Qendra për Menaxhimin e Kriseve (QMK) njofton se gjatë 24 orëve të fundit, deri në orën 08:00 të datës 3 gusht 2026, në të gjithë vendin janë regjistruar gjithsej 30 zjarre në hapësirë të hapur.

Sipas informacioneve të fundit, momentalisht nuk ka zjarre aktive. Nga numri total, një zjarr është vënë nën kontroll, ndërsa 29 të tjerë janë shuar plotësisht.

Nën kontroll mbetet zjarri në territorin e komunës së Brodit Maqedonas, midis fshatrave Sllatinë dhe Greshnicë, ku digjej pyll i degraduar me drurë të ulët dhe vegjetacion i ulët.

QMK informon se shërbimet kompetente vazhdojnë të ndjekin situatën në terren dhe mbeten të gatshme për ndërhyrje të shpejtë në rast se shfaqen zjarre të reja.

Trafiku jashtë mjediseve urbane po zhvillohet me intensitet të moderuar.

“Në vendkalimet kufitare “Tabanoc”, “Bogorodicë” dhe “Dijran” ka pritje të gjata për hyrje dhe dalje nga vendi për rreth një orë. Në vendkalimet e tjera kufitare nuk ka pritje të gjata për hyrje dhe dalje nga vendi”, thonë nga LAMM.

Nga atje u bëjnë thirrje shoferëve që të kenë kujdes me shpejtësinë e automjeteve, veçanërisht nëpër luginat e vendit ku mund të ketë rëshqitje të dheut.

Vikendi i zgjatur dhe temperaturat e larta thuajse e kanë boshatisur kryeqytetin. Shumë qytetarë kanë vendosur t’i ikin vapës, duke zgjedhur të freskohen në destinacionet turistike më të afërta.

Lëvizje e reduktuar vërehet edhe në Tregun e Gjelbër, ku numri i blerësve është dukshëm më i vogël krahasuar me ditët e zakonshme.

Për shkak të vikendit të zgjatur dhe reduktimit të punës, shumë prej tregtarëve kanë vendosur të qëndrojnë në shtëpi dhe të mos dalin ta kryejnë punën e tyre.

Edhe tregtarët, të cilët sot kishin dalë në treg, thonë se fundjava e zgjatur ka ndikuar ndjeshëm në uljen e shitjeve.

Këto tre ose katër ditë është ulur ndjeshëm puna. Për fat të keq, malli nuk qëndron, prishet, edhe pse çmimet janë të përshtatshme për gjithsecilin. Domaten më të mirë, prodhim vendor, e ke 60 denarë. Kemi qepë, po edhe sallata, gjithashtu, janë prodhim i yni, jo i eksportuar. Megjithëse mund të themi se sot është pak më mirë se ditëve të kaluara. Por ajo që mund të them është se blerësit këtë vikend nuk kanë të drejtë të ankohen për çmimet.

Advertisement

Lëvizje në pazar ka pasur sikur gjithmonë. Mesa duket, për shqiptarët nuk ka pushim, sepse çështja ekonomike e bën të veten. S’kemi të holla ne për det.

Valla, qenka shumë dobët, ka pak njerëz. Problem është buxheti.

Përveç tregut, fundjava e zgjatur e ka heshtur edhe Çarshinë e Vjetër, e cila zakonisht është pjesa më e zhurmshme dhe e vizituar nga qytetarët.

Përveç Tregut të Gjelbër, vikendi i zgjatur ka çuar në pushime edhe shitësit në Çarshinë e Vjetër dhe, si rrjedhojë, shumë dyqane janë të mbyllura.

Zhurma e Tregut të Gjelbër dhe e Çarshisë së Vjetër është zhvendosur në pikat kufitare, ku shumë qytetarë presin në kolona për t’u kthyer në shtëpitë e tyre për të vazhduar nga nesër aktivitetet dhe obligimet e përditshme./Tv Koha – Shkup/

Advertisement