Tentativa për të djegur objektin e Komunitetit Hebraik dhe sinagogën “Bet Jakov” në Shkup përbën një goditje ndaj paqes, stabilitetit dhe bashkëjetesës që prej shekujsh kultivohen në tokën e Maqedonisë dhe mbi të cilat bazohet shoqëria jonë. Çdo cenim i një vendi të shenjtë të tjetrit, pavarësisht cilës bashkësie fetare i përket, nënkupton shkelje të vlerave themelore të respektit, lirisë dhe dinjitetit njerëzor. Mosrespektimi i shenjtërisë së tjetrit është edhe mosrespektim i shenjtërisë së vetvetes, thuhet në reagimin e Komisionit për Marrëdhënie me Bashkësitë Fetare dhe Grupet Fetare dhe të krerëve të pesë bashkësive fetare në vend, i cili u lexua sot në konferencë për shtyp nga drejtoresha e Komisionit, Olivera Trajkovska.

Ajo tha se ata e dënojnë ngjarjen e pakëndshme që ndodhi në orët e hershme të mëngjesit të 12 prillit dhe shprehin solidaritet dhe mbështetje për Komunitetin Hebraik.

“Prandaj, në frymën e bashkëpunimit ndërfetar dhe mirëkuptimit të ndërsjellë, bëjmë thirrje që të gjithë qytetarët të tregojmë përgjegjësi, arsye dhe virtyt dhe të mbetemi ruajtës të bashkëjetesës. Respekti i ndërsjellë është ndër vlerat më të mëdha që kemi, ndaj duhet ta ruajmë dhe ta lëmë si amanet për brezat e ardhshëm”, shtoi Trajkovska.

Në konferencë ishin të pranishëm kreu i Kishës Ortodokse Maqedonase – kryepeshkopi Stefan, peshkopi i Kishës Katolike, Kiro Stojanov, kreu i Bashkësisë Fetare Islame, Reis ul Ulema Shaqir Fetahu, kryetari i Komunitetit Hebraik Pepo Levi dhe kreu i Kishës Ungjillore-Metodiste, pastori Marjan Dimov.

Kryetari i Komunitetit Hebraik, Pepo Levi, theksoi se reagimi i tyre është njëkohësisht dënim dhe shenjë mbështetjeje për komunitetin hebraik, sepse në Maqedoni bashkësitë fetare kultivojnë bashkëpunim afatgjatë, dialog konstruktiv dhe mbështetje të ndërsjellë në çdo fushë.
Duke iu përgjigjur pyetjeve të gazetarëve, ai tha se nuk ka elemente të reja lidhur me ngjarjen dhe nuk insistojnë të merren për hir të hetimit, por është e rëndësishme që autorët të kapen. Megjithatë, tha ai, më thelbësore është të nxirret mësim nga kjo.

Advertisement

“Ky është një eksces që nuk ka ndodhur që nga viti 1943, kur Hitleri dhe ushtria e tij i dërguan 7.144 hebrenjtë tanë në Treblinkë. Prej andej askush nuk u kthye. Asnjëherë nuk është djegur sinagogë. Gjëra të tilla nuk kanë ndodhur në Maqedoni. Shpresojmë që nuk do të lejojmë që konfliktet dhe ndikimet e jashtme të derdhen në Maqedoninë tonë, ku jetojmë në paqe dhe bashkëjetesë”, tha Levi.

Ai shtoi se nuk e dinë nëse bëhet fjalë për terroristë apo huliganë, por përmendi se grupi ISIS ka pasur thirrje që gjatë Pashkëve të digjen objektet fetare të krishtera dhe hebraike.

Reisi i Bashkësisë Fetare Islame, Shaqir Fetahu, tha se në kuadër të BFI-së dhe mes besimtarëve myslimanë nuk ka asnjë problem lidhur me bashkësitë fetare apo besimtarët.

“Rinia jonë ka respekt të madh për të gjitha bashkësitë fetare dhe besimtarët. Kjo shihet në të gjitha vendet ku jetojmë së bashku pa probleme. Prandaj, me përgjegjësi të plotë them se bashkëjetesa në Maqedoni po zhvillohet mirë dhe nuk ka asnjë problem. Bashkësitë fetare së bashku me Komisionin kujdesen për zhvillimin e bashkëjetesës dhe përpiqemi që toleranca të jetë në nivelin më të lartë” , tha ai.

Ai shtoi se incidente të tilla nuk burojnë nga asnjë fe në Maqedoni dhe se institucionet duhet t’i gjejnë autorët dhe të veprojnë ndaj tyre./TV21/

Advertisement

Me rastin e shënimit të Ditës Botërore të Artit, Fakulteti i Arteve i Universitetit të Tetovës organizoi një veprimtari të veçantë artistike, me një seri punëtorish kreative të realizuara nga studentët e Artit Dramatik, Artit Muzikor dhe Artit Figurativ.

Ky aktivitet ishte i hapur për të gjithë maturantët dhe artdashësit, duke ofruar një hapësirë frymëzimi, krijimtarie dhe bashkëpunimi artistik

SENAD ABDULI – Dekan i Fakultetit të Arteve në UT

“Universiteti i Tetovës si zakonisht këtë ditë e kremton me vepra  artistike, natyrisht duke prezantuar të gjitha programet studimore  duke u nisur nga  Fakulteti i Artit Dramatik, Muzikor dhe Artit Figurativ. Ftojmë nxënësit  e të gjitha  shkollave  të mesme  që të vinë  në mënyrë interaktive dhe të shohin punën e artit, të njoftohen me studentë, të njoftohen me  profesor dhe të njihen më për së afërmi dhe të njihen më për së afërmi me punën, misionin që ka arti. Natyrisht arti përpos edukimit ndikon dhe ndihmon jashtëzakonisht  në ndërtimin dhe ngritjen e vlerave morale, shoqërore dhe natyrisht  gjithmonë  duke  synuar  të krijojmë edhe kritikun e artit. Pa art  mendoj se një shoqëri nuk është e bukur. Po them se arti në vazhdimësi ka qenë, është dhe  do të jetë promotor i vlerave  njerëzore dhe ngritjes  shpirtërore të një shoqërie’’

Dita Botërore e Artit shënohet për nder të ditëlindjes së artistit, shkencëtarit dhe zbuluesit të madh Leonardo Da Vinçi. Vendimi ishte marrë para dhjetë viteve në Kuvendin e Përgjithshëm Botëror të Asociacionit Ndërkombëtar të Artistëve që ishte mbajtur në Meksikë.

Advertisement

Dje, në ora 10:10 në SPB Tetovë, një 59-vjeçar nga Tetova ka denoncuar se është mashtruar nga një person juridik nga Tetova, pronë e një qytetari nga Turqia. Sipas denoncimit, në janar të vitit 2026, ai kishte rënë dakord për blerjen e një tepihu për një objekt fetar nga Italia për shumën prej 4.500 eurove, me ç’rast ka paguar një avans prej 3.000 eurosh, por deri në momentin e denoncimit, personi as nuk e ka sjellë tepihun sipas marrëveshjes, e as nuk i ka kthyer paratë.

……Dje,në ora 13:45, zyrtarët policorë nga SPB Tetovë kanë privuar nga liria një 26-vjeçar nga Tetova, duke vepruar sipas një denoncimi paraprak se në shtëpinë e tij ishte sjellë në mënyrë agresive ndaj nënës së tij 59-vjeçare. Gjatë privimit, në shtëpinë e tij është gjetur dhe konfiskuar një kavanoz me marihuanë. Ai është ndaluar në stacionin policor dhe pas dokumentimit të plotë të rastit, ndaj tij do të vijojë kallëzimi përkatës.

……Dje, zyrtarët policorë nga Departamenti Policor i Çegranit kanë arrestuar një 48-vjeçar nga Gostivari, i cili kërkohej në bazë të urdhëresës gjyqësore për vuajtje të dënimit me burg për vepër penale të kryer sipas nenit 284-a të Kodit Penal. Ai është dërguar në Institucionin Ndëshkues-Përmirësues Burgu i Tetovës për vuajtjen e dënimit.

……Dje, në ora 19:30 në SPB Tetovë, një 49-vjeçar nga Tetova ka denoncuar se rreth orës 18:00 në rrugën “Bllagoja Toska” në Tetovë, pas një debati të shkurtër, djali i tij i mitur është sulmuar fizikisht nga katër persona.

……Sot në ora 01:00 pas mesnate në gjatë një kontrolli në një objekt hotelierik në rrugën “Ilinden” në Gostivar, zyrtarët policorë nga DPB Gostivar, kanë arrestuar një 38-vjeçar nga Shqipëria dhe një 43-vjeçar nga Kosova për shkak të qëndrimit të padeklaruar në vend, ndërsa një 48-vjeçar nga Kosova është arrestuar për shkak të punës ilegale dhe qëndrimit në kundërshtim me qëllimin. Ata janë ndaluar në stacionin policor për procedurë të mëtejshme.

Advertisement

Sot në ora 00:30 pas mesnate në Departamentin Policor të Kamjanit, një 19-vjeçar nga fshati Pallçisht i Poshtëm ka denoncuar se më datë 14 Prill rreth orës 19:15 në një autobus, i cili qarkullonte në linjën Tetovë-fshati Pirok, është sulmuar fizikisht nga një 17-vjeçar nga fshati Zherovjan i Tetovës.

……Sot në ora 06:00 të mëngjesit, zyrtarët policorë nga SPB Tetovë kanë arrestuar një 38 dhe një 40-vjeçar sepse kanë prishur rendin dhe qetësinë publike me sjellje agresive në rrugën “Vëllezërit Milladinovci”. Gjatë kontrollit të evidencës është konstatuar se për njërin prej tyre ka një fletarrest qendror aktiv për vuajtje të dënimit me burg në kohëzgjatje prej gjashtë muajsh për vepër penale të kryer sipas nenit 235 të Kodit Penal. Ai është dërguar në Institucionin Ndëshkues-Përmirësues Burgu i Idrizovës në Shkup për vuajtjen e dënimit me burg.

……Sot në ora 04:05 të mëngjesit në rrugën “Ilinden” në Tetovë, zyrtarët policorë nga SPB Tetovë kanë arrestuar një 53 dhe një 30-vjeçar nga Tetova, sepse kanë prishur rendin dhe qetësinë publike duke lëshuar muzikë të lartë. Pas dokumentimit të rastit, ndaj tyre do të vijojë parashtresa përkatëse.