Lajme nga vendi
Talat Xhaferi: Romët janë pjesë e pandashme e shoqërisë sonë

Me rastin e 8 Prillit Ditës Ndërkombëtare të Romëve, kryeministri Talat Xhaferi, dërgoi një mesazh urimi për pjesëtarët e bashkësisë rome në shtet.
Gjithashtu, Xhaferi u shpreh se 8 Prilli është ditë që e shënojmë për nderin tuaj të dashur bashkëqytetarë Romë, si edhe të gjithë qytetarët, jeni pjesë e pandashme e këtij shteti dhe shoqërie.
Sipas tij, kjo ditë, është mirënjohje nga ana e shtetit, institucioneve, bashkëqytetarëve tuaj
“Të nderuar qytetarë, pjesëtarë të bashkësisë Rome,
Me kënaqësi të madhe drejtoj ndaj jush në emër të Qeverisë së Republikës së Maqedonisë së Veriut dhe në emrin tim personal, urime me rastin e 8 Prillit, Ditës ndërkombëtare të Rmëve.
8 Prilli është ditë që e shënojmë për nderin tuaj të dashur bashkëqytetarë Romë, sepse edhe ju, si edhe të gjithë qytetarët, jeni pjesë e pandashme e këtij shteti dhe shoqërie. Edhe ju, bashkë me të gjithë qytetarët i ndjeni edhe mirësitë, por edhe ditët e vështira dhe situatat që i sjell jeta. Kontribuoni me atë që mundeni, përpiqeni të përmirësohen gjendjet në çdo sferë dhe përkushtoheni ndaj sigurimit të ardhmërisë më të mirë për shtetin tonë të përbashkët, për shoqërinë tonë dhe për gjeneratat tona të ardhshme.
Me këtë rast, e jepni karakterin tuaj të vetëm dhe unik, karizmin tuaj, pozitivizmin dhe guximin tuaj. Kjo ditë, është mirënjohje nga ana e shtetit, institucioneve, bashkëqytetarëve tuaj dhe shoqërisë në tërësi se edhe ju jeni pjesë thelbësore e gjithë këtij konteksti.
Si Qeveri, përmes Strategjisë së miratuar nacionale për Romët, që është pjesë e politikave publike, shtetërore, ndërmarrim masa në fushat konkrete për të siguruar bazën për integrimin tuaj të plotë dhe të vërtetë, sepse vetëm atëherë, kur edhe ju vetë do të jeni pjesë e sistemit, do të mund të bëni më të mirën, së pari për vete, mandej edhe për gjithë shoqërinë dhe shtetin. Këtu është kryesor arsimi, që është investimi më i mirë në rritjen dhe zhvillimin e të rinjve që janë ardhmëria e shtetit, dhe të botës. Prandaj, bëhuni të mençur, bëhuni këmbëngulës, hapëroni guximshëm dhe sigurt drejt dritës që shfaqet kur do të ndriçohet mendja. Vetëm atëherë do të mund të dalë në dritë edhe potenciali juaj i vërtetë dhe origjinal i cili dallohet nga gjithë të tjerët.
Obligimi ynë si shtet dhe institucione shtetërore është të jemi pranë jush në çdo hap përpara.
Urime 8 Prilli, Dita ndërkombëtare e Romëve”!
Lajme nga vendi
Prokuroria hap hetim ndaj tre personave për tentativë vrasjeje në Shkup

Prokuroria ka hapur hetim ndaj tre personave të cilët dyshohet se kanë dashur të mbysin një person tjetër
“Prokurori Publik i Prokurorisë Themelore Publike në Shkup lëshoi një Urdhër për të zhvilluar një procedurë hetimore kundër tre personave të cilët dyshohen se për kryerjen e veprës penale “tentim vrasje”
dyshuar për tentativë për të kryer një vepër penale si bashkëpunëtorë – Vrasje.
Të dyshuarit, dy vëllezër dhe i njohuri i tyre, me dashje u përpoqën t’i merrnin jetën një personi dhe rrezikuan jetën e dy të tjerëve. Ata e kryen krimin para një klubi fitnesi në Çair, më 1 qershor në mbrëmje.
Incidenti filloi si një grindje verbale në të cilën ata shkëmbyen fyerje dhe sharje, dhe vazhdoi me një përleshje fizike, dhe në një moment i dyshuari i parë nxori një thikë dhe e goditi të dëmtuarin në gju, bark dhe gjoks. Lëndime u shkaktuan edhe dy të dëmtuarve të tjerë të cilët u përpoqën t’i ndanin dhe t’i ndihmonin të plagosurit”, thuhet në njoftimin e Prokurorisë.
Nga atje shtojnë se prokurori publik i paraqiti gjykatësit të procedurës paraprake një propozim për caktimin e paraburgimit për të tre të dyshuarit.
Lajme nga vendi
Sela: Aleanca për Shqiptarët është për 8 njësi zgjedhore!

Edhe pse janë në koalicionin Fronti Europian, Aleanca për Shqiptarët e Selës ka një qëndrim krejtësisht të ndryshëm nga ai i BDI-së lidhur me nismën për një njësi zgjedhore. Kryetari i partisë, Ziadin Sela, vazhdon me qëndrimin e tij të mëhershëm se për ata të pranueshme janë vetëm 8 njësi zgjedhore. Një njësi zgjedhore është në dëm të shqiptarëve, tha ai.
“Ne jemi kundër një njësie zgjedhore, jemi për 8 njësi zgjedhore, se është e studiuar dhe do të sillte zhvillim. Jemi kundër një njësie për shkak të rrethanave demografike që kemi, jemi kundër për shkak se asnjë subjekt politik shqiptar nuk ka shtrije në të gjithë territorin e Maqedonisë së Veriut dhe si e tillë është e dëmshme dhe vetëm mund të çonte në zvogëlim të numrit të deputetëve shqiptarë. Jemi për lista të hapura. Jemi për diasporën që të votojë me postë prej shtëpisë së tyre atje ku jetojnë dhe ta dërgojnë votën me postë këtu të numërohet”, tha Ziadin Sela
Çështja është biseduar edhe në VLEN, tregoi Billall Kasami, duke shtuar se po shqyrtojnë nëse do ta mbështesin idenë për një, tre ose tetë njësi zgjedhore. Kjo mund të ketë implikime ndëretnike, sepse me një njësi zgjedhore duhet të ketë garanci që nuk do të vijë deri te shtrembërimi i realitetit etnik, tha Kasami.
“Kjo mund të ketë edhe implikime ndëretnike, sepse me një njësi zgjedhore sigurisht që duhet të ketë garanci që në të gjithë territorin e Maqedonisë së Veriut do të mund të ruhet vota dhe nuk do të mund të ketë deformime të realitetit etnik të përfaqësimit në Kuvend. Pra duke i marrë parasysh të gjitha këto aspekte. Ne jemi duke ndërtuar qëndrimin tonë se a do të jemi për një njësi zgjedhore, për tre apo për tetë”, deklaroi Bilall Kasami. (Tv21)
Lajme nga vendi
ASH: Përfaqësimi disproporcional edhe në Ministrinë e Mbrojtjes – Nga 120 punësime, vetëm 14 shqiptarë

Aleanca për Shqiptarët shpreh shqetësimin e saj të thellë lidhur me të dhënat e fundit qe vijne nga Ministria e Mbrojtjes, të cilat dëshmojnë për një përjashtim të qartë dhe të pajustifikueshëm të shqiptarëve nga përfaqësimi institucional.
Nga gjithsej 120 vendime për emërime në pozita të nënoficerëve, vetëm 14 janë shqiptarë. Një përfaqësim i tillë jo vetëm që nuk pasqyron realitetin demografik të vendit, por përbën një precedent të rrezikshëm drejt përjashtimit sistematik të shqiptarëve nga institucionet shtetërore, përfshirë edhe ato të sigurisë kombëtare.
Ky zhvillim nuk është rastësi administrative, por vazhdimësi e një politike diskriminuese që, fatkeqësisht, po zbatohet nën petkun e reformave dhe premtimeve për barazi. Ajo që po ndodh është një prirje e rrezikshme drejt margjinalizimit të shqiptarëve nga vendimmarrja dhe strukturat shtetërore.
U bëjmë thirrje përfaqësuesve të koalicionit VLEN dhe drejtuesve institucionalë që të ndalin menjëherë këtë politikë përjashtuese dhe të rikthejnë respektimin e përfaqësimit të drejtë dhe proporcional, ashtu siç e përcakton Kushtetuta dhe siç e imponon realiteti shumëetnik i vendit.
Shqiptarët nuk janë 10% e popullsisë, siç pasqyrohet në këtë rast dhe në shumë raste të tjera të ngjashme. Ata përbëjnë 29.52% të qytetarëve të këtij shteti, sipas të dhënave zyrtare. Çdo përpjekje për të mohuar këtë realitet është e papranueshme dhe cenon rëndë legjitimitetin e përfaqësimit shtetëror.
Aleanca për Shqiptarët do të vazhdojë të ngrejë zërin dhe të veprojë në mbrojtje të barazisë, përfaqësimit të drejtë dhe të dinjitetit të çdo qytetari shqiptar në Republikën e Maqedonisë së Veriut.
Rruga që ndoqi Aleanca për Shqiptarët, duke braktisur një qeveri monoetnike dhe duke refuzuar të qëndron si suvenirë i VMRO-DPMNE-së, është e drejtë. Koha po e dëshmon për çdo ditë se veprimi ynë ishte i duhur, i sinqertë dhe në interes të shqiptarëve.
Aleanca për Shqiptarët – ASH
-
Lajme nga vendi3 years ago
Zyra e Avokatit të Popullit në Tetovë sot do të jetë e hapur
-
Lajme nga vendi3 years ago
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
-
Lajme nga vendi2 years ago
Kovaçevski paralajmëroi drejtor të ri të Drejtorisë për Zbatimin e Sanksioneve