Lajme nga vendi

EShS: Mungesa e kuadrit nuk varet nga ne, por nga institucione tjera

Published

4 years ago

January 21, 2023

Enti Shtetëror i Statistikave do ta ketë të vështirë ta kapërcejë problemin e mungesës së kuadrit, diçka që nga Komisioni Evropian në raportin e vitit 2022 u kërkua të zgjidhet në mënyrë urgjente. KE-ja kërkoi gjithashtu edhe sigurimin e burimeve të mjaftueshme financiare për EShS-në. Nga ky institucion shprehen se në katër vitet e fundit nuk ka pasur as edhe një punësim, kurse ka pasur dalje të madhe të stafit. Në dhjetor të vitit që lam pas, EShS, shpalli konkurs për punësim, i cili pritet të zbusë sadopak këtë problematikë.

“Në lidhje me konkursin, procedura ka përfunduar më 9 janar dhe janë shpallur vendimet për pranimin e 39 kandidatëve (shpallja është paraqitur për 45 punësime të reja, por 6 nuk janë zbatuar për arsye të ndryshme). Për shkak të shtyrjes së procedurës së përzgjedhjes, zbatimi i plotë u zhvendos për në vitin 2023, kështu që aktualisht jemi në pritje të sërishme të pëlqimit financiar nga Ministria e Financave për t’u dhënë zyrtarisht vendimet punonjësve të rinj dhe të fillojnë punën”, thonë për Portalb.mk nga Enti i statistikave.

Në Entin e Statistikave ka ende mungesë të personelit (edhe përkundër këtyre 39 punësimeve të reja), duke pasur parasysh se në 4 vitet e fundit ka pasur një dalje të madhe të kuadrit dhe asnjë punësim të vetëm, thonë nga EShS.

“Plani i Entit është të vazhdojë me procedurat e rregullta për punësime të reja përmes planit të punësimit që e përgatisim çdo vit. Nëse ai plan do të zbatohet apo jo, varet nga institucionet e tjera, jo nga EShS. Nuk ka asnjë mundësi tjetër për të plotësuar nevojat e stafit të ri”, theksojnë nga EShS.

Në aspektin financiar, shtojnë ata, EShS financohet nga Buxheti i RMV-së dhe nga mjetet e ndara për vitin 2023, mund të konstatohet se ato janë të mjaftueshme për nevojat themelore të institucionit – pagat dhe komunalet.

“Nga këtu, sa i përket fondeve për hulumtime statistikore ekzistuese, punësime të reja, zhvillim dhe zbatim të hulumtimeve të reja statistikore – nuk mund të flasim fare për plotësimin e nevojave të Entit”, nënvizojnë në EShS.

Kujtojmë se ashtu si edhe në kapitujt tjerë, edhe në kapitullin 18 që ka të bëjë me statistikat, nuk është vërejtur ndonjë përparim i madh në raportin e Komisionit Evropian (KE) për Maqedoninë e Veriut. Vendi vazhdon të mbetet mesatarisht i përgatitur. KE-ja e sheh si urgjente nevojën e sigurimit të stafit adekuat dhe burimeve të mjaftueshme financiare për Entin shtetëror të statistikave, si dhe që ky institucion në vijim të publikojë tërësisht rezultatet e regjistrimit të popullsisë që u zhvillua në vitin 2021.

Komisioni nënvizoi se është bërë përparim i mirë, veçanërisht me publikimin e grupit të parë të të dhënave të regjistrimit të popullsisë në pranverën e vitit 2022. Përmirësime janë vërejtur në të gjitha fushat statistikore dhe në përafrimin e mëtejshëm të statistikave sektoriale me standardet e BE-së, duke përfshirë përdorimin e zgjeruar të burimeve administrative.

Theksohet se nevojiten përpjekje të vazhdueshme për të përmirësuar shtrirjen dhe cilësinë e të dhënave të statistikave makroekonomike dhe sociale.

Për shkak se vendi rekomandimet e vitit të kaluar nuk i zbatoi plotësisht, në vitin e ardhshëm, duhet në veçanti të:

publikojë të gjitha rezultatet e regjistrimit të popullsisë deri në fund të vitit 2022 dhe të sigurohet që rezultatet e regjistrimit të merren parasysh në vendimmarrje dhe shpërndarjen e burimeve;
sigurohet urgjentisht personel adekuat dhe burime të mjaftueshme financiare për Entin Shtetëror të Statistikave;
vazhdojë përafrimi i llogarive financiare dhe llogarive kombëtare tremujore me Sistemin evropian të llogarive 2010 (ESA 2010).
Rregullat e BE-së kërkojnë që Shtetet Anëtare të jenë në gjendje të prodhojnë statistika të cilësisë së mirë në përputhje me parimet e Kodit të praktikës së Statistikave evropiane dhe bazuar në pavarësinë profesionale, paanshmërinë, besueshmërinë, transparencën dhe konfidencialitetin. Janë parashikuar rregulla të përbashkëta për metodologjinë, prodhimin dhe shpërndarjen e informacionit statistikor.

Sidoqoftë, nëse vendi nuk do të kishte zbatuar regjistrimin e pupullësisë në vitin 2021, vështirë se do të merrte lëvdatat që i ka aktualisht në këtë kapitull. Maqedonia nuk arriti të bëjë regjistrimin për rreth 20 vite, ai paraprak, gjejgësisht para vitit 2021 ishte realizuar në vitin 2002. Dhjetë vjet më vonë apo në vitin 2011, ai nuk u mbajt për shkak të përplasjeve mes partive politike shqiptare dhe maqedonase, mbi mënyrën e realizimit, përkatësisht për përfshirjen ose jo të qytetarëve që janë jetojnë përkohësisht jashtë vendin, e që shumica prej tyre janë shqiptarë. Ishin shpenzuar dy milionë euro, ndërsa pati edhe një procedurë parahetimore kundër dy drejtuesve të koalicionit të atëhershëm qeveritar, Nikolla Gruevskit dhe Ali Ahmetit për ndërprerjen e regjistrimit, por kjo procedurë ka përfunduar pa epilog gjyqësor. /Portalb

Lajme nga vendi

“KIEL MAQEDONI” INVESTON 1,5 MILIONË EURO NË TETOVË

Published

7 minutes ago

November 12, 2026

TetovaExpres

Ministri i Ekonomisë dhe Punës, Besar Durmishi, ka vizituar kompaninë “Kiel Maqedoni”, në Zonën Zhvillimore Industriale Teknologjike në Tetovë. Durmishi u njoh nga afër me kapacitetet prodhuese të kompanisë, zgjerimin e veprimtarisë dhe investimin e ri, në vlerë prej rreth 1,5 milionë eurosh, si dhe me planet për punësime shtesë.

Ministri i Ekonomisë dhe Punës, Besar Durmishi, bashkë me deputeten Kaltrina Beqiri dhe Zv/kryetarin e Tetovës Albi Qamili, kanë vizituar kompaninë “Kiel Maqedoni” në Tetovë, ku ka theksuar rëndësinë e investimeve të huaja në zhvillimin ekonomik të vendit, modernizimin e industrisë dhe krijimin e vendeve të reja të punës.

Gjatë vizitës, ministri Durmishi u njoh nga afër me kapacitetet prodhuese të kompanisë, e cila ka realizuar investime prej mbi 11 milionë eurosh në objektin ekzistues në Zonën Ekonomike në Tetovë, ndërsa ka vendosur edhe një linjë të re të automatizuar të lyerjes me pluhur, investim ky në vlerë prej rreth 1,5 milionë eurosh.

Durmishi theksoi se “Kiel Maqedoni” është shembull konkret i një investimi të huaj që jo vetëm ka arritur të zhvillohet me sukses, por vazhdon të zgjerojë kapacitetet dhe të krijojë perspektivë për punësime të reja.

KIEL Maqedoni është pjesë e grupit prestigjioz gjerman Franz Kiel Group, një nga prodhuesit kryesorë evropianë të sistemeve të ulëseve për udhëtarë në autobusë dhe automjete hekurudhore, të destinuara për transportin urban, rajonal dhe ndërqytetës.

Kompania, e cila ka filluar veprimtarinë vendin tonë në vitin 2017, aktualisht numëron rreth 190 të punësuar në dy objektet e saj prodhuese në Tetovë dhe Zhelinë.

Me zgjerimin e kapaciteteve dhe funksionalizimin e linjës së re, ku tashmë janë angazhuar pesë punëtorë, pritet të krijohen mundësi për punësime shtesë./Tv Koha/

Lajme nga vendi

INFLACIONI NË TETOR 3.3% – MINISTRI DURMISHI THOTË SE E NDJEKIN SITUATËN!

Published

24 minutes ago

November 12, 2026

TetovaExpres

Inflacioni në Maqedoni në tetor të vitit 2026 arriti në 3,3 për qind në nivel vjetor, krahasuar me 2,7 për qind në shtator, ndërsa shpenzimet e jetesës vetëm brenda një muaji u rritën për 0,4 për qind.

Rritja më e madhe vjetore e çmimeve është regjistruar te transporti, me 9,5 për qind, ndërsa ushqimet dhe pijet joalkoolike në tetor u shtrenjtuan sërish për 0,7 për qind krahasuar me muajin paraprak.

Të dhënat e Entit Shtetëror të Statistikave tregojnë se shtrenjtimi vjetor nuk është i shpërndarë në mënyrë të barabartë. Ushqimet dhe pijet joalkoolike janë 2,1 për qind më të shtrenjta se në tetorin e vitit të kaluar, ndërsa shpenzimet për banim, ujë, energji elektrike, gaz dhe lëndë të tjera djegëse janë rritur për 3,7 për qind.

Nga ana tjetër, Ministria e Ekonomisë dhe Punës vlerëson se lëvizjet e çmimeve në tetor, për momentin, nuk e kanë cenuar stabilitetin relativ të tregut.

Ministria paralajmëron se do të vazhdojë të monitorojë çmimet, veçanërisht ato të produkteve bazë ushqimore.

Shifrat e tetorit nuk tregojnë një goditje të re inflacioniste të përmasave të viteve të mëparshme, por dëshmojnë për një përshpejtim që nuk duhet nënvlerësuar.

Kjo, veçanërisht nëse rritja mujore e çmimeve të ushqimeve vazhdon dhe nëse kostot e larta të transportit fillojnë të reflektohen më fuqishëm edhe në çmimet e produkteve dhe shërbimeve.

Të dhënat e ardhshme do të tregojnë nëse tetori ishte vetëm një luhatje afatshkurtër apo fillimi i një periudhe të re me presion më të madh mbi çmimet.

Lajme nga vendi

MOTI: ERËRA TË FUQISHME, TEMPERATURA PRANVERE DHE PLUHUR SAHARE!

Published

51 minutes ago

November 12, 2026

TetovaExpres

Mesi i nëntorit sjell mot të pazakontë në Maqedoni. Temperaturat do të arrijnë deri në 24 gradë Celsius, por nuk do të mungojnë as erërat e forta, reshjet lokale dhe pluhuri saharian. Ndërkohë, pjesë të tjera të Ballkanit përballen me reshje të dendura, erëra uraganike dhe rënie të ndjeshme të temperaturave.

Mesi i nëntorit sjell një tablo të pazakontë meteorologjike. Ndërsa në Maqedoni pritet mot i ngrohtë, me temperatura deri në 24 gradë Celsius, erëra të forta dhe pluhur saharian, në pjesët perëndimore të Ballkanit paralajmërohen reshje të dendura shiu, erëra me fuqi uragani dhe rrezik nga përmbytjet e menjëhershme.

Siç pwrcjell Tv Koha, njoftimin e “MeteoAlarm”, cikloni nga Oqeani Atlantik do të ndikojë në motin e rajonit gjatë datave 12 dhe 13 nëntor.

Në Maqedoni, ndikimi më i theksuar do të jetë përmes rrymave ajrore jugore dhe jugperëndimore, temperaturave të larta dhe reshjeve lokale. Në Maqedoni, sic njofton Tv Koha, era në disa vende do të kalojë 80 kilometra në orë.

Pavarësisht ndikimit të ciklonit, në Maqedoni pritet mot jashtëzakonisht i ngrohtë për këtë periudhë të vitit.

Sipas parashikimit të “MeteoAlarm”, temperaturat maksimale ditore do të lëvizin nga 17 deri në 24 gradë Celsius, që është rreth 8 deri në 10 gradë mbi mesataren e zakonshme për muajin nëntor.

Rrymat ajrore jugore dhe jugperëndimore mund të sjellin pluhur dhe rërë nga Sahara edhe në rajonin tonë. Si pasojë, sic njofton Tv Koha, atmosfera mund të duket e mjegulluar, ndërsa në disa zona mund të ketë edhe ulje të dukshmërisë.

Nëse reshjet e shiut përkojnë me praninë e pluhurit në ajër, shiu mund të lërë gjurmë balte në automjete, dritare dhe sipërfaqe të jashtme.

Në pjesën perëndimore të Ballkanit priten reshje të dendura dhe erëra uraganike

Sipas parashikimit, dukuritë më të fuqishme meteorologjike priten përgjatë bregdetit të Adriatikut, në Bosnjë e Hercegovinë, Mal të Zi dhe në pjesën veriore të Shqipërisë.

Parashikimi për ciklonin paralajmëron dallime të konsiderueshme mes Maqedonisë dhe pjesës perëndimore të Ballkanit: në vendin tonë do të mbizotërojë moti i ngrohtë, ndërsa në disa pjesë të rajonit priten reshje shumë më intensive, erëra të fuqishme dhe rënie e menjëhershme e temperaturave./Tv Koha/