Kryeministri Hristijan Mickoski deklaroi se Zëvendëskryeministri dhe Ministri i Mjedisit Jetësor dhe i Planifikimit Hapësinor, Izet Mexhiti, do të vazhdojë të kryejë detyrat e tij pavarësisht kandidaturës së tij të shpallur për zgjedhjet lokale. Sipas tij, raste të tilla kanë qenë praktikë e zakonshme në të kaluarën dhe se nuk ka arsye të priten ndërprerje në punën e institucioneve. Ai theksoi se në të gjitha ministritë ka edhe zëvendësministra, kështu që pavarësisht zgjedhjeve, ministritë do të vazhdojnë të punojnë normalisht.

“Ajo që funksionon aktualisht brenda Qeverisë është se çdo ministër ka edhe një zëvendësministër, kështu që ata nuk dhanë dorëheqje, është normale që ata të kryejnë detyrat e tyre brenda Ministrive, brenda dikastereve ku janë ministra dhe në të njëjtën kohë të jenë kandidatë. Kjo nuk është hera e parë që ka ndodhur, ka ndodhur shpesh në të kaluarën, kështu që gjithçka që përfaqëson funksionimin normal të institucioneve do të vazhdojë në atë drejtim”, tha Hristijan Mickoski – Kryeministër.

Ministria e Punëve të Brendshme e Serbisë i ka refuzuar kërkesën autoriteteve komunale në Preshevë të paraqitur më 19 maj, për hapjen e vendkalimit kufitar Miratoc-Llojan në kufirin me Republikën e Maqedonisë së Veriut.

Kryetarja e Preshevës, Ardita Sinani thotë se në përgjigjen zyrtare, Serbia argumenton se rruga kalon përmes fshatit Miratoc dhe mungojnë kushtet infrastrukturore për kontrollin kufitar, duke mos lejuar kështu funksionimin e vendkalimit.

“Kemi të bëjmë me një pengesë teknike, por me një problem politik, përkatësisht me mungesë të vullnetit institucional nga ana e shtetit serb”, thotë ajo.

Ndërsa në takimet me përfaqësues të Trupit Koordinues apo Ministrisë për Administratë Lokale, Sinani thotë se ishte pretenduar se procesi po zvarritej nga pala maqedonase, “tashmë është vetë Ministria e Punëve të Brendshme e Serbisë që konfirmon të kundërtën: pengesat burojnë nga pala serbe”.

“Si institucion lokal, do të vazhdojmë të kërkojmë me këmbëngulje dhe të punojmë me përkushtim për realizimin e kësaj kërkese të drejtë e legjitime të qytetarëve tanë. Hapja e vendkalimit Miratoc–Llojan është një domosdoshmëri për lëvizje të lirë, zhvillim ekonomik dhe bashkëpunim ndërkufitar”, deklaron Sinani.

Advertisement

Kujtojmë se para se të vendoset kufiri ndërmjet Serbisë e Maqedonisë së Veriut, nëpër fshatrat Miratoc dhe Llojan ka funksionuar magjistralja që ka lidhur Preshevën dhe Kumanovën nëpër fshatrat shqiptare në një distancë shumë më të shkurtër se kjo që është sot.

Fshatin Miratoc të Preshevës dhe atë Llojan të Kumanovës i ndanë një distancë rreth 1.5 kilometra. Por, për të lëvizur nga një fshat në tjetrin, duhet kaluar 40 kilometra dhe pritje të gjata në kolona për shkak të kufirit.

Ambasada e Kosovës në Shkup ka përcjellë me shumë vëmendje zhvillimet lidhur me thirrjet raciste anti-shqiptare të tifozëve gjatë ndeshjes së basketbollit në Kumanovë. Në një reagim zyrtar, Ambasada dënon me forcë këto thirrje që, sipas tyre, janë bërë shumë të shpeshta në stadiumet e vendit dhe kanë një ndikim shumë negativ.

Në reagim vlerësohet pozitivisht qëndrimi i fuqishëm dhe i menjëhershëm i kreut institucional të Maqedonisë së Veriut, si dhe faktorit politik shqiptar në Qeveri, të cilët kanë dënuar me forcë këtë incident. Një element shumë premtues në këtë drejtim konsiderohet aktivizimi i prokurorisë për hetimin e rastit.

Ambasadori Florian Qehaja shpreh shpresën që autorët e këtyre thirrjeve të marrin dënimet ligjore përkatëse, duke krijuar kështu një precedent të rëndësishëm për ndëshkueshmërinë ndaj rasteve të ngjashme në të ardhmen.