Lajme nga vendi

Osmani: Në vitin 2023 sfidë kryesimi me OSBE, të bashkohemi kundër ndarjeve

Published

4 years ago

December 31, 2022

Ministri i Punëve të Jashtme, Bujar Osmani, në fjalimin e tij të Vitit të Ri para opinionit, dëshiroi që viti 2023 të jetë më i sukseshëm i cili do të na bashkojë kundër ndarjeve dhe do të krijojë mundësi t’i përkushtohemi progresit, me, siç thotë ai, një vështrim drejt së ardhmes, që është e vetmja rrugë drejt suksesit.

Sipas Osmanit, fillimi i negociatave për anëtarësim në Bashkimin Evropian pas 17 viteve të statusit kandidat, përshpejtimi i procesit të reformave të BE-së, lançimi i Dialogut Strategjik me SHBA-të dhe nënshkrimi i marrëveshjes së Frontex-it, që për shumë vite kishte ngecur për shkak të mosmarrëveshjes për përdorimin e gjuhës maqedonase, janë një nga sukseset më të rëndësishme të cilat Maqedonia e Veriut ka arritur në fushën e politikës së jashtme në vitin 2022, e të cilat drejtpërdrejt ndikojnë në përparimin e vendit.

Osmani, në fjalimin e tij të Vitit të Ri para opinionit, i theksoi përfitimet e negociatave me BE-në, për të cilat tha se do t’i ndjejmë shumë shpejt, duke potencuar se çdo hap përpara në negociata do të nënkuptojë edhe hap përpara për sa i përket cilësisë së jetës për çdo qytetar.

“Në vitin 2022 sollëm vendime që shumë shpejt e bënë realitet ëndrrën tonë për një vend të fuqishëm ekonomikisht. I filluam negociatat me Bashkimin Evropian, me çka e realizuam qëllimin kryesor strategjik të vendosur para 30 viteve. Fillimi i negociatave me BE-në nënkupton forcimin e fuqisë blerëse të qytetarëve, por edhe uljen e cenueshmërisë sociale të shoqërisë sonë dhe kjo është gjëja më e rëndësishme për jetë cilësore dhe të sigurt të të gjithë qytetarëve tanë”, theksoi Osmani.

Vitin e kaluar, thekson Osmani vendi e filloi edhe anëtarësimin në Unionin për Mesdheun, si një nga organizatat më të mëdha multilaterale për bashkëpunimin e Evropës me vendet e Mesdheut, ndërsa ishte organizuar edhe edicioni i dytë i “Forumit të Prespës për Dialog”, me qëllim që Maqedonia e Veriut të vazhdojë të jetë ndërtuese e urave në të gjithë rajonin.

Sipas Osmanit, sfida më e madhe në vitin e ardhshëm fillon më 1 janar 2023, kur Republika e Maqedonisë së Veriut zyrtarisht fillon Presidencën me OSBE-në – Organizatën më të madhe Rajonale për Siguri dhe Bashkëpunim, e cila përfshin 57 shtete pjesëmarrëse nga Evropa, Azia Qendrore dhe Amerika e Veriut, , ndërsa si kryesues zyrtar i OSBE-së për vitin 2023 është emëruar Ministri i Punëve të Jashtme, Bujar Osmani.

“2023 do të jetë një vit i rëndësishëm për pozicionin ndërkombëtar të vendit. Forcimi i pozicionit ndërkombëtar të vendit nënkupton investim afatgjatë në zhvillimin ekonomik, mundësi të reja për të rinjtë dhe stabilitet. Në kushtet e luftës në rajonin e OSBE-së dhe marrëdhënieve të rënduara politike mes vendeve anëtare, do të fokusohemi në qetësimin e tensioneve, rikthimin e besimit, prosperitetin dhe sigurinë e përgjithshme të njerëzve”, theksoi Ministri i Punëve të Jashtme dhe Kryesuesi i OSBE-së në vitin 2023, Bujar Osmani në fjalimin e tij të Vitit të Ri për publikun.

Kryesimi me OSBE-në për Maqedoninë e Veriut paraqet një lloj njohjeje për vendin, i cili nga përdorues i mekanizmave të sigurisë bëhet aktor aktiv në gjenerimin e stabilitetit në një kontekst më të gjerë rajonal.

“Maqedonia e Veriut deri më tani, shpesh here e ka treguar kapacitetin e saj, se përmes dialogut politik, mjeteve demokratike dhe qeverisjes demokratike, i realizon qëllimet e veta, si në aspektin vendor ashtu edhe në atë ndërkombëtar. Tani kemi mundësi që me pjekurinë dhe njohuritë tona të jemi lojtar kyç, t’i udhëheqim dhe të kontribuojmë në politikat dhe proceset ndërkombëtare”, theksoi Ministri Osmani.

“Fokusi ynë, si vend kryesues, do të jenë misionet në terren. Do të ndërmarrim dhe mbështesim aktivitete konkrete me qëllim lehtësimin e jetës së njerëzve, avancimin të të drejtave dhe lirive të tyre”, theksoi Osmani.

Përveç fokusit në terren në zonat e përfshira nga konflikti, prioritetet e Maqedonisë së Veriut si kryesuese do të jenë riafirmimi i përfitimeve të OSBE-së dhe rinovimi i dialogut, si dhe rikthimi i besimit dhe investimi në paqen dhe qëndrueshmërinë e OSBE-së, si mënyra më e mirë për t’u ballafaquar me sfidat e sigurisë

Lajme nga vendi

Mickoski publikon dokumentin: Qeveria e 2023 LSDM-BDI i hapi dyert Alta Bankës!

Published

13 seconds ago

November 11, 2026

TetovaExpres

Kryeministri Hristijan Mickoski ka publikuar një dokument zyrtar nga mbledhja e Qeverisë së vitit 2023, duke nxjerrë në dritë faktin se ish-pushteti i LSDM-së dhe BDI-së kishte miratuar hyrjen e Avokaturës së Shtetit në marrëdhënie afariste me Alta Bankën e afaristit serb Davor Macura.

Gjatë dëgjimit mbikëqyrës në Kuvend për situatën në Alta Banka Manastir, Mickoski iu përgjigj akuzave të opozitës duke argumentuar se pikërisht qeverisja e kaluar i dha dritën jeshile shitjes së aksioneve shtetërore ndaj këtij kapitali.

„Unë do të doja të prezentoj një dokument këtu para opinionit publik maqedonas, e ai është një fragment nga Procesverbali nga mbledhja e 194-të e Qeverisë e mbajtur më 24 tetor 2023. Atëherë kryetar i Qeverisë ishte zotëria Dimitar Kovaçevski dhe në vetë mbledhjen e Qeverisë hapej tema për Alta Banka AD Beograd, gjegjësisht ministri i atëhershëm i financave, Fatmir Besimi, doli me informacion në të cilin i kërkonte Qeverisë t’i miratojë Avokaturës së Shtetit të hyjë në marrëdhënie afariste me Alta Banka – Serbi”, theksoi Mickoski.

Sipas tij, që në vitin 2023, qeveria e LSDM-së dhe BDI-së në mbledhje të qeverisë i jep udhëzim Avokaturës së Shtetit të hyjë në marrëdhënie afariste me Alta Bankën me të njëjtin këtë pronar, Davor Macura.

“Këtu shtrohet pyetja se a e dinin ata atëherë se kush është Davor Macura apo kur vendosën t’ia vendosnin në shitje aksionet që i posedon shteti në bankën që e blen Davor Macura, a kishin ndonjë ide se ai është kapital rus, para ‘të pista’, para të fituara në mënyrë kriminale apo atëherë kjo nuk vlente? Në atë mbledhje të qeverisë ishte e pranishme gjysma e grupit parlamentar të LSDM-së në cilësinë e anëtarëve të Qeverisë. Së pari kryetari i qeverisë, Dimitar Kovaçevski, pastaj aty ishte i pranishëm Oliver Spasovski si ministër i punëve të brendshme, ministër i bujqësisë ishte Ljupço Nikolovski, ministër i transportit ishte Bllagoj Boçvarski dhe anëtarë të tjerë të Qeverisë. Të gjithë ata kanë votuar për t’i dhënë të drejtë Avokaturës së Shtetit që aksionet që janë pronë e Maqedonisë në bankën që e blen Davor Macura, t’ia tjetërsojnë Davor Macurës.
I çfarë lloji ishte kapitali i Alta Bankës në vitin 2023 apo atëherë kishte rrethana të tjera dhe pushteti i atëhershëm kishte bashkëpunim të ngushtë me Aleksandar Vuçiqin? Dëshiroj që opinioni publik maqedonas ta dijë qartë këtë, se Maqedoninë si shtet në marrëdhënie afariste me Alta Bankën e Macurës e fut Qeveria e LSDM-së dhe BDI-së, me propozim të ministrit të atëhershëm Fatmir Besimi, në mbledhjen ku votuan gjysma e grupit parlamentar të LSDM-së në cilësinë e anëtarëve të asaj qeverie.“, theksoi Mickoski.(INA)

Lajme nga vendi

Gostivari shpallet “Qytet Mik i të Rinjve” për vitin 2026 në Rajonin e Pollogut

Published

3 minutes ago

November 11, 2026

TetovaExpres

Komuna e Gostivarit fiton çmimin kombëtar “Youth Friendly Town”, si vlerësim për avancimin e politikave rinore dhe mbështetjen e pjesëmarrjes aktive të të rinjve.

Komuna e Gostivarit është fituese e çmimit kombëtar “Qytet Mik i të Rinjve” (Youth Friendly Town) për Rajonin e Pollogut për vitin 2026. Ky çmim përbën një vlerësim të rëndësishëm për angazhimin e komunës në krijimin dhe zbatimin e politikave lokale që mbështesin të rinjtë dhe nxisin pjesëmarrjen e tyre aktive në jetën shoqërore.

Çmimi i është dorëzuar kryetarit të Komunës së Gostivarit, Valbon Limani, në kuadër të Forumit të Katërt Nacional për Punë Rinore, i cili mbahet në Qendrën Rinore në Ohër.

Ky vlerësim vjen pas një hulumtimi të strukturuar nacional nëpër komunat e vendit, përmes të cilit është evidentuar progresi në përmbushjen e obligimeve që dalin nga Ligji për Pjesëmarrjen e të Rinjve dhe Politikat Rinore. Në bazë të rezultateve, janë përzgjedhur komunat më të suksesshme në secilin prej tetë rajoneve planore.

Përzgjedhja e Gostivarit si komuna më e suksesshme në Rajonin e Pollogut dëshmon përkushtimin institucional dhe angazhimin e vazhdueshëm ndaj të rinjve. Ky çmim përbën një motiv shtesë për vazhdimin e investimeve në krijimin e mundësive, hapësirave dhe mekanizmave që fuqizojnë rolin e të rinjve në proceset vendimmarrëse dhe në zhvillimin lokal.

Forumi organizohet nga Koalicioni i Organizatave Rinore SEGA dhe Qendra Rinore Ohër, në partneritet me Ministrinë e Politikës Sociale, Demografisë dhe Rinisë, UNDP-në, UNFPA-në, Zyrën Rajonale për Bashkëpunim Rinor (RYCO) dhe OSBE-në.

Lajme nga vendi

Këshilli gjyqësor zgjodhi Subhi Jakupin për kryetar në Gjykatën Administrative

Published

5 minutes ago

November 11, 2026

TetovaExpres

Subhi Jakupi është zgjedhur kryetar i Gjykatës Administrative në Maqedoninë e Veriut, por emërimi i tij është shoqëruar me kundërshtime lidhur me përvojën e tij profesionale në fushën e gjyqësorit.

Sipas raportimit të Plusinfo, Joshevska ka kundërshtuar zgjedhjen e Jakupit, duke ngritur shqetësime për faktin se ai nuk ka përvojë gjyqësore në institucionin të cilin tashmë do ta drejtojë.

Vërejtjet e saj kanë rikthyer në vëmendje çështjen e kritereve profesionale dhe përvojës së nevojshme për drejtimin e një institucioni të rëndësishëm të sistemit gjyqësor.

Zgjedhja e Jakupit pritet të jetë në fokus të debatit lidhur me standardet dhe kriteret që duhet të përmbushin drejtuesit e institucioneve gjyqësore.