Pas disa seancave të anuluara, në Gjykatën Penale të Shkupit filloi rigjykimi për rastin “Besa Trans”, pasi Apeli para një viti e rrëzoi aktgjykimin e shkallës së parë ku pronari i kompanisë transportuese Bekim Haxhiu u dënua me 20 muaj burg. Haxhiu, i cili tanimë tre vite qëndron në bankën e të akuzuarit, para gjykatësit sërish deklaroi se nuk ndihet fajtor për veprën penale që i ngarkohet, respektivisht se ka falsifikuar certifikatën e licencës së autobusit i më 23 nëntor të vitit 2021 u dogj në Struma të Bullgarisë dhe si pasojë, humbën jetën 45 persona dhe 7 të tjerë u lënduan. I pafajshëm u deklarua edhe përfaqësuesi i personit juridik “Besa Trans”,  Arif Kovaçi.

Me rifillimin e gjykimit për lëndën që nuk ka të bëjë me aksidentin, por vetëm me licencën, është ndërruar edhe prokurori. Akuzën në rigjykim do ta përfaqësojë Zoran Zdravev, pasi që Vlladimir Milloshevski është avancuar në pozitën e prokurorit të lartë.

Në seancën e sotme, ishin të pranishëm përfaqësuesit e Ministrisë së Transportit, resorit kompetent i cili jep certifikatat e licencave për transportuesit. Draganço Jovev i punësuar në këtë ministri, tha se mbetet në deklarimin që e ka dhënë gjatë gjykimit të parë, respektivisht se kompania “Besa Trans” ka pasur licencë për transport ndërkombëtar për pesë autobusë, por nuk ka pasur licencë për autobusin e djegur.

Në seancën e radhës, të caktuar për më 19 dhjetor, pritet të dëshmojë përfaqësuesi i Doganës, të cilën gjykatësi Ivica Stefanovski, e cilësoi si “çelës” të lëndës.

Sipas akuzës, prej 10 janarit të vitit 2021 e deri në ditën e aksidentit, autobusi ka kaluar kufirin me certifikatë licence të falsifikuar 20 herë. Për këtë, sipas Prokurorisë është fajtor pronari i kompanisë Bekim Haxhiu, i cili nëpërmjet shoferëve të ndryshëm, ka mundësuar që autobusi të udhëtojë në relacione të ndryshme. Mbrojtja ka mohuar në vazhdimësi se ka bërë falsifikim të certifikatës së licencës, ndërsa insistojnë në formulimin se për të pasur falsifikim, duhet që dikush të krijojë një dokument të rrejshëm, që sipas tyre në këtë rast, nuk ka ndodhur.

Advertisement

Tragjedia e Bullgarisë, mbetet ndër më të rëndat në historinë e vendit, ndërsa familjarët, por edhe opinioni vazhdimisht kanë kërkuar përgjegjësi. Bullgaria hapi hetim për arsyet e aksidentit, megjithatë i mbylli pasi sipas tyre fajtor ka qenë shoferi që ka humbur jetën në aksident, sepse ka lëvizur mbi shpejtësinë e lejuar, në kushte të papërshtatshme të rrugës.Gazetar: Suad Bajrami

Prej më shumë se një viti është premtuar punësimi i 600 specializantëve të rinj në sektorin e shëndetësisë, por deri më tani ky proces është realizuar vetëm për gjysmën e tyre. Nga Asociacioni i Specializantëve dhe Mjekëve të Rinj thonë se zvarritjet e vazhdueshme janë pasojë e hedhjes së fajit nga një institucion te tjetri, ndërsa situata e krijuar po i dëmton drejtpërdrejt mjekët e rinj që presin për punësim. Sipas tyre, shteti po “luan” me përditshmërinë e tyre duke mos i siguruar kushte të qëndrueshme pune dhe mbështetje të duhur financiare, çka po i shtyn gjithnjë e më shumë drejt largimit nga vendi.

“Absolutisht është demotivim e gjithë kjo që e shohim në… përsëri nëse shteti, konkretisht autoritetet shëndetësore nuk dëgjojnë thirrjet do të shohim largim më të madh të mjekëve. Për fat të keq do thosha se një numër i madh i kolegëve deri tani janë larguar dhe përderisa politikat e tilla që deri më tani kanë sunduar nuk ndryshojnë, ky numër sigurisht që do të rritet”, tha Bojan Trajkovski, Asociacioni i specializantëve dhe mjekëve të rinj.

Nga Ministria e Shëndetësisë thonë se procedura për punësimin e 300 specializantëve të mbetur është në fazë përgatitore.

“Faza e parë tashmë është realizuar, ndërsa për punësimin e grupit të dytë prej 300 specializantësh të rinj, procedura ende është në fazë përgatitore. Aktualisht po verifikohen sistematizimet, planet e punësimit në institucionet shëndetësore dhe pas përfundimit të procesit zgjedhor, do të vazhdohet me procedurën e punësimit”, thonë nga Ministria e Shëndetësisë.

Prej vitesh, çështja e punësimit të mjekëve të rinj mbetet problem i pazgjidhur në shëndetësi, edhe përskaj mungesës së madhe të kuadrit me të cilën përballet sistemi shëndetësor. Vetëm vitin e kaluar mbi 500 mjekë janë larguar për në vendet evropiane, për shkak të mungesës së koordinimit institucional. Janë premtuar edhe 1200 punësime, por e njëjta nuk është realizuar./Alsat.mk

Advertisement

Grupi i punës i përbërë nga përfaqësues të Ministrisë së Arsimit dhe Shkencës, Delegacionit të BE-së, UNICEF-it, Bankës Botërore, GIZ-it, UNDP-së, Byrosë për Zhvillimin e Arsimit, Qendrës për Zhvillimin e Arsimit Profesional, Qendrës Shtetërore të Provimeve, Inspektoratit Shtetëror të Arsimit dhe sektorit civil hartoi Strategji të re për arsimin, e cila do të zbatohet nga viti 2026 deri në vitin 2032. Para se të miratohet nga Qeveria, do të vihet në shqyrtim publik përmes sistemit qeveritar ENER, me qëllim që të ofrohet mundësi për komente dhe sugjerime në drejtim të avancimit të përmbajtjes.

Për këtë sot informoi ministrja e Arsimit dhe Shkencës, prof. dr. Vesna Janevska, para fillimit të punëtorisë së për Strategjinë, duke shprehur mirënjohje për të gjithë ata që dhanë kontribut në përgatitjen e saj gjatë gjashtë muajve të kaluar.

Dokumenti thekson zhvillimin e programit të ri për arsimin parashkollor, gjithëpërfshirjen në arsimin fillor dhe të mesëm, si dhe infrastrukturën, ku moment kyç është optimizimi i rrjetit shkollor dhe implementimi i punës me një turn. Janevska informoi se do të ndiqet zbatimi i konceptit të ri për arsimin e mesëm-gjimnaz dhe për arsimin profesional, si dhe model të ri për maturën shtetërore. Në vitin 2026 fillon zbatimi i formulave të reja për financimin e arsimit fillor dhe të mesëm. Do të miratohet legjislacion i ri në arsimin e lartë, dhe veçanërisht do t’i kushtohet vëmendje për zhvillimin e kapaciteteve kadrovike të MASH-it.

Ministrja konfirmoi se opinioni gjerë do të ketë mundësinë të kontribuojë në krijimin e versionit më të mirë të dokumentit strategjik, së bashku me planet e shoqëruara të veprimit, pasi ai nga nesër do të publikohet në sistemin ENER të Qeverisë dhe do të jetë i disponueshëm për komente, sugjerime, vërejtje, para miratimit përfundimtar.