Deri më tani rreth 500 vetura shtetërore janë pajisur me targa të specializuara me ngjyrë të kuqe në kuadër të fushatës së Qeverisë për të parandaluar keqpërdorimin e burimeve shtetërore gjatë fushatës zgjedhore. Drejtori i Shërbimit për Çështje të Përgjithshme dhe të Përbashkëta të Qeverisë, Ivica Tomovski, njoftoi se qytetarët do të kenë mundësi të paraqesin keqpërdorimet nëpërmjet telefonit dhe emailit special. Aktualisht, shteti posedon rreth 7.500 vetura zyrtare përfshirë edhe ato të organeve të sigurisë që nuk do të posedojnë targa me ngjyrë të kuqe.

“Qytetarët, praktikisht do të mund të paraqesin keqpërdorime, keqpërdorime potenciale dhe keqpërdorime të mundshme. Ato mund të dërgojnë deri te ne, te shërbimi dhe tani ne si institucion do t’i dërgojmë te të gjitha ata institucione. I lus të gjithë institucionet e shtetit të përpiqen t’i racionalizojnë të gjitha ato vetura që i kanë, pasi shumë prej veturave i kanë në gjendje jofunksionale. Numri i përgjithshëm i veturave është rreth 7.500 vetura, por këtu duhet të theksoj që ato 7.500 vetura janë edhe ato të MPB-së, Armatës, ASK-së, Ndihmës së Shpejtë. Nuk pres që të kemi më shumë se 1500 deri në 2.000 vetura në nivel të shtetit”, deklaroi Ivica Tomovski, drejtor i Shërbimit për Çështje të Përgjithshme dhe të Përbashkëta të Qeverisë. /Alsat.mk

Kryeministri Hristijan Mickoski sot bëri thirrje të ndërmerren veprime për ndryshime ligjore me të cilat, zjarrvënia do të kualifikohet si terrorizëm.

“Në kuadër të procedurës parlamentare, diskutova me koordinatorin e grupit parlamentar të VMRO-DPMNE-së se urgjentisht duhen ndryshime në ligjet që do ta kualifikojnë zjarrvënien si akt terrorizmi, ndërsa hedhja e mbeturinave aty ku nuk i takon do të jetë një tjetër vepër penale që do të dënohet me burgim prej më shumë se pesë vjet”, theksoi Mickoski.

Kryeministri informoi se që gjatë ditës së djeshme Ministria e Mjedisit Jetësor ka dërguar letër deri te të gjitha komunat që urgjentisht të marrin masa për pastrimin e deponive të paligjshme dhe mbeturina të hidhet aty ku e ka vendin.

“Gjithashtu u bëj thirrje qytetarëve të pandërgjegjshëm që i formojnë këto deponi të paligjshme, të ndalojnë së formuari, sepse të gjithë ata që do të kapen do të ndëshkohen rëndë”, apeloi Mickoski.

Kryeministri paraprakisht tha se janë identifikuar rreth njëzet persona për të cilët ka dyshime të arsyeshme se qëndrojnë pas zjarreve dhe se ekzistojnë qendra të pushtetit që po përpiqen të mbjellin frikë dhe panik tek qytetarët para zgjedhjeve.

Advertisement

Transparenca mesatare aktive e ministrive, Qeverisë dhe komunave për vitin 2025 është 80 për qind (nga një maksimum prej 100 për qind), e njëjtë si me vitin e kaluar, tregon rangimi i rregullt vjetor i institucioneve sipas Indeksit të transparencës aktive të publikuar nga Qendra për komunikime qytetare.

Rangimi përfshin 102 institucione, përkatësisht Qeverinë dhe të gjitha ministritë dhe komunat.
Indeksi, madje tregon se transparenca aktive e ministrive dhe Qeverisë është ulur në krahasim me vitin e kaluar dhe është 84 për qind, ndërsa vitin e kaluar ishte 86 për qind dhe se komunat kanë ruajtur të njëjtin nivel të transparencës aktive si vitin e kaluar, pra 79 për qind. Plot 44 për qind e institucioneve të përfshira e kanë përkeqësuar transparencën e tyre aktive (vitin e kaluar kjo ka qenë 19 për qind).

“Ministria e Mbrojtjes, për të pestin vit radhazi ruajti transparencën maksimale aktive prej 100 për qind, ndërsa rezultatin prej 100 për qind sivjet e mori Ministria e sapokrijuar e transformimit digjital. Te komunat, ndryshe nga viti i kaluar kur madje pesë komuna ndanin vendin e parë me 100 për qind transparencë aktive, këtë vit kemi vetëm dy komuna  – Kavadari dhe Kërçova”, thuhet në kumtesën e Qendrës për komunikime qytetare.

Midis rajoneve, për të tretin vit radhazi në vendin e parë gjendet Rajoni lindor (me të njëjtën transparencë aktive si vitin e kaluar prej 88 për qind). Në vendin e fundit, me transparencë aktive të reduktuar krahasuar me vitin e kaluar është Rajoni i Pollogut (me 71 për qind transparencë aktive e cila vitin e kaluar ishte 73 për qind).

Më pak informacione, si ministritë ashtu edhe komunat publikojnë për financat (ministritë 58 për qind dhe komunat 59 për qind nga 100 përqindtë e mundshme).

Advertisement

Një ngecje të madhe ka në përgjigjet ndaj kërkesave për qasje të lirë në informacionet me karakter publik të cilat u janë dërguar të gjitha institucioneve në të njëjtën ditë dhe me të njëjtën pyetje, thonë nga Qendra.

Komunat janë përgjigjur në mesatare për 21 ditë (vitin e kaluar për 15 ditë), derisa ministritë u përgjigjën për 23 ditë (vitin e kaluar për 14 ditë). Përndryshe, afati përfundimtar ligjor është 20 ditë.

Vetëm 54 për qind e institucioneve janë përgjigjur brenda afatit maksimal ligjor prej 20 ditësh (vitin e kaluar këtë e kanë bërë 71 për qind e institucioneve).