Lajme nga vendi
Blerja e helikopterëve për ARM-në në shënjestër të Antikorrupsionit
Komisioni për Parandalimin e Korrupsionit ka hapur lëndë për dy tenderë dhe 13 raste të tjera lidhur me zgjedhjet. Disa janë pas zërave të ngritur, të tjerat me denoncim. Ligjet rregullojnë atë që (nuk) mund të bëhet që nga shpallja e zgjedhjeve deri në përfundimin e tyre, por rregullat anashkalohen me mjeshtëri, shkruan REL.
Komisioni Shtetëror për Parandalimin e Korrupsionit (KSHPK) hap lëndë për blerjen e tetë helikopterëve për Armatë me vlerë 230 milionë euro dhe për blerjen e 22 autoambulancave përmes tenderit të Ministrisë së Shëndetësisë, konfirmoi Tatjana Dimitrovska, kryetare e komisioni, për Radion Evropa e Lirë.
“Ne po hapim rastet me iniciativën tonë, pasi kemi dëgjuar nga mediat, për rastet aktuale para zgjedhjeve. Dy rastet për blerjen e helikopterëve dhe autoambulancave, me 13 raste të tjera, do të thotë se kemi 15 raste që kanë të bëjnë me procesin zgjedhor”, tha Dimitrovska.
Këto raste kanë të bëjnë me ndalesat se çfarë mund dhe nuk mund të bëjnë zyrtarët dhe institucionet pas 14 shkurtit, ditën kur kryetari i Kuvendit, Jovan Mitreski, i shpalli zgjedhjet presidenciale dhe parlamentare të planifikuara për 24 prill dhe 8 maj.
Ndalimet janë të përcaktuara në Kodin Zgjedhor dhe Ligjin për Parandalimin e Korrupsionit dhe rregullojnë kushtet për investime të reja, pagesa të jashtëzakonshme, punësime.
Reagime publike ka shkaktuar edhe tenderi i Shërbimit për Çështje të Përgjithshme dhe të Përbashkëta, me të cilin Qeveria planifikon të shpenzojë 1.6 milionë euro për marrjen me qira të 45 veturave të reja. Ofertat duhet të hapen më 27 mars, prandaj ky tender nuk është aktualisht në “radarin” e Komisionit Kundër Korrupsionit.
Qeveria njoftoi pas seancës së 12 marsit se Ministria e Mbrojtjes do të blejë helikopterë transportues shumëfunksionalë, me marrëveshje qeveri me qeveri, ndërmjet Qeverisë së Republikës së Maqedonisë së Veriut dhe Ministrisë së Mbrojtjes së Italisë.
Ministrja e Mbrojtjes, Slavjanka Petrovska, në një konferencë për media javën e kaluar (14 mars) informoi për këtë blerje. Më pas ajo tha se procedura për përzgjedhjen e kompanisë ka nisur pas një shpalljeje të publikuar në vitin 2019.
Helikopterët janë të prodhuesit italian “Leonardo Helicopters”. Kontrata me kompaninë duhet të nënshkruhet deri në fund të marsit. Të gjitha dërgesat duhet të përfundojnë deri në vitin 2028.
Katër oferta mbërritën në konkursin e përzgjedhjes së kompanisë. Krahas “Leonardo Helicopters” ka pasur edhe oferta nga një konsorcium gjermano-francez, një kompani nga SHBA-ja dhe Kanadaja.
VMRO-DPMNE opozitare kërkoi nga qeveria që të ndalojë këtë prokurim, duke thënë se “është jashtë çdo operacioni normal që LSDM dhe BDI të zgjedhin tenderin prej 230 milionë eurosh disa javë para zgjedhjeve, në periudhën e qeverisjes teknike”.
Blerja e pajisjeve për ARM-në është diçka që LSDM-ja dhe BDI-ja kanë pasur 7 vite për ta bërë, e jo dy muaj para zgjedhjeve të shpenzojnë 250 milionë euro”, njofton partia.
Petrovska tha se prokurimi është në përputhje me rregulloret ligjore dhe janë ndërmarrë të gjithë hapat e nevojshëm.
“Procedura absolutisht nuk do të tërhiqet, nuk është shkelur ligji, do të kryhet deri në fund sepse jemi duke blerë pajisje që i nevojiten ushtrisë maqedonase dhe që janë pjesë e planit të modernizimit”, tha Petrovska nga Tetova.
Ndër 13 lëndët e Komisionit Kundër Korrupsionit, lidhur me zgjedhjet, ka edhe raste të punësimit të paligjshëm, pagesave të jashtëzakonshme të shtesave të pagave, fushatës së nisur para kohe, punësimit të personave me kontratë pune.
Këtë e kanë bërë institucionet shtetërore dhe publike, ndërmarrjet publike, komunat, tha për Radion Evropa e Lirë kryetarja e KShPK, por nuk dha detaje rreth rasteve.
Lajme nga vendi
QMK: Është kërkuar mbështetje nga ajri për zjarrin në Vizbeg, shqyrtohet edhe evakuimi i banorëve
Nga Qendra për Menaxhim me Kriza (QMK) thonë se me kërkesë të kryetarit të komunës së Shuto Orizares është kërkuar mbështetje nga ajri për të shuar zjarrin që ka shpërthyer në deponinë e egër mes Shutkës dhe Vizbegut.
Nga QMK thonë se zjarri po përhapet në afërsi të zonave të banimit dhe se nëse shihet e nevojshme, do të bëhet edhe evakuimi i banorëve.
“Në rajonin e Vizbegut, në Komunën e Shuto Orizares, pranë deponisë ilegale, ka shpërthyer një zjarr i cili po përhapet dhe paraqet rrezik për zgjerim drejt sipërfaqeve përreth. Ekziston rrezik pasi që afër ndodhen shtëpi banimi.
Me kërkesë të kryetarit të Komunës së Shuto Orizares, Kurto Dudush, është kërkuar mbështetje ajrore për përballimin e zjarrit.
Qendra për Menaxhim me Kriza (QMK) menjëherë e ka procesuar kërkesën në drejtim të Ministrisë për Punë të Brendshme (MPB) dhe Drejtorisë për Mbrojtje dhe Shpëtim (DMSH), me qëllim të behët një ndërhyrjeje më e shpejtë dhe më efikase në terren. Kryetarit të Shuto Orizarit i është rekomanduar që, nëse vlerësohet e nevojshme, të ndërmarrë masa për evakuimin e banorëve të asaj zone”, thonë nga QMK.
Nga QMK njoftojnë se aktualisht, në terren po intervenojnë ekipet e Brigadës së Zjarrfikësve të Qytetit të Shkupit.
Lajme nga vendi
Është shuar zjarri në rajonin e Bllacës! Në Dojran po intervenohet me helikopter ndërsa në Makedonski Brod do të përdoret “air tractor”
Nga Qendra për Menaxhim me Kriza njoftojnë se aktive janë 7 vatra të zjarrit në Maqedoni, përcjell TV21. Janë lokalizuar dy vatra, ndërsa janë shuar 22 zjarre, përfshi zjarrin në rajonin e Bllacës, respektivisht në komunën e Çuçer Sandevës. Ndërkaq, Stojançe Angelov, drejtori i Drejtorisë për Mbrojtje dhe Shpëtim, bëri të ditur se tani po shuhen zjarre në Dojran, mbi fshatin Nikoliç, dhe në Makedonski Brod, mbi fabrikën Samokov.
“Po veprojmë me helikopter mbi këtë zjarr, i cili po zhvillohet në terren të pjerrët. Prandaj po e përdorim helikopterin, i cili me fluturime të shkurtra e godet në mënyrë mjaft efikase zjarrin, i cili ka vetëm një krah aktiv. Aty janë zjarrfikësit nga Gjevgjelia dhe Vallandova, si dhe nga Dojrani. Vlerësimi im është se në orët në vijim zjarri do të vihet nën kontroll. Përveç këtij, kemi edhe një zjarr tjetër aktiv dhe të pakëndshëm, që mund ta vlerësoj si më të vështirin, është zjarri në Makedonski Brod mbi fabrikën Samokov. Sot do të veprojë avioni ‘air tractor’, dhe besoj se edhe ky zjarr do të vihet plotësisht nën kontroll”, tha Angelov.
Pjesë e njoftimit nga nga QMK:
ZJARRE AKTIVE: 7
- Komuna e Makedonski Brod 1: Ndërmjet fshatrave Creshnevë, Lokvicë dhe Slatinë (pyll me dushk të degraduar dhe shkurre);
- Komuna e Makedonski Brod 2: Fshati Samokovë (material i lehtë djegës i kapluar nga zjarri);
- Komuna e Çashkë: Nën Solunska Glava, mes vendeve të quajtura Burimet e Babunës dhe Gropa e Babës (vetëm tym në pjesë shkëmbore, zjarr pyjor);
- Komuna e Çuçer Sandevë 1: Ndërmjet fshatrave Bllacë dhe Çuçer (pyll i përzier dhe vegjetacion i ulët);
- Komuna e Butelit: Fshati Lubancë (vegjetacion i ulët);
- Komuna e Dojranit: Fshati Nikoliç (pyll me dru të ulët);
- Komuna e Kavadarit: Fshati Krushevicë (vegjetacion i ulët);
Lajme nga vendi
Karvani ekonomik i Durmishit zbarkon në Strugë; Punë, grante dhe shanse për çdo strugan
Karvani ekonomik i ministrit të Ekonomisë dhe Punës, Besar Durmishi, ndaloi këtë të shtunë në Strugë, ku bashkë me drejtorin e Agjencisë për Punësim, Selatin Beluli, prezantuan masat e Planit Operativ për Punësim 2025.
Në takimin me struganët, ministri Durmishi theksoi se ky plan është një angazhim i qartë institucional, i mbështetur me 40 milionë euro buxhet, që synon ndërtimin e një tregu pune më të hapur, më gjithëpërfshirës dhe më të ndershëm për të gjithë.
“Ky plan është për ju; për të rinjtë që kërkojnë shansin e parë, për gratë që duan të fuqizohen ekonomikisht dhe për secilin që kërkon mundësi reale për përparim në vendin tonë”, theksoi ministri Durmishi.
Ai u zotua se çdo euro e këtij plani do të kthehet në mundësi konkrete për qytetarët, përmes masave të reja për vetëpunësim, praktikë, subvencione për bizneset dhe mbështetje për grupet më të rrezikuara nga papunësia.
Struga ishte ndalesa e radhës në kuadër të karvanit informues që po zhvillohet në gjithë vendin me qëllim të informimit të drejtpërdrejtë të qytetarëve mbi masat dhe mundësitë që ofron Plani Operativ për Punësim.
QMK: Është kërkuar mbështetje nga ajri për zjarrin në Vizbeg, shqyrtohet edhe evakuimi i banorëve
Është shuar zjarri në rajonin e Bllacës! Në Dojran po intervenohet me helikopter ndërsa në Makedonski Brod do të përdoret “air tractor”
Karvani ekonomik i Durmishit zbarkon në Strugë; Punë, grante dhe shanse për çdo strugan
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
Shkup, panairi i patundshmërive të Dubait! Citi Casa rikthehet në hapësirat e COWORK21 më 31 maj dhe 1 qershor
-
Lajme nga vendi3 years ago
Zyra e Avokatit të Popullit në Tetovë sot do të jetë e hapur
-
Lajme nga vendi3 years ago
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
-
Lajme nga vendi2 years ago
Kovaçevski paralajmëroi drejtor të ri të Drejtorisë për Zbatimin e Sanksioneve