Imazhet e publikuara nga Varrezat Narellan në Camden, pranë Bondi Beach, kanë tronditur opinionin publik, pasi tregojnë një akt vandalesk të rëndë ndaj varreve myslimane, vetëm pak ditë pas sulmit terrorist vdekjeprurës që ndodhi të dielën. Sipas autoriteteve dhe përfaqësuesve të komunitetit, individë të panjohur shpërndanë koka derri mbi varret myslimane, në një akt që besohet të ketë qenë hakmarrës. Në fenë islame, mishi i derrit konsiderohet i ndaluar dhe i papastër, çka e bën veprimin veçanërisht fyes dhe provokues.

Nga sulmi, deri më tani, kanë humbur jetën 16 persona, përfshirë edhe babain 50-vjeçar të armatosur, ndërsa 42 të tjerë janë dërguar në spital. Policia konfirmoi se 14 viktima vdiqën në vendngjarje dhe dy të tjerë ndërruan jetë më vonë në spital. Viktimat ishin të moshave nga 10 deri në 87 vjeç. 24-vjeçari Naveed Akram ndodhet ende në spital nën mbikëqyrjen e policisë, pasi u qëllua nga oficerët gjatë ndërhyrjes. Udhëheqësi i shquar islam i Sidneit, Dr. Jamal Rifi, deklaroi se komuniteti mysliman nuk i konsideron autorët e sulmit si pjesë të Islamit.
“Ajo që bënë ata nuk tolerohet nga asnjëri prej nesh. Vrasja e civilëve të pafajshëm është e barabartë me vrasjen e gjithë njerëzimit,” tha ai, duke cituar parimet fetare.

Autoritetet australiane kanë paralajmëruar reformë urgjente të ligjeve për armët pas zbulimit tronditës se Sajid Akram (50), autori i sulmit në plazhin Bondi, ishte pronar i ligjshëm i plot gjashtë armëve të zjarrit. Akram dhe djali i tij Navid (24) akuzohen për sulm terrorist ndaj komunitetit hebre, i cili dje po festonte Hanukën, ku humbën jetën 16 persona dhe dhjetëra të tjerë u plagosën.

Swiss Residence
Sulmuesi ishte anëtar i një klubi gjuetie
Komisioneri i policisë në Uellsin e Ri Jugor, Mal Lejnion, konfirmoi se sulmuesi kishte leje për armë që nga viti 2015. “Babai kishte leje për armë që nga viti 2015”, deklaroi Lejnion, duke shtuar se Akram zotëronte gjashtë armë legale, të cilat tashmë janë konfiskuar.

“Ai ishte anëtar i një klubi gjuetie”, tha Lejnion. Më vonë u konstatua se Akram ishte anëtar i klubit të gjuetisë “Zastava”, me seli në Bonerig, më pak se dy kilometra nga shtëpia e tij. Klubin e gjuetisë “Zastava” në Sidnei e drejtojnë anëtarë të komunitetit serb.

Hetuesit zbuluan se babai dhe djali kishin ushtruar qitje në poligonin e Cecil Park. Hetimet balistike dhe forenzike duhet të përcaktojnë nëse armët e konfiskuara janë të njëjtat për të cilat Akram kishte leje. Në portofolin e djalit 24-vjeçar u gjet një kartë anëtarësimi e klubit, por ende nuk është konfirmuar zyrtarisht nëse edhe ai ishte anëtar.

Më shumë armë se para masakrës në Port Arthur
Në Uellsin e Ri Jugor janë të regjistruara mbi 1.1 milion armë zjarri, nga të cilat një e treta ndodhen në periferi të Sidneit. Shqetësues është fakti se sot në Australi ka më shumë armë sesa para masakrës në Port Arthur në vitin 1996, kur u vranë 35 persona.

Advertisement

Ky ngjarje e nxiti qeverinë e asaj kohe të miratonte Marrëveshjen Kombëtare për Armët e Zjarrit dhe të nisë një program masiv të riblerjes, përmes të cilit u tërhoqën nga përdorimi 650.000 armë. Megjithatë, të dhënat e Australia Institute nga maji i këtij viti tregojnë se sot në Australi ka mbi katër milionë armë private të regjistruara — rreth 800.000 më shumë sesa para programit të riblerjes.

Organizatorët e garës vjetore të këngës, Eurovision, do të mblidhen sot për të biseduar dhe mbase për të votuar nëse Izraeli mund të marrë pjesë vitin e ardhshëm, pasi disa vende kanë kërcënuar se do të tërhiqen nëse ai nuk përjashtohet për shkak të luftës në Rripin e Gazës.

Në takimin në selinë e Unionit Evropian të Transmetuesve (EBU) në Gjenevë do të shqyrtohen rregulla të reja, synimi i të cila është t’i dekurajojnë qeveritë dhe palët e treta nga promovimi i tepruar i këngëve për të ndikuar te votuesit, pas akuzave se Izraeli e ka fryrë padrejtësisht këngën e tij pjesëmarrëse këtë vit.

Izraeli – i cili doli i dyti në garën e vitit 2025 – nuk u është përgjigjur këtyre akuzave, por shpesh argumenton se është përballur me një fushatë shpifjesh globale.

Festivali po përballet me një “moment vendimtar”, tha eksperti i Eurovisionit, Paul Jordan.

Transmetues kombëtarë nga Sllovenia, Irlanda, Spanja dhe Holanda kanë kërcënuar se do ta bojkotojnë festivalin, i cili mbahet në maj të vitit 2026 në Austri, nëse Izraeli lejohet të marrë pjesë.

Advertisement

Kundërshtarët e pjesëmarrjes së Izraelit përmendin shqetësimet për numrin e palestinezë të vrarëve në Gazë, që ka tejkaluar shifrën prej 70.000, sipas autoriteteve shëndetësore të Gazës.

Lufta në Gazë u shkaktua nga sulmi i 7 tetorit 2023 nga grupi militant palestinez Hamas në Izrael, ku u vranë 1.200 njerëz dhe u rrëmbyen 251 të tjerë. Hamasi është i shpallur organizatë terroriste nga Shtetet e Bashkuara dhe fuqi të tjera.

Nëse anëtarët nuk bindën se rregullat e reja – të cilat synojnë ta mbrojnë neutralitetin dhe paanshmërinë e garës – janë të mjaftueshme, atëherë do të ketë votim për pjesëmarrjen e Izraelit, tha EBU-ja.

Ministri i Shtetit për Kulturën, Wolfram Weimer, i tha Reutersit se Gjermania nuk duhet të marrë pjesë në Eurovision nëse Izraeli përjashtohet.

“Izraeli e ka vendin në Festivalin Evropian të Këngës (ESC)”, tha ai.

Advertisement

“Nuk duhet të ketë ESC pa Izraelin”, shtoi ai.

Transmetuesi gjerman ARD nuk ka komentuar, ndërsa transmetuesi austriak, ORF, dëshiron që Izraeli të marrë pjesë.

Transmetuesi publik izraelit KAN tha se po përgatitet për garën e vitit të ardhshëm dhe se së shpejti do t’i publikojë ndryshimet në procesin e përzgjedhjes së këngës që do ta përfaqësojë Izraelin.

KAN tha se do të paraqesë qëndrimin e tij në rast të përjashtimit të mundshëm në takim.

Eurovision është garë në të cilën këngëtarë nga vende të ndryshme të Evropës, dhe disa përtej saj, garojnë nën flamurin kombëtar me synimin për t’u shpallur kampionë të kontinentit, një lloj Olimpiade e muzikës pop.

Advertisement

Është gjithashtu një arenë ku shpesh pasqyrohen politika dhe rivalitete rajonale. Rusia u përjashtua nga Eurovisioni pasi e nisi pushtimin e plotë të Ukrainës në vitin 2022./evropaelire./