifikim zyrtar.
Lajme nga vendi
VLEN dhe AKI mbyllin fushatën në Çair: Mexhiti me vizion zhvillimi, Osmani premton “tërmet ndryshimesh”

Në ditën e fundit të fushatës zgjedhore, kandidatët për kryetar të Komunës së Çairit — Izet Mexhiti nga koalicioni VLEN dhe Bujar Osmani nga Aleanca Kombëtare për Integrim (AKI) — e përmbyllën garën me prezantimin e vizioneve të tyre për zhvillimin e komunës.
Izet Mexhiti theksoi se Çairi po modernizohet me standarde të reja urbane, duke përmendur projektet e reja infrastrukturore që po realizohen në terren.
“Po ndërtojmë rrugë të reja, ndriçim publik, kanalizime dhe trotuare të sigurta për qytetarët. Po ashtu, është në proces zgjerimi i bulevardeve ‘Cvetan Dimov’ dhe ‘Mit’hat Frashëri’,” deklaroi Mexhiti.
Ai nënvizoi edhe investimet në arsim dhe inkluzion social, duke përmendur projektet për ndërtimin e shkollës për fëmijët me nevoja të veçanta dhe qendrën ditore për integrimin e tyre.
“Do të adaptojmë hapësirat publike me rampa, ndriçim dhe sinjalistikë universale që çdo qytetar të ndihet i lirë dhe i barabartë. Në qendër të këtij vizioni është kampusi i Universitetit ‘Nënë Tereza’, një investim historik prej 40 milionë euro, që do ta shndërrojë Çairin në qendër të arsimit të lartë në vend,” shtoi Mexhiti.
Ndërkaq, kandidati i AKI-së, Bujar Osmani, deklaroi se 100 ditët e para pas zgjedhjeve do të jenë periudhë e transformimit të Çairit, me fokus në pastrimin, urbanizimin dhe respektimin e ligjit.
“Në 100 ditët e para do ta bëjmë Çairin komunën më të pastër në Shkup. Do të bëjmë rishikimin e plotë të ndërtimeve pa leje dhe premtoj që asnjë centimetër nuk do të ndërtohet më në mënyrë të jashtëligjshme. Pas 19 tetorit, Çairit do t’i ndodhë një tërmet ndryshimesh që qytetarët i kërkojnë çdo ditë,” tha Osmani, duke kërkuar mbështetjen e qytetarëve për “një fillim të ri”.
Gara në Çair shihet si një nga më të ashpra të këtij cikli zgjedhor, ku Izet Mexhiti dhe Bujar Osmani, po përballen për herë të parë si rivalë politikë, duke e bërë këtë komunë njërën nga betejat më interesante mes dy kampeve shqiptare, VLEN dhe AKI.