Me një aksion gueril urban të titulluar “Kontrastet shoqërore”, organizatat joqeveritare u dolën në mbështetje studentëve dhe luftës së tyre për një standard më të mirë jetese.

Me dy tavolina të ndryshme dhe dy meny të ndryshme, njëra për deputetët dhe tjetra për studentët, në sheshin e vogël pranë Qendrës Tregtare “Bunjakovec” në Shkup, grupi “Aksionet artistike urbane” synon të paraqesë edhe vizualisht pabarazinë në shoqërinë e Maqedonisë.

Siç shihet në aksion, aktivistët e këtij grupi duan të tregojnë se tryeza studentore, me bukë, një konservë ton dhe qepë, pasqyron kufizimet e shumës prej 140 denarësh që studentët marrin nga shteti si subvencion për ushqim.

Në anën tjetër, menyja dhe ushqimi i shtruar në tryezën e deputetëve hapin çështjen e çmimeve të privilegjuara në bufenë e Kuvendit dhe pyetjen se përse pikërisht ata që kanë më shumë, në këtë shtet, gjithmonë paguajnë më pak.

Sipas aktivistëve, kontrasti bardhezi mes dy tavolinave tregon më së miri se me 140 denarë nuk mund të sigurohet një vakt studentor i denjë dhe i balancuar nga ana ushqyese.

Advertisement

“Deri kur për disa luks në kurriz të shtetit, e për të tjerët luftë për mbijetesë?” – ka shkruar në Facebook, Blendi Hodai nga Forumi për Reforma në Arsim.

Pikërisht vlera e shujtës studentore ishte bërë shkas i një përplasjeje mes tij dhe Kryeministrit Mickoski, pasi ky i fundit kishte deklaruar se nuk është sjellje e mirë të ofendohen profesorët.

Blendi Hodai kishte publikuar në profiling e tij në Facebook, menynë e restorantit të Kuvendit, ku deputetët mund të ushqehen me çmime të privilegjuara.

“Pyetja është e thjeshtë: pse ushqimi me çmime të privilegjuara për funksionarët konsiderohet i arsyeshëm, ndërsa subvencionimi i ushqimit për studentët bëhet objekt debati?” – kishte shtruar pyetjen Blendi Hodai./Tv Koha/

Advertisement

Rasti i “Alta Bankës” vazhdon të nxisë përplasje politike mes VLEN-it dhe BDI-së. VLEN akuzon Ali Ahmetin dhe BDI-në për përgjegjësi në hyrjen e bankës dhe bizneseve të tjera serbe në tregun maqedonas, ndërsa BDI i cilëson këto pretendime si shpifje dhe u jep pushtetarëve 24 orë kohë për të kërkuar falje publike. Në të kundërtën, paralajmëron padi ndaj të gjithë atyre që e lidhin kryesinë e saj me rastin “Alta Banka”.

Rasti “Alta Banka”, ka përplasur edhe sot partitë politike shqiptare. Partia në pushtet, VLEN ka vazhduar akuzat në adresë të opozitarëve.

Sipas VLEN, Ali Ahmeti dhe BDI-ja janë fajtorë jo vetëm për Alta Banka po edhe për hapjen e shumë bizneseve tjera serbe në Maqedoninë e Veriut.

Blerim Sejdiu nga VLEN, ka përmendur edhe kompaninë tjetër serbe, M Tel, që sipas tij si biznes në vendin tonë ka hyrë në kohën e BDI-së.

Pyetja është e vetme dhe e qartë: Sa dëshmi të tjera nevojiten që Ali Ahmeti të marrë përgjegjësi? Nga Alta Banka, te Daka Davidoviqi, MTEL-i, Ballkani i Hapur dhe tenderët e kontestuar, krijohet një pasqyrë e lidhjeve të vazhdueshme politike dhe afariste, të cilat meritojnë një verifikim të thelluar institucional dhe përgjegjësi politike. Ali Ahmeti duhet të japë dorëheqje nga funksioni i kryetarit të BDI-së dhe të tërhiqet nga politika. Ka ardhur koha që të mos e mbajë më peng partinë dhe të ardhmen e saj për interesa të veta politike.

Advertisement

Ndërsa VLEN vazhdon me akuza, Arbër Ademi nga Bashkimi Demokratik për Integrim ka deklaruar se pushtetarët kanë kohë 24 orë për të kërkuar falje për këto shpifje siç ai i quan kundrejtë kryesisë së BDI-së në të kundërtën ai ka paralajmëruar padi ndaj të gjithë atyre që dje kanë përmendur emrin e kreut të BDI-së dhe lidhjen që i kanë bërë me Alta Bankën.

Ne i ftojmë përfaqësuesit e shumicës qeverisëse që, një nga një, brenda 24 orëve, të tregojnë të vërtetën dhe t’i kërkojnë falje publike Bashkimit Demokratik për Integrim dhe lidershipit të saj për gënjeshtrat dhe shpifjet e bëra në opinion. Në të kundërtën, BDI-ja do të ndërmarrë të gjithë hapat juridikë dhe do të ngrejë padi ndaj atyre që kanë shpifur. Në gjykatë do të kenë mundësinë t’i dëshmojnë pretendimet e tyre dhe të tregojnë se kush ka marrë vendime, kur i ka marrë dhe çfarë përgjegjësie mban.

Ndryshe, i pari që lidhi BDI-në dhe Ali Ahmetin me “Alta Bankën” ishte kryeministri Hristian Mickoski, i cili në komision parlamentar tha se lejen për hyrje në vendin tonë “Alta Bankës” i ka dhënë ministrat e BDI-së.

Më pas, deputetët e shumicës vazhduan në mënyrë të sinkronizuar të publikojnë dokumentet në të cilën me datë dhe me emra shihen zyrtarë të BDI-së të cilët kanë diskutuar në mbledhje të Qeverisë për këtë temë në vitin 2023./Tv Koha – Shkup/ 

Advertisement

Ministri i Ekonomisë dhe Punës, Besar Durmishi, ka vizituar kompaninë “Kiel Maqedoni”, në Zonën Zhvillimore Industriale Teknologjike në Tetovë. Durmishi u njoh nga afër me kapacitetet prodhuese të kompanisë, zgjerimin e veprimtarisë dhe investimin e ri, në vlerë prej rreth 1,5 milionë eurosh, si dhe me planet për punësime shtesë.

Ministri i Ekonomisë dhe Punës, Besar Durmishi, bashkë me deputeten Kaltrina Beqiri dhe Zv/kryetarin e Tetovës Albi Qamili, kanë vizituar kompaninë “Kiel Maqedoni” në Tetovë, ku ka theksuar rëndësinë e investimeve të huaja në zhvillimin ekonomik të vendit, modernizimin e industrisë dhe krijimin e vendeve të reja të punës.

Gjatë vizitës, ministri Durmishi u njoh nga afër me kapacitetet prodhuese të kompanisë, e cila ka realizuar investime prej mbi 11 milionë eurosh në objektin ekzistues në Zonën Ekonomike në Tetovë, ndërsa ka vendosur edhe një linjë të re të automatizuar të lyerjes me pluhur, investim ky në vlerë prej rreth 1,5 milionë eurosh.

Durmishi theksoi se “Kiel Maqedoni” është shembull konkret i një investimi të huaj që jo vetëm ka arritur të zhvillohet me sukses, por vazhdon të zgjerojë kapacitetet dhe të krijojë perspektivë për punësime të reja.

KIEL Maqedoni është pjesë e grupit prestigjioz gjerman Franz Kiel Group, një nga prodhuesit kryesorë evropianë të sistemeve të ulëseve për udhëtarë në autobusë dhe automjete hekurudhore, të destinuara për transportin urban, rajonal dhe ndërqytetës.

Advertisement

Kompania, e cila ka filluar veprimtarinë vendin tonë në vitin 2017, aktualisht numëron rreth 190 të punësuar në dy objektet e saj prodhuese në Tetovë dhe Zhelinë.

Me zgjerimin e kapaciteteve dhe funksionalizimin e linjës së re, ku tashmë janë angazhuar pesë punëtorë, pritet të krijohen mundësi për punësime shtesë./Tv Koha/