Në lumin Treska në rajonin e Kërçovës janë regjistruar ngordhje peshqish, njoftoi mbrëmë Shoqata e Peshkimit Sportiv “Hunter Fish”, duke kërkuar një reagim të menjëhershëm nga institucionet kompetente.

Nga Shoqata thonë se shkaku i ngordhjeve ende nuk është përcaktuar dhe kërkon që menjëherë të merren mostra të ujit dhe peshqve të ngordhur dhe të kryhen analiza laboratorike.

Sipas tyre, është e nevojshme të hetohen të gjitha shkaqet e mundshme, përfshirë ndotjen e mundshme ose ndërhyrje të tjera që mund të rrezikojnë botën e gjallë në lumë.

“Çdo ndotje, helmim ose ndërhyrje tjetër që kërcënon jetën në lumë duhet të hetohet plotësisht dhe të përcaktohet shkaku dhe përgjegjësia”, thonë nga “Hunter Fish”.

Shoqata u kërkon institucioneve kompetente të marrin masa për të mbrojtur Treskën në mënyrë që të parandalohen raste të ngjashme në të ardhmen. përcjell Zhurnal.mk .

Advertisement

Ish-ministri i mbrojtjes i Maqedonisë së Veriut, Trajan Gocevski ka nxjerrë një pretendim të fortë se vdekja e presidentit Boris Trajkovski në aksidentin ajror të vitit 2004 nuk ishte një ngjarje fatkeqe, por një atentat i mirëfilltë.

„Boris Trajkovskit i bënë atentat“, deklaroi Gocevski gjatë një interviste për 4TV, duke theksuar se, sipas tij, rasti duhet të rihapet dhe të shqyrtohet sërish në kontekstin e krizave politike dhe të sigurisë që kaloi Maqedonia në vitet 1999 dhe 2001.

Ai vlerëson se ekzistojnë rrethana të shumta të cilat ngrenë dyshime për një lidhje të mundshme mes rrëzimit të avionit dhe ngjarjeve të asaj periudhe.

Gocevski u ndal edhe te çështjet që lidhen me hetimin e rrëzimit të avionit me të cilin udhëtonte Trajkovski. Sipas tij, në hetim u angazhuan navigatorë dhe oficerë të huaj, por roli i tyre i mëtejshëm, siç pretendon ai, nuk u sqarua kurrë mjaftueshëm.

„Ka shumë gjëra që mbetën pezull dhe ne si shtet nuk arritëm të imponoheshim për t’i zbardhur — gjë që është e rëndësishme si për familjet e tyre, ashtu edhe për ne si shtet“, deklaroi Gocevski.

Advertisement

Ai vlerësoi se në Maqedoni ka edhe raste të tjera të personave të humbur dhe ngjarjeve të pazbardhura që nuk kanë marrë vëmendjen e duhur institucionale.

Pretendimi se aksidenti ajror ku humbi jetën Boris Trajkovski ishte atentat mbetet një qëndrim personal i Gocevskit, ndërsa në deklaratën e tij nuk janë paraqitur prova me të cilat kjo do të konfirmohej.(INA)

Partia “Republika e Re” shënoi njëvjetorin e themelimit, ndërsa kryetari i saj, Ivon Veliçkovski, prezantoi draftin e parë të Ligjit për konfiskimin e zgjeruar të pasurisë së fituar në mënyrë kriminale, shkruan gazeta KOHA.

Në fjalimin e tij, Veliçkovski tha se misioni i partisë është ndërtimi i një kombi të bashkuar dhe të suksesshëm, si dhe i një shteti të sigurt e të zhvilluar, të integruar në Bashkimin Evropian dhe aleat konsekuent i NATO-s.

Ai theksoi se partia angazhohet për sundimin e ligjit, veting në gjyqësor, parti politike, shërbime të sigurisë, diplomaci, media dhe administratë, si dhe për hapjen e arkivave të shërbimeve sekrete jugosllave.

Ndër prioritetet e përmendura janë zgjerimi i masave kufizuese të vendosura nga SHBA-ja, Britania e Madhe, Kanadaja dhe vendet evropiane, si dhe rregullimi ligjor i tregut të kriptovalutave.

Sipas Veliçkovskit, partitë parlamentare dhe oligarkia e vendit kundërshtojnë ndryshimet, pasi synojnë ta ruajnë status quo-në dhe privilegjet e një numri të vogël familjesh.

Advertisement

Ai propozoi investimin e Maqedonisë së Veriut në reaktorët bërthamorë në Bullgari, me qëllim sigurimin e energjisë elektrike më të lirë për bizneset dhe familjet.
Kreu i “Republikës së Re” kërkoi zbatim konsekuent të Marrëveshjes së Prespës dhe Kornizës Negociuese, në mënyrë që vendi të përfshihet në valën e zgjerimit të BE-së së bashku me Shqipërinë, Malin e Zi dhe Moldavinë.

Veliçkovski paralajmëroi se, nëse opozita parlamentare nuk i propozon ndryshimet kushtetuese brenda tre muajve, partia e tij do të nisë gjatë vitit 2027 mbledhjen e 150 mijë nënshkrimeve për inicimin e këtij procesi.

Ai u angazhua gjithashtu për rizgjedhje të njëhershme të gjyqtarëve dhe prokurorëve në Kuvend, duke vlerësuar se lufta kundër korrupsionit kërkon institucione të drejtësisë me integritet.

Në fushën e infrastrukturës, Veliçkovski kërkoi përqendrim te lidhjet rrugore dhe hekurudhore përgjatë Korridorit 8, si dhe rehabilitimin e hekurudhës në Korridorin 10.

Ai propozoi edhe zvogëlimin e administratës shtetërore dhe publike, duke theksuar se në epokën e digjitalizimit nuk ka vend për administratë të mbingarkuar.
Në përfundim, Veliçkovski bëri thirrje për bashkimin e partive, qytetarëve, listave të pavarura dhe platformave me orientim qytetar, sipërmarrës, evropian dhe euroatlantik, nën moton: “Liri, rend dhe prosperitet”.

Advertisement