Kandidati i VLEN-it për Çairin, Izet Mexhitit, ka deklaruar sot se filozofia e tyre e qeverisjes tregon se në Çair nuk ka dallime dhe se ka mundësi për të gjithë.
“Prandaj, në programin tonë për arsimin, kemi paraparë masa të qarta për të lehtësuar barrën e familjeve dhe për të siguruar kushte të barabarta për çdo fëmijë.
Në të gjitha shkollat fillore të komunës sonë, nxënësit do të kenë uniforma, të financuara plotësisht nga buxheti i Komunës së Çairit. Asnjë familje nuk do të ketë barrë shtesë. Me këtë synojmë të krijojmë mundësi të barabarta, dhe forcon ndjenjën e përkatësisë mes fëmijëve tanë.
Po ashtu, Komuna e Çairit do të mbulojë shujtat ditore për të gjithë nxënësit që vijnë nga familjet që përfitojnë mbështetje përmes ndihmës sociale. Askush nuk do të mbetet pas. Çdo fëmijë do të ketë kushte të denja për të mësuar, për t’u ushqyer dhe për t’u rritur me dinjitet.
Në të njëjtën kohë, do të forcojmë sigurinë nëpër shkolla, me masa të reja fizike dhe teknologjike, në bashkëpunim të ngushtë me institucionet arsimore dhe prindërit. Sepse çdo prind duhet të jetë i qetë që fëmija i tij është i sigurt në shkollë.
Ky është Çairi që po ndërtojmë. Çairi i barazisë, kujdesit dhe solidaritetit. Një komunë që punon, ndan dhe kujdeset për të gjithë.
Një komunë që e kthen fjalën në vepra dhe e tregon përditë, se politika e mirë është ajo që përmirëson jetën e qytetarëve.
Fëmijët tanë janë e ardhmja jonë. Dhe kur investojmë tek ata, investojmë në të ardhmen e Çairit”, ka deklaruar Mexhiti.

Droga psikotrope metilendioksimetamfetaminë, mefedron dhe marihuanë u gjetën gjatë një bastisjeje në një shtëpi në Gostivar ku ndodhej një studente, shtetase e Republikës së Turqisë.

Gjatë bastisjes, të kryer me urdhër të prokurorisë kompetente, inspektorët e Departamentit të Hetimeve gjetën gjithsej gjashtë tableta prej 0.29 gramë të ilaçit psikotrop metilendioksimetamfetaminë, 1.63 gramë mefedron, marihuanë dhe dhjetë fara kanabisi, njoftoi Drejtoria e Doganave.

“Gjatë procedurës para-hetimore, u përcaktua se studentja ka marrë dërgesë ajrore të dërguar nga një person fizik nga Belgjika, e regjistruar si “shënim”. Pasi e ka marrë dërgesën, i dyshuari e ka hapur atë dhe ka nxjerrë drogën prej saj. Në të njëjtën kohë, inspektorët doganorë, me urdhër të prokurorit publik, kanë kryer një bastisje, gjatë së cilës janë gjetur drogat”.

“Me urdhër të prokurorit publik, substancat e sekuestruara janë dorëzuar për ekspertizë në MPB, ku është konfirmuar përbërja e tyre kimike. Kundër të dyshuarës, Departamenti i Hetimeve i Sektorit të Kontrollit dhe Hetimeve ngriti kallëzim penal në Prokurorinë Publike të Gostivarit për veprën penale “Prodhim dhe shpërndarje e paautorizuar e drogave narkotike, substancave psikotrope dhe prekursorëve”, e dënueshme sipas nenit 215, paragrafi 1 i Kodit Penal”, thonë nga Drejtoria e Doganave.

Ministria e Shëndetësisë njofton se është në proces shpërndarja e vaksinave kundër gripit sezonal në institucionet publike shëndetësore. Gjatë kësaj jave, qytetarët që janë paraqitur për vaksinim falas do të njoftohen me mesazh SMS për termin e tyre të vaksinimit.

Vaksinimi kundër gripit sezonal do të realizohet në 35 pika vaksinimi në të gjithë vendin, prej të cilave 5 në Shkup.
“Kujtojmë se është ende në vazhdim regjistrimi për vaksinim falas kundër gripit sezonal për grupet e rrezikuara të popullsisë, të cilët mund të paraqiten duke plotësuar aplikacionin vakcinacija.mk në këtë link: https://vakcinacija.mk/mk/registration-flu ose përmes mjekut të tyre amë. Vaksinimi falas përfshin kategoritë e mëposhtme të popullsisë: Personat mbi 65 vjeç, personat me sëmundje kronike, punonjësit shëndetësorë, gratë shtatzëna, fëmijët nga 6 muaj deri në 5 vjeç, si dhe personat që jetojnë në institucione të përkujdesjes sociale për të moshuar dhe punonjësit e këtyre institucioneve”.

“Vaksinimi mbetet masa më efektive parandaluese për mbrojtjen e shëndetit. Këtë vit, Ministria ka siguruar 80.000 doza vaksine katërvalente, të prodhuar nga kompania e njohur Abot nga Holanda”, thonë nga MSH.