Kemi bërë mjaftë ndryshime në Ligjin për Arsim të Lartë, për çka konsideruam se janë propozuar në mënyrë korrekte dhe se do ta përmirësojnë tekstin e ligjit, deklaroi sot ministrja e Arsimit dhe Shkencës, Vesna Janevska, duke iu përgjigjur pyetjes së gazetarëve.

“Për shembull, pranuam uljen e numrit të punimeve për ciklet e dyta dhe të treta të studimeve. Ulëm një anëtar nga Qeveria, edhe pse nuk nevojitej, edhe pse nuk pajtohemi që kjo shkel autonominë e Këshillit të Universitetit. Përveç kësaj, bëmë edhe shumë ndryshime të tjera në aspektin e kritereve, për shembull, pranuam për shkencat shoqërore dhe humane, siç kërkuan mësuesit, që baza e të dhënave ‘Scopus’ të jetë relevante, nuk e përjashtuam ‘Web of science’, por ata insistuan të jetë ‘Scopus’. Do të jetë ‘Scopus’. Përveç kësaj, Këshilli Kombëtar për Arsimin e Lartë do të përpunojë një bazë tjetër të revistave që do të vlerësohet edhe gjatë zgjedhjeve. Pra, gjithçka që e konsideruam të drejtë dhe jo dashakeqe është pranuar dhe në këtë moment mësuesit kanë mundësinë ta shohin. Bëmë të njëjtën gjë edhe në Ligjin për shkencën dhe mendoj se sot do të jetë, ndoshta pak më vonë pas një ore edhe Ligji për cilësinë në arsimin e lartë. Të gjithë palët e interesuara do të jenë në gjendje ta shqyrtojnë përsëri ligjin”, u përgjigj ministrja, e cila ishte në inspektim të punimeve të ndërtimit të një palestre të re sportive në komunën Kisella Vodë.
Nëse ka ndonjë vërejtje drastike, që do ta pranonim, siç tha Janevska, këtë edhe do ta bëjnë, e pastaj Ligji do të shkojë në procedurë qeveritare.
Janevska foli edhe për regjistrimin e nxënësve në shkollat e mesme ku sot është hapur konkursi për regjistrim. Ministrja tha se edhe këtë vit, stimulojnë shkollimin profesional, me qëllim që të mbushen zbrazëtirat në tregun e punës.

“Këtë vit kemi rreth 25,000 nxënës, që duhet të hyjnë në shkollimin e mesëm. Nga këto, është paraparë që rreth 17,000 të jenë në shkollat e mesme profesionale, shkollimi dual gjithashtu do të jetë në fokus. Deri tani kemi nënshkruar marrëveshje me mbi 800 kompani dhe vazhdojmë ta stimulojmë shkollimin e mesëm profesional, që t’i mbushim zbrazëtirat e tregut të punës, ose atë për të cilën kanë nevojë kompanitë që të përmirësohet prodhimi”, tha Jenavksa.

Bllokimi dhe devijimi i Korridorit 8 u bë me urdhër të Vuçiqit, e konfirmon vetë ministri i Sërbisë

Urdhërin për ndërprerjen e punimeve në Korridorin 8, si dhe planet për bllokimin e plotë të këtjj projekti dhe devijimin e të njëjtit e ka dhënë Presidenti i Sërbisë, Aleksandër Vuçiç, ndërsa e ka realizuar Qeveria e Hristian Mickoskit, që në 6 muajt e parë të ardhjes në pushtet – thuhet në reagimin e ASH-së së Ziadin Selës.

Sipas Selës, këtë e ka konfirmuar personalisht Ministri i Transportit dhe Infrastrukturës së Sërbisë, Goran Vesiq, duke shpërndarë një deklaratë zyrtate të transmetuar nga Agjencia Bullgare e lajmeve, BGNES, në tetor të vitit 2024.

Sela thotë se për këtë skenar kanë alarmuar që nga 10 mars, por, sipas tyre, posedojnë informacione të sigurta se pas Strugës, do të izolohet edhe rajoni i Pollogut dhe Kërçovës dhe prioritet do t’i jepet ndërtimit të një autostrade Manastir-Ohër me çka Korridori 8 devijohet dhe lidhet me Korridorin 10, ndërsa Sërbia bëhet përfundimisht epiqendër dhe bllokon lidhjen e vendit tonë me Perëndimin.

Ju bëjmë thirje partive të koalicionit VLEN që të mos heshtin dhe relativizojnë planet e Vuçiçit kundër shqiptarëve, të mos defokusojnë me akuza të politikës ditore, por urgjentisht të bllokojnë këto projekte ogurzeza të Botës sërbe ose të paktën të distancohen nga kjo Qeveri! – thuhet në reagimin e partisë së Selës.

Advertisement

Korridori 8 do të kalojë nga Struga – u shpreh mbrëmë i prerë kreu i Lëvizjes Besa, Bilall Kasami, gjatë një interviste për Alsat. Duhet të bëjmë distinkcion të qartë në mes zgjidhjes teknike, dhe projektit si interes strategjik I vendit që lidh disa vende të NATO-së dhe BE-së, është shprehur Kasami, duke potencuar se Korridori 8 është ndër korridoret më të rëndësishme të vendeve pan-evropiane, pjesë e të cilit do të jetë edhe Maqedonia e Veriut.

“Është çështje të cilën na e ka lënë si problem qeveria paraprake. Se Korridori 8 nuk do të kalojë kah Struga nuk e ka thënë as kryeministri. Ky korridor lidh shqiptarët e Maqedonisë me ata të Shqipërisë, por përskaj kësaj ky është projekt I rëndësishëm edhe për Maqedoninë e Veriut. Sa është I rëndësishëm për shqiptarët dhe Shqipërinë, aq I rëndësishëm është edhe për Maqedoninë”, tha mes tjerash Kasami.

Ndërkohë, Ministri për Transport dhe Lidhje, Aleksandar Nikolovski, deklaroi se nuk mund të rrezikohet përjashtimi nga UNESCO për shkak të lëshimeve të bëra në projeksionet gjatë kohës së qeverisë së mëparshme.

Krahas për Korridorin 8, ka patur edhe 7 rekomandime tjera nga UNESCO për Maqedoninë. Bëhet fjalë për shkelje të evidentuara në rajonin e Ohrit me ndërtime të egra e të jashtëligjshme në zonat e mbrojtura.

Advertisement

Bashkësia Fetare Islame, përmes një Thirrje Publike, njofton nisjen e aksionit për mbledhjen e materialeve arkivore mbi pritjen e refugjatëve nga Kosova gjatë periudhës 1998–1999. Kjo histori nuk duhet të mbetet vetëm kujtim, ajo duhet të dokumentohet, të ruhet dhe të transmetohet si dëshmi e gjallë për brezat që vijnë – thonë nga Bashkësia Fetare Islame.

Me udhëzim dhe obligim të kreut të BFI-së, Shaqir ef. Fetai, Arkivi i Bashkësisë Fetare Islame në RMV ka nisur procesin e mbledhjes së dokumenteve historike që dëshmojnë kontributin e jashtëzakonshëm të xhamive, hoxhallarëve dhe këshillave të xhamijave në pritjen dhe përkujdesjen ndaj vëllezërve tanë nga Kosova gjatë luftës së viteve 1998–1999.

Në atë periudhë të rëndë dhe vendimtare, shqiptarët e Maqedonisë dhanë një shembull të rrallë solidariteti, duke u bërë strehë, mbështetje dhe shpresë për qindra mijëra njerëz – thuhet në thirrjen publike.

BFI fton të gjithë hoxhallarët dhe këshillat e xhamijave të asaj kohe, që të dorëzojnë në Arkivin e BFI-së çdo dokument, fotografi, evidencë apo dëshmi gojore që posedojnë nga ajo kohë.

Gjithashtu, sic thuhet, u bëhet thirrje të gjithë patriotëve nga Maqedonia, Bashkësive lokale, të cilët në çfarëdo forme kanë kontribuar dhe posedojnë materiale të kësaj natyre, që t’i dorëzojnë ato për këtë proces të rëndësishëm historik.

Advertisement

Në thirrjen publike potencohet se të gjitha materialet do të mblidhen dhe evidentohen, analizohen dhe sistemohen profesionalisht, digjitalizohen dhe ruhen në Arkivin qendror të BFI-së dhe më pas do të jenë të qasshme edhe për vetë dorëzuesit.

Dokumentet e mbledhura do ti dorëzohen edhe Institutit për krimet e luftës në Republikën e Kosovës në emër të shqiptarëve të Maqedonisë thuhet në thirrjen publike të Bashkësisë Fetare Islame të Maqedonisë së Veriut.