Dogana e Maqedonisë së Veriut ka sekuestruar 168.7 kilogramë duhan të prerë, gjatë një aksioni kontrollues në Tregun e Gjelbër dhe sheshin e qytetit në Prilep. Sipas Drejtorisë së Doganave, me këtë veprim është parandaluar shmangia e pagesës së akcizës në vlerë prej 463.787 denarësh.

Nga Drejtoria e Doganave bëjnë të ditur se gjatë kontrolleve janë kapur gjashtë persona duke shitur duhan pa pulla akcize, në kundërshtim me legjislacionin në fuqi. Ndaj tyre janë iniciuar procedura përkatëse pranë gjykatës kompetente dhe Komisionit për Kundërvajtje.

„Gjashtë persona u kapën duke shitur duhan pa pulla akcize, duke shkelur rëndë ligjin, duke dëmtuar buxhetin e shtetit dhe duke rrezikuar shëndetin e qytetarëve”, thuhet në njoftimin e Doganës.

Ky është aksioni i dytë i këtij lloji i realizuar nga Drejtoria e Doganave brenda një periudhe të shkurtër kohore. Në një kontroll të mëparshëm në tregun e Çairit, autoritetet kishin sekuestruar edhe 135 kilogramë duhan të prerë.

Advertisement

Drejtoria e Doganave njofton se do të vazhdojë intensifikimin e kontrolleve në terren dhe hetimeve për importin e duhanit dhe produkteve të tij, me qëllim luftimin e tregtisë së paligjshme dhe parandalimin e shmangies së detyrimeve doganore dhe akcizore.

Vetëm 0,8 pikë përqindjeje e ndajnë Bashkimin Demokratik për Integrim (BDI) nga koalicioni VLEN në mbështetjen e qytetarëve, sipas rezultateve të përmbledhura të tri anketave të realizuara gjatë muajit tetor në Maqedoninë e Veriut.

Sipas të dhënave të prezantuara nga kryeministri Hristijan Mickoski në një takim me gazetarët, BDI-ja ka mbështetje prej 7,9 për qind, ndërsa VLEN-i 7,1 për qind, duke treguar një diferencë të ngushtë mes dy subjekteve kryesore politike shqiptare.

Në nivel shtetëror, VMRO-DPMNE prin me 24 për qind të mbështetjes, e ndjekur nga LSDM-ja me 8,5 për qind. Pas tyre renditen BDI-ja me 7,9 për qind, VLEN-i me 7,1 për qind, Levica me 6 për qind dhe ZNAM-i me 2 për qind.

Të dhënat janë përmbledhje e tri anketave të realizuara nga tri agjenci të ndryshme, me porosi të VMRO-DPMNE-së. Dy prej tyre janë zhvilluar përmes anketimit në terren, ndërsa njëra përmes telefonit.

BDI ruan mbështetjen, VLEN shënon rritje

Advertisement

Krahasuar me anketën e muajit prill, BDI-ja ruan të njëjtin nivel mbështetjeje prej 7,9 për qind, ndërsa VLEN-i ka shënuar rritje nga 6,2 në 7,1 për qind.

Në të njëjtën periudhë, VMRO-DPMNE ka zbritur nga 25,7 në 24 për qind, ndërsa LSDM-ja ka shënuar një rritje të lehtë, nga 8,3 në 8,5 për qind.

Të dhënat krahasuese nga shkurti deri në tetor tregojnë se mbështetja për partitë ka qenë relativisht stabile. VMRO-DPMNE ka lëvizur nga 24 deri në 25 për qind, LSDM-ja nga 8 deri në 9,3 për qind, BDI-ja nga 7,5 deri në 8 për qind, ndërsa VLEN-i nga 6,5 deri në 7 për qind. Levica ka regjistruar mbështetje nga 5 deri në 6 për qind, ndërsa ZNAM-i nga 2 deri në 2,5 për qind.

Korrupsioni dhe ekonomia, shqetësimet kryesore të qytetarëve

Anketat kanë përfshirë edhe perceptimet e qytetarëve për problemet kryesore me të cilat duhet të merret Qeveria. Korrupsioni dhe kriminaliteti renditen në vendin e parë me 33 për qind, ndërsa ekonomia dhe standardi jetësor pasojnë me 27 për qind.

Advertisement

Sa i përket integrimit evropian, sipas rezultateve të prezantuara, rreth dy të tretat e qytetarëve mbështesin anëtarësimin e Maqedonisë së Veriut në Bashkimin Evropian.

Megjithatë, në të njëjtën kohë po rritet kundërshtimi ndaj ndryshimeve kushtetuese që kërkohen në kuadër të procesit të integrimit evropian. Ky kundërshtim është veçanërisht i theksuar te qytetarët e komunitetit maqedonas, ku rreth 80 për qind shprehen kundër ndryshimeve kushtetuese, ndërsa prirja e kundërshtimit po rritet edhe te komunitetet e tjera etnike.

Rezultatet janë prezantuar nga kryeministri Mickoski, ndërsa bëhet fjalë për anketa të porositura nga VMRO-DPMNE-ja dhe jo për një hulumtim të vetëm të realizuar nga një institucion i pavarur.(INA)

Kryetari i LSDM-së, Venko Filipçe, i ka bërë thirrje Prokurorisë Themelore Publike që të hetojë rolin e kryeministrit Hristijan Mickoski në procesin e hyrjes së Alta Bank në Maqedoninë e Veriut, duke kërkuar sqarime për atë që e cilësoi si deklarata të pavërteta dhe manipulim të opinionit publik nga ana e kreut të Qeverisë.

„Kjo është mënyra se si ata komunikojnë me publikun, sepse duan ta largojnë të gjithë përgjegjësinë nga vetja. Por kjo nuk do të jetë e mundur. Kjo është edhe një arsye tjetër që Prokuroria Themelore Publike të përfshihet dhe të hetojë plotësisht pse kryeministri ka nevojë të gënjejë dhe të manipulojë publikun në këtë mënyrë”, deklaroi Filipçe.

Ai akuzoi kryeministrin Mickoski se, në vend që të jepte përgjigje konkrete para trupit parlamentar, kishte paraqitur pretendime të pavërteta lidhur me vendimet e qeverisë së udhëhequr nga LSDM-ja në vitin 2023, për gjoja krijimin e marrëdhënieve afariste me Alta Bankën e Serbisë.

„Këtë herë ai shkoi shumë larg, sepse bëri një akuzë serioze. Prezantoi një dokument të cilin nuk e lexoi, por vetëm e citoi në mënyrë të pretenduar dhe të pasaktë. Qëllimi i kësaj konference për media është të sqarojmë se kryeministri sot, gjatë seancës dëgjimore mbikëqyrëse, tha një gënjeshtër të hapur. Ai pretendoi se Qeveria e LSDM-së në vitin 2023 kishte marrë vendim për të hyrë në marrëdhënie biznesi me Alta Bankën e Serbisë”, tha Filipçe.

Advertisement

Duke prezantuar dokumentacionin përkatës, lideri i LSDM-së theksoi se Qeveria e atëhershme nuk i kishte dhënë Davor Macurës pëlqimin për blerjen e aksioneve që ishin në pronësi të Ministrisë së Financave të Maqedonisë së Veriut.

Filipçe kërkoi që institucionet kompetente të shqyrtojnë të gjitha rrethanat e rastit dhe të përcaktojnë përgjegjësinë eventuale për procesin e hyrjes së Alta Bank në tregun maqedonas.