Rruga Tetovë Prizren ende në fazë projektimi. Pavarësisht se në Kosovë muaj më parë filloi hapja e trasesë me makineri në terren, te ne projekti ende po endet nëpër zyra. Zv/ministrja e Transportit Kaltrina Zekolli Shaqiri thotë se janë ndarë 2 milion euro për projektimin e rrugës Tetovë-Prizren dhe se pas kësaj pritet që fillohet me punë. Zekolli bën me dije se për hapjen e tunelit që duhet të bëhet nga ana e të dy qeverive, asaj të Kosovës dhe të Maqedonisë së Veriut, po kërkohet ndonjë grand i jashtëm që të mos rëndoj buxhetin e qeverive dhe që puna të kryhet më shpejtë

“Për vitin 2026, nga buxheti i Ndërmarrjes Publike Rrugët Shtetërore janë siguruar 2 milionë euro për projektimin kryesor edhe tani shumë shpejt duhet të hapet tenderi për projektim. Më vjen keq që duhet ta them këtë, po patjetër duhet ta kalojmë pjesën e projektit kryesor. Pa projekt, ne nuk mund të dimë saktë sa do të kushtojë, sa do të zgjasin punimet, si do të realizohet e gjithë kjo. Ajo që na lidh me Kosovën është një tunel i përbashkët, për këtë edhe me Kryeministrin Kurti kemi biseduar se si të gjejmë, qoftë një grant të përbashkët që të mund të realizohet, por neve njëherë na intereson kjo pjesa jonë që të fillojmë, por patjetër njëherë duhet të bëhet projekti kryesor.

Por para se Qeveria të fillojë, kreu i Komunës së Tetovës Bilall Kasami ditë më parë njoftoi se ka ndarë 18 milionë denarë për fillimin e rrugës Tetovë Prizren, gjegjësisht, hapjen e një tranziti nga hyrja në fshatin Shipkovicë e deri në përfundimin e fshatit në drejtim të rrugës për Brodec.

“ Për projektimin, buxheti është tek, siç thashë, Ndërmarrja Publike Rrugët Shtetërore. Kjo që ka thënë komuna është për t’u përshëndetur dhe tregon se edhe ata kanë gatishmëri dhe seriozitet që t’i shkojnë kësaj pune deri në fund. Padyshim që edhe në Ministrinë e Transportit ne kemi program ku mbështesim rrugë të tilla, jo vetëm thirrjeve që i kemi nga kredia hungareze, kemi edhe buxhet të ministrisë edhe pa dyshim që një prej projekteve kryesore që është në interesin tonë është edhe rruga Tetovë-Prizren dhe neve do ta kalojmë këtë në qeveri dhe kjo do të bëhet pjesë e fillimit të punimeve të kësaj rruge dhe do t’i ndihmojmë komunës.”

Rruga Tetovë Prizren është një  projekt që është duke u premtuar gati më shuam se 20 vite.  Shpesh herë është thënë se ka janë duke u bërë projektime por deri më tani nuk ka asgjë konkrete në terren. Në Janar të vitit 2024 mes ministrisë së transportit të Kosovës dhe Maqedonisë është nënshkruar edhe një marrëveshje për bashkëfinancim të projektit për  tunelin i cili duhet të jetë 6.4 kilometra.

Advertisement

Në planin strategjik 2026-2030  të Ministrisë së Kulturës, për ansamblin muzikor në Tetovë parashihet një “racionalizim” i institucionit, që mund të çojë në mbylljen ose bashkimin e tij me institucione të tjera, me arsyetimin se ka kapacitete të kufizuara.Blerim Qamili drejtor i ansamblit muzikor në Tetovë thotë se ata do kundërshtojnë këtë plan strategjik dhe se kjo është një goditje direkte ndaj muzikës shqipe.

“Plani strategjik, sipas asaj që kam lexuar në draft, por edhe sipas një komunikimi telefonik që pata me Ministrin. Plani strategjik përfshin fuzionimin e institucioneve. Fuzionimi i institucioneve nënkupton që ansambli do të funksionojë nën kompetencat, më duket, të Pallatit të Kulturës, ashtu siç e kuptova unë. Edhe disa institucione të tjera do të fuzionohen, por për ansamblin muzikor kjo mendoj se nuk është e përshtatshme dhe nuk ia ul vlerën ansamblit. Është mendim personal dhe është qëndrimi i ansamblit muzikor. Për këtë gjë është kërkuar edhe një mendim, të cilin ne po  personalisht unë me kolegët po e përgatisim me kujdes për ta kundërshtuar.” 

Sipas Qamilit artistëve që punojnë tani më me kontrata në Ansamblin Muzikor të Tetovës u është premtuar punësime nga përfaqësuesit shqiptarë në Ministrinë e Kulturës, por deri tani nuk është përmbushur asgjë.

“ Ka gati është më se e treta, e dyta herë që unë, si drejtor i ri i këtij ansambli, kërkoj punësimet dhe nuk më është dhënë përgjigje në asnjë mënyrë, as a do të realizohen, as a nuk do të realizohen këto punësime dhe arsyeja pse. Ka qenë, gjatë gjithë kohës ka qenë e paqartë. Kolegët, të cilët ne bashkëpunojmë me kontrata të shkurtra, siç e dini edhe ju, reaguan mbi këtë draft sepse ata presin punësimet. Të jemi edhe të sinqertë deri në fund, ne kemi premtuar punësime sepse ashtu na është thënë, dhe ata reaguan, iu drejtuan mua. Unë, në një moment të caktuar, në momentin që ishte postuar ai draft-plan, unë kam qenë totalisht i painformuar rreth zhvillimeve dhe planeve strategjike për këtë çështje. Shihni, premtimet kanë ardhur nga Ministria, si përgjegjësit ose përfaqësuesit tanë atje, të cilët disa herë na kanë premtuar se këto punësime do të realizohen.”

Funksionimi i Ansamblit Muzikor të Tetovës nuk rrezikohet nga fuzionimi i mundshëm me ndonjë institucion tjetër, tha ditë më parë Kryetari i Komunës së Tetovës Bilall Kasami duke shtuar se fokusi kryesor duhet të jetë në punësimin e kuadrove të reja në këtë institucion. Kasami vlerëson se nuk është në pyetje vetëm Ansambli Muzikor i Tetovës kur flitet për fuzionim institucionesh por edhe shumë institucione të tjera nën umbrellën e Ministrisë së Kulturës ndërsa e gjitha kjo sipas tij, bëhet në të mirë të kulturës dhe qytetarëve.

Advertisement

Në këtë institucion për momentin janë vetëm dy të punësuar dhe drejtori. Ndërsa kërkesa është bërë fillimisht për 24 të punësuar. Nga gjithsej rreth 60 sa duhet, duke përfshi rreth 15 administratorë dhe staf teknik dhe rrethë 45 artistë.

Drejtoria e Doganave thotë se ka ngritur nivelin e kontrollit përmes vendosjes së profileve adekuate të rreziqeve, që ka rezultuar me zbulimin e disa tentativave për të trafikuar arin, gjatë dy javëve të kaluara.

Zyrtarët doganorë kanë parandaluar katër tentativa për kontrabandë ari në pikat kufitare, gjatë të cilave janë sekuestruar sende të arta që udhëtarët kanë tentuar t’i fusin ilegalisht në vend.

Siç bëjnë të ditur nga Drejtoria Doganore, rastet janë zbuluar gjatë kontrolleve të detajuara të udhëtarëve dhe bagazheve të tyre, ku tek disa persona janë gjetur sende ari të padeklaruara.

Ndaj personave të përfshirë janë ngritur kallëzime përkatëse, ndërsa ari i sekuestruar është konfiskuar përkohësisht deri në përfundimin e procedurave.

Gjatë dy javëve të fundit, në pikën kufitare “Aeroporti Ndërkombëtar i Shkupit” janë zbuluar tre tentativa për kontrabandë ari me peshë totale prej 285 gramësh dhe vlerë rreth 23 mijë euro.

Advertisement

Më herët, Drejtoria Doganore ka informuar edhe për një rast të parandaluar të kontrabandës së arit në pikën kufitare Bogorodicë. Në të gjitha rastet, ari është sekuestruar dhe ndaj të dyshuarve janë ngritur kallëzime penale.

Drejtoria Doganore rikujtoi një rast tjetër, ku zyrtarët doganorë në Aeroportin Ndërkombëtar të Shkupit parandaluan kontrabandën e 1.7 kilogramëve stoli ari të çmuar, të cilat gjatë procedurës penale nga një ekspert gjyqësor janë vlerësuar në pothuajse një milion euro.