Presidenti i Serbisë, Aleksandar Vuçiç, pas raportimeve se eurodeputeti popullor estonez, Riho Terras, do të emërohet raportues për Kosovën në Parlamentin Evropian (PE), ka shprehur pakënaqësi rreth përfshirjes së figurave nga Estonia në politikën e jashtme të Bashkimit Evropian (BE), veçanërisht kur bëhet fjalë për Kosovën.
Terras është estonezi i katërt që do të trajtojë punët e Kosovës brenda BE-së, duke qenë se diplomati estonez, Aivo Orav, shërben në postin e përfaqësuesit të BE-së në Prishtinë. E, drejtor menaxhues në shërbimin e jashtëm të BE-së (EEAS) pritet të jetë diplomati tjetër nga Estonia, Matti Masikas, të cilin e ka përmendur presidenti serb.
Për më tepër, ish-kryeministrja estoneze, Kaja Kallas, gjithashtu, në cilësinë e shefes së diplomacisë së BE-së, do të ketë punë në dialogun mes Kosovës e Serbisë. Presidenti i Serbisë ka përmendur edhe në të kaluarën Kallasin, duke e cilësuar “shumë më të ashpër” se sa parardhësi i saj në postin e Përfaqësuesit të BE-së për Politikë të Jashtme.
“Ju e dini se Kallasi është shefe e Punëve të Jashtme dhe Sigurisë, kurse njeriu kryesor në EEAS është Masikas. Pra, tashmë janë dy nga Estonia. E dini kush është raportues në PE për Kosovën? Një estonez. Kjo është shumë e çuditshme. Për Serbinë kanë caktuar një kroat”, ka deklaruar presidenti serb të martën në një prononcim për shtyp.
Ndryshe, zemërimi i Serbisë me shumë gjasë buron jo vetëm nga marrëdhëniet shumë të mira bilaterale që Kosova ka pasur historikisht me Estoninë, por edhe nga qëndrimet tejet të vendosura të këtij shteti karshi agresionit rus dhe influencës negative që Rusia ushtron nëpër rajone të ndryshme të Evropës, veçanërisht në Ballkanin Perëndimor.
Presidenti i Serbisë, Aleksandar Vuçiq, tha se Beogradi ka protestuar te fuqitë perëndimore, pasi Qeveria në detyrë e Kosovës ka vendosur gurë themelet për ndërtimin e dy urave të reja mbi lumin Ibër.
“Kanë bërë shumë gjëra dhe tani kemi parë që kanë vendosur gurë themele për dy ura, pa marrë pëlqimin e popullit serb dhe të njerëzve nga Mitrovica e Veriut, sepse kjo do të nënkuptonte eksod përfundimtar”, tha Vuçiq për televizionin Informer, transmeton Shërbimi i Ballkanit i Radios Evropa e Lirë.
Më 1 korrik, Qeveria në detyrë e Kosovës vendosi gurë themelet për ndërtimin e dy urave të reja mbi lumin Ibër, i cilin ndan Mitrovicën në pjesën jugore të banuar me shqiptarë dhe në pjesën veriore të banuar me serbë.
Njëra urë parashihet të jetë për këmbësorë dhe tjera për automjete.
Autoritetet kosovare thanë se projekti, me një vlerë prej rreth 3 milionë eurosh, ka për qëllim përmirësimin e qarkullimit dhe nxitjen e bashkëpunimit ndërmjet banorëve nga të dyja anët e lumit.
Megjithatë, reagimet në terren janë të ndryshme – disa e përkrahin këtë iniciativë, ndërsa të tjerët e shohin si të panevojshme.
Urat e reja do të vendosen në anën e majtë dhe të djathtë të urës kryesore, e cila është pjesë e Marrëveshjes Kosovë-Serbi për Lirinë e Lëvizjes, të arritur në kuadër të dialogut për normalizimin e marrëdhënieve në Bruksel.
Megjithatë, nga BE-ja i kanë thënë më herët Radios Evropa e Lirë se nuk janë të përfshirë në këtë projekt dhe as që janë të njoftuar për të.
Sipas BE-së, çdo vendim për ndërtimin e infrastrukturës mbi lumin Ibër duhet të merret me kujdes dhe në mënyrë gjithëpërfshirëse – duke i përfshirë plotësisht të gjitha komunitetet që preken nga kjo çështje.
Serbët që do të marrin pjesë në festën e Vidovdanit, janë penguar të futen brenda rrethojave pranë monumentit të Gazimestanit me flamujt serbë. Ndërkohë, Policia e Kosovës bën thirrje për manifestim të qetë dhe apelon për shmangie të provokimeve. “Përmes këtij njoftimi zyrtar, Policia e Kosovës APELON te të gjithë qytetarët dhe pjesëmarrësit që të manifestojnë në mënyrë të qetë, të shmangun çdo provokim të mundshëm, të respektojnë ligjet dhe udhëzimet e Policisë së Kosovës, e cila do të jetë prezentë me njësitë e saja për ofrim të sigurisë dhe parandalim të çdo veprimi të kundërligjshëm”. Një ditë më parë, kryeministri në detyrë i Kosovës, Albin Kurti hodhi pretendimin se për të zhvendosur vëmendjen nga protestat në Beograd, Serbia ka në plan të nxisë incidente në Gazimestan. “Sipas vlerësimeve të institucioneve tona të sigurisë dhe inteligjencës, ka përpjekje që tubimi në Gazimestan të jetë sa më masiv. Prandaj janë organizuar grupe serbësh nga Serbia, Mali i Zi dhe Bosnja e Hercegovina që të vijnë në Kosovë nesër. Tradicionalisht, grupet e tilla kanë qenë provokuese, duke bartur simbole nacionaliste serbe e ruse, që bien në kundërshtim me Kushtetutën e Kosovës dhe janë gjithashtu edhe kundër vlerave demokratike e evropiane” tha Kurti.Çdo 28 qershor, serbët festojnë Vidovdanin, atë që e quajnë Beteja e Kosovës. Festa fillon me një meshë në Manastirin e Graçanicës, për t’u zhvendosur në Gazimestan, pak kilometra larg Prishtinës.
Në një atmosferë festive dhe plot simbolikë, Ambasada e Shteteve të Bashkuara në Shqipëri organizoi një ceremoni madhështore për të shënuar 249-vjetorin e Pavarësisë së Amerikës. Ngjarja u zhvillua në praninë e aleatëve, partnerëve dhe përfaqësuesve të institucioneve shqiptare, të cilët iu bashkuan festimeve për të nderuar historinë, vlerat dhe miqësinë e ngushtë SHBA–Shqipëri.
Përveç përkujtimit të Ditës së Pavarësisë, ceremonia shënoi edhe një tjetër jubile të rëndësishëm — 250-vjetorin e krijimit të Ushtrisë, Marinës dhe Korpusit të Marinsave të SHBA, degët e para të ushtrisë amerikane, e cilësuar si më e fuqishmja në historinë botërore.
Ambasada shprehu mirënjohje të veçantë për të gjithë të ftuarit që ndanë këtë moment domethënës, duke theksuar rëndësinë e bashkëpunimit të vazhdueshëm me Shqipërinë dhe partnerët e tjerë në rajon për mbrojtjen e lirisë dhe vlerave demokratike.
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
