Dje në ora 15:00 në SPB Tetovë, një grua 51-vjeçare nga Tetova ka denoncuar se rreth orës 12:00 në shtëpinë familjare, bashkëshorti i saj ka kërcënuar atë dhe vajzën e saj, pas së cilës ka tentuar t’i vërë flakën shtëpisë.
……
Dje në ora 20:00, zyrtarë policorë nga Stacioni Policor i Tearcës kanë privuar nga liria një 34 vjeçar nga fshati Sllatinë e Tetovës, duke vepruar pas një denoncimi të mëparshëm se rreth orës 15:30 në objektin e tij hotelier në fshat, ai e ka shantazhuar atë dhe djalin e tij duke u kërkuar para, ndërsa më vonë e ka kërcënuar djalin e tij me një mjet të mprehtë. Ai është ndaluar në stacionin policor dhe pas dokumentimit të plotë të rastit do të vijojë kallëzimi përkatës.
……
Dje në ora 19:30, zyrtarë policorë nga DPB Gostivar kanë privuar nga liria një 51-vjeçar nga Gostivari, duke vepruar pas një denoncimi të mëparshëm nga bashkëshortja e tij 46-vjeçare se rreth orës 19:00 e ka sulmuar fizikisht në shtëpinë familjare. 51-vjeçari është ndaluar në Stacionin Policor të Gostivarit dhe pas dokumentimit të plotë të rastit do të vijojë parashtresa përkatëse.
……
Sot në ora 05:30 të mëngjesit në Gostivar, zyrtarë policorë nga DPB Gostivar kanë privuar nga liria një person duke vepruar pas një denoncimi të mëparshëm nga bashkëshortja e tij 42-vjeçare se rreth orës 04:00 me një automjet udhëtarësh ka thyer derën e hyrjes së shtëpisë së prindërve të saj, me një send të fortë ka thyer xhamin e shtëpisë dhe e ka sulmuar fizikisht. Gjatë kontrolleve të kryera është konstatuar se ai ishte nën efektin e alkoolit, respektivisht i janë matur 1.70 promilë alkool në gjak.
……
Dje në ora 12:05, pas informacioneve të marra paraprakisht, zyrtarët policorë kanë kryer këqyrjen e vendit të ngjarjes në një objekt në ndërtim e sipër pranë rrugës rajonale Tetovë – Jazinçë, afër fshatit Dobrosht. Me këtë rast është konstatuar se në objektin në pronësi të një 44-vjeçari nga fshati Dobrosht, një 31-vjeçar poashtu nga Dobroshti, gjatë kryerjes së detyrave të punës ka rënë dhe ka pësuar lëndime të rënda trupore. Ai është dërguar në Spitalin Klinik të Tetovës, nga ku është përcjellë për në Kompleksin e Klinikave “Nënë Tereza”, ku u ka nënshtruar lëndimeve. Këqyrjen e vendit të ngjarjes e kanë kryer ekipet e SPB Tetovë, Inspektorati i Punës dhe Prokurori Publik, me urdhër të të cilit trupi i të ndjerit është dërguar në Mjekësinë Ligjore për obduksion.
……
Dje në ora 23:00 në SPB Tetovë është denoncuar se në rrugën “29 Nëntori” në Tetovë, pas një grindjeje të mëparshme, është prishur rendi dhe qetësia publike me një përleshje fizike ndërmjet një 21 vjeçari dhe 30-vjeçari. Ata janë shoqëruar në stacionin policor dhe gjatë kontrolleve të kryera është konstatuar se njëri ishte nën efektin e alkoolit, gjegjësisht kishte 1.14 promilë alkool në gjak.
……
Dje në ora 22:30 në SPB Tetovë, një 21-vjeçar nga fshati Sellcë e Tetovës, ka denoncuar se rreth orës 22:00 në Sheshin e Qytetit në Tetovë është sulmuar fizikisht nga një person nga Tetova. Po merren masa për zbardhjen e rastit.
…..
Dje në ora 20:30 në udhëkryqin e rrugës “Boris Kidriç” dhe rrugës “Bllagoja Toska” në Tetovë, zyrtarë policorë nga SPB Tetovë kanë privuar nga liria një 23 vjeçar nga fshati Leshkë e Tetovës. Gjatë kontrollit të automjetit të tij të udhëtarëve, në sediljen e pasme janë gjetur dhe sekuestruar marihuanë, një mulli (grirës), një shkop bejsbolli dhe një boks metalik. Pas dokumentimit të plotë të rastit do të vijojë parashtresa përkatëse.
……
Dje në ora 18:50 në rrugën magjistrale Gostivar-Kërçovë, zyrtarë policorë nga DPB Gostivar kanë privuar nga liria një 21-vjeçar nga fshati Raven i Gostivarit. Gjatë një kontrolli në trafik, zyrtarët policorë kanë ndaluar një automjet udhëtarësh “Volksvagen Passat” me targa të Gostivarit, të cilin ai e drejtonte, dhe pas masave të ndërmarra është konstatuar se ai e drejtonte automjetin pa patentë shofer. Automjeti është sekuestruar dhe pas dokumentimit të plotë të rastit ndaj tij do të ngrihet kallëzimi përkatës.
……
Pas mesnate në ora 01:40 në fshatin Negotinë të Gostivarit, zyrtarë policorë nga Stacioni Policor i Gallatës kanë privuar nga liria një 19-vjeçar nga fshati Gorjan. Gjatë një kontrolli në trafik, zyrtarët policorë kanë ndaluar një automjet udhëtarësh “Audi” me targa të Gostivarit, të cilin ai e drejtonte, dhe pas masave të ndërmarra është konstatuar se ai e drejtonte automjetin pa patentë shofer. Automjeti është sekuestruar dhe pas dokumentimit të plotë të rastit ndaj tij do të ngrihet kallëzimi përkatës.

Kemi vizion të qartë për ndryshim të plotë në transportin hekurudhor. Nëse trashëguam kompani në prag të kolapsit dhe falimentimit, tani kemi trafik mallrash që po shënon rritje serioze, kemi rritje të numrit të pasagjerëve, kemi investime të mëdha në ndërtimin e hekurudhave të reja, po ndjekim politikën e zhvillimit të Hekurudhave si zemër e ekonomisë, porositi zëvendëskryeministri dhe ministri i Transportit, Aleksandar Nikolloski pas nënshkrimit të Marrëveshjes së grantit me drejtoreshën e Bankës Botërore për Maqedoninë, Kerol Mezhevan.

Marrëveshja e cila është në vlerë prej një milion euro, duhet të ofrojë mbështetje në reformën dhe ristrukturimin e HM “Transport” me qëllim krijimin e një kompanie funksionale.

Nikolloski theksoi se me zgjedhjen e kësaj Qeverie, përparësi është që HM Transport të modernizohet.

“Së pari, bëmë ndryshime ligjore që praktikisht e shpëtuan kompaninë, duke pasur parasysh se vendimet e fundit të Qeverisë së mëparshme nënkuptonin mbylljen e HM Transport. Pastaj hymë në një reformë serioze brenda Hekurudhës Transport dhe rezultatet e para janë tashmë të dukshme. Këtë vit kemi shifra pozitive në katër muajt e parë. Gjithashtu kemi parë një rritje të numrit të pasagjerëve të transportuar çfarë është veçanërisht e rëndësishme dhe që më gëzon shumë, një rritje serioze të trafikut të mallrave”, theksoi Nikolloski.

Ai shtoi se BE-ja punon për transformimin e dy kompanive hekurudhore si pjesë e Planit të Rritjes së BE-së.

Advertisement

“Pikërisht ky projekt që po e fillojmë sot me nënshkrimin e këtij granti nga Banka Botërore për të cilin dua ta falënderoj, është fillimi i zbatimit të këtij projekti, që do të thotë një reformë e plotë dhe thelbësore. Paralelisht, do të vazhdojmë edhe me prokurimin e trenave për të rinovuar flotën, diçka që është veçanërisht e rëndësishme. Paralelisht, tashmë kemi nënshkruar marrëveshje me një institucion tjetër financiar për prokurimin e lokomotivave elektrike, të cilat janë shumë të rëndësishme në zhvillimin e trafikut të mallrave. Duhet të blihen të paktën pesë lokomotiva elektrike”, deklaroi zëvendëskryeministri Nikolloski.

Ai theksoi se në kuadër të Planit të Rritjes, po punohet edhe në krahun perëndimor të Korridorit 8.

“Fillimisht do të jetë Shkup – Jegunoc – Tetovë – Gostivar, faza e dytë Gostivar – Kërçovë dhe faza e tretë nga Kërçova në Ohër, Strugë dhe lidhja me Shqipërinë. Nëse kësaj i shtojmë hekurudhën me shpejtësi të lartë në Korridorin 10 për të cilën tashmë po i finalizojmë dokumentet, atëherë është e qartë se kemi një vizion për transformimin e plotë të hekurudhave”, tha Nikolloski, duke falënderuar Bankën Botërore për fondet e grantit dhe për mbështetjen e vazhdueshme për Maqedoninë e Veriut.

Pas mbledhjes së Komitetit Ekzekutiv të VMRO-DPMNE-së, e cila pritet të mbahet sonte, opinioni publik pritet të mësojë detajet e rindërtimit të Qeverisë, përfshirë ministrat që do të largohen dhe ata që do të marrin drejtimin e resorëve qeveritarë njofton INA.

Kryeministri Hristijan Mickoski një ditë më parë refuzoi të zbulojë emra apo ndarje konkrete të resorëve, duke theksuar se për këtë do të flasë vetëm pas përfundimit të mbledhjes së partisë.

“Nuk kemi biseduar për zgjidhje personale apo emra. Në parim kemi marrëveshje për resorët. Siç kam thënë edhe më parë, derisa të përfundojë mbledhja e Komitetit Ekzekutiv, nuk do të komentoj as resorë e as emra”, deklaroi Mickoski në Trubarevë.

Edhe pse ende nuk ka konfirmime zyrtare, partnerët e koalicionit tashmë kanë bërë të ditura pritjet e tyre lidhur me rindërtimin e kabinetit qeveritar.

Sipas koalicionit VLEN, pas riformatimit të Qeverisë ai pritet të drejtojë gjashtë ministri. Tre prej tyre do të jenë resorë të rinj – Ministria e Drejtësisë, Ministria e Kulturës dhe Ministria për Marrëdhënie ndërmjet Bashkësive, ndërsa VLEN do të heqë dorë nga Ministria e Shëndetësisë dhe ajo e Politikës Sociale.

Advertisement

Nga ZNAM deklarojnë se “të gjitha opsionet janë në tavolinë”, pa dhënë më shumë hollësi. Megjithatë, sipas informacioneve që qarkullojnë, kjo parti pritet të humbasë drejtimin e Ministrisë së Drejtësisë, ndërsa si alternativë mund t’i besohet Ministria e Bujqësisë.

Ndërkohë, zëvendëskryeministri dhe ministri për Marrëdhënie ndërmjet Bashkësive, Ivan Stoilkoviq, përmes një postimi në Facebook bëri të ditur se po largohet nga posti, duke theksuar se ministrinë e lë në gjendje të mirë.

Përveç ndarjes së resorëve, vëmendja mbetet e përqendruar edhe te emrat që do të marrin drejtimin e ministrive. Rindërtimi pritet të sjellë ndryshime të rëndësishme në përbërjen e kabinetit qeveritar, ndërsa mbetet të shihet nëse kryeministri do të propozojë vetëm zëvendësimin e ministrave të caktuar apo do të kërkojë votim për një përbërje të re të Qeverisë.

Detajet zyrtare të rindërtimit pritet të bëhen të ditura pas përfundimit të mbledhjes së organeve të VMRO-DPMNE-së, e paralajmëruar për pas orës 20:00.(INA)

Advertisement