Lajme nga vendi
Limani: Pavarësisht sfidave me të cilat përballet vendi ynë, me punë të përbashkët dhe të koordinuar, le të krijojmë kushte që të gjithë njerëzit të arrijnë potencialin e tyre.
Ministri i Politikës Sociale, Demografisë dhe Rinisë, Fatmir Limani, mori pjesë në mbledhjen e gjashtëmbëdhjetë plenare të Grupit Punues Sektorial në fushat e arsimit, punësimit dhe politikës sociale në Qeverinë e Republikës së Maqedonisë së Veriut.
Në fjalën e tij para të pranishmëve nga institucionet, sektori ndërkombëtar dhe civil, ministri Limani iu referua angazhimeve dhe politikave të Ministrisë së Politikës Sociale, Demografisë dhe të Rinjve, e cila synon krijimin e politikave dhe masave specifike për rigjallërimin demografik të vendit përmes mbështetjes për familjet, investimeve në arsimin parashkollor dhe përmirësimit të kushteve të jetesës.
“Në vitin 2025 kemi vazhduar të përforcojmë mbrojtjen sociale përmes harmonizimit të të drejtave sociale, me shpenzimet e jetesës dhe duke rritur mbështetjen për 33.266 familje. Në përputhje me nevojat e qytetarëve nga kategoritë më të cenueshme dhe personave që përballen me vështirësi më të mëdha për t’u integruar në tregun e punës, në vitin 2025 është paraparë një ndryshim në Ligjin për mbrojtje sociale”, theksoi Limani.
Ai theksoi se ky ndryshim parashikon uljen në përqindje të masës së asistencës minimale të garantuar, për një periudhë deri në 12 muaj dhe paraqet një nxitje për anëtarët e familjes që të aktivizohen në tregun e punës.
“Gjithashtu po shohim përmirësime të mëtejshme në qasjen në shërbimet sociale – tani ka 140 ofrues të licencuar të shërbimeve sociale për më shumë se 5,000 përfitues, kryesisht të moshuar dhe persona me aftësi të kufizuara,” tha Limani.
Ai vuri në dukje se numri i kontratave administrative të lidhura është rritur me rreth 20%, duke arritur kështu në 83 kontrata me ofrues të licencuar të shërbimeve sociale në vitin 2025.
Limani informoi edhe për sistemin e ri të integruar informativ për mbrojtje sociale, i cili tashmë është duke u pilotuar në disa qendra dhe i cili duhet të përmirësojë cilësinë dhe efikasitetin e punës sociale. Më tej, për investime në rritjen e kapaciteteve të kopshteve, numri i të cilave deri në vitin 2028 do të arrijë në mbi 25 kopshte – me synim përfshirjen e çdo fëmije në arsimin parashkollor.
Ministri iu referua politikave pë të rinjtë.
“Sipas të dhënave, 34,8% e të rinjve janë të papunë, dhe një pjesë e madhe e tyre nuk janë të përfshirë as në arsim dhe as në trajnime. ËshtË detyrimi ynë është të krijojmë një mjedis ku ata mund të realizojnë potencialin e tyre këtu, pa kërkuar mundësi jashtë vendit të tyre. Prandaj, si ministër, angazhimi im është të ndërtoj një politikë të integruar rinore që do të bashkojë institucionet, sektorin e biznesit, organizatat dhe shoqërinë civile”, theksoi Limani.
Ministri foli edhe për zbatimin e Strategjisë për Përfshirjen e Romëve 2022–2030. Ai theksoi se po financohen projekte për përfshirjen e fëmijëve romë në arsimin parashkollor dhe për të përmirësuar integrimin e tyre social.
“Vazhdojmë të bëjmë progres në buxhetimin e përgjegjshëm gjinor duke përmirësuar mekanizmat institucionalë në Qendrën Burimore për politikëbërje dhe buxhetim të përgjegjshëm gjinor. Mbi 500 persona janë trajnuar për tema që kanë të bëjnë me barazinë gjinore dhe mosdiskriminimin”, tha Limani.
Ai po ashtu theksoi se janë duke u intensifikuar aktivitetet për mbrojtje nga dhuna me bazë gjinore.
Sipas të dhënave, në vitin 2024 janë regjistruar 1834 viktima, shumica prej të cilëve gra dhe fëmijë. Për të adresuar dhunën ndaj grave, ka filluar përgatitja e një Strategjie Kombëtare për Parandalimin dhe Mbrojtjen nga Dhuna me Bazë Gjinore ndaj Grave dhe Dhuna në Familje 2026–2033.
Në fund, Limani nënvizoi se pavarësisht sfidave me të cilat përballet vendi ynë, ka mundësi që duhen shfrytëzuar për zhvillimin e tij.
“Është e rëndësishme të krijohen kushte që të gjithë njerëzit të realizojnë potencialin e tyre. Që e gjithë kjo të jetë e suksesshme, është thelbësore koordinimi dhe puna e përbashkët”,përfundoi Limani.
Politika jonë është e qartë – financa publike të qëndrueshme dhe standard jetese i mbrojtur. Do të vazhdojmë me disiplinë në të ardhurat, me përgjegjësi në shpenzime dhe me ndjeshmëri ndaj nevojave reale të qytetarëve, porositi sot kryeministri Hristian Mickoski në fjalimin e tij në konferencën vjetore “Formalizimi i ekonomisë joformale: Përmes bashkëpunimit drejt suksesit”.
Lufta kundër ekonomisë gri, theksoi kryeministri, nuk është fushatë, por proces, kontrolli i çmimeve nuk është populizëm, por mbrojtje e qytetarëve.
Do të jemi të fortë dhe të drejtë. Si ndaj atyre që shmangin detyrimet, ashtu edhe ndaj atyre që përpiqen të përfitojnë nga krizat, sepse detyrimi ynë është i qartë – ekonomi me rregulla, treg me ligje, shtet me dinjitet”, tha Mickoski.
Ai vuri në dukje se ekonomia gri është e ardhur e humbur për shtetin, mundësi e humbur për paga më të larta, spitale më të mira, shkolla moderne, pensione më të sigurta… “Ajo krijon konkurrencë jo të ndershme, shkatërron besimin në institucionet dhe demotivon çdo person që punon në mënyrë të ndershme. Qëllimi ynë është i qartë – ekonomia formale të bëhet më e rëndësishme se ajo joformale, të jetë më e lehtë, më fitimprurëse dhe më e sigurt të punohet ligjërisht, tha Mickoski, duke theksuar se lufta kundër ekonomisë gri nuk mund të jetë vetëm inspektuese, por sistematike.
Ministrja e Financave, Gordana Dimitrieska Koçoska, theksoi se me Planin e rishkikuar të veprimit 2026-2027 do të vendosë një qëllim të qartë dhe të matshëm për uljen e ekonomisë joformale nga 28,9% të BPV-së deri në fund të vitit 2027.
“Në zbatimin e saj, veçanërisht e rëndësishme është përfshirja aktive e të gjitha institucioneve relevante në zbatimin e Strategjisë dhe masave të saj. Një mesazh i qartë për bashkëpunim dhe përfshirje aktive në zbatim e dërgojmë edhe përmes nënshkrimit sot të Deklaratës për partneritet dhe veprim, me të cilën shprehim angazhimin e përbashkët për formalizimin e ekonomisë joformale. Ajo përbën një hap të rëndësishëm drejt trajtimit sistematik dhe të koordinuar të ekonomisë joformale dhe tregon përkushtimin e përbashkët të institucioneve, komunitetit të biznesit, organizatave sindikale dhe komunitetit akademik”, tha Dimitrieska Koçoska.
Dy ushtarë nga kazerma “Jane Sandanski” në Shtip njëri 40 vjeçar dhe tjetri 28 vjeçar kanë përfunduar në spital me lëndime të rënda trupore. Burime të Alsat bëjnë të ditur se 40 vjeçari nga Kratova, epror në kazermë ka sulmuar fizikisht një ushtar profesionist shqiptar nga Shkupi, përcjell Alsat.mk.
Nga MPB thonë se gjatë kryerjes së detyrave zyrtare ka ndodhur incident.
“Më 17.02.2026 në ora 01:00 në SPB Shtip nga Klinika e Shtipit është denoncuar se tek ta me lëndime trupore janë sjellë E.H (28) nga fshati Studeniçan i Shkupit dhe D.A (40) nga Kratova, dy ushtarë profesionistë të punësuar në ARMV në kazermën “Jane Sandanski” në Shtip. Pas ndërmarrjes së masave është konstatuar se lëndimet i kanë marrë gjatë kryerjes së detyrave në poligonin ushtarak “Penush” në Shtip, gjatë kryerjes së realizimit të ushtrimeve”, njoftojnë nga MPB.
Lëndimet i konfirmojnë edhe nga Armata e RMV-së. Nga atje nuk zbardhin detaje se në çfarë rrethanash ka ndodhur incidenti por vetëm njoftojnë se që të dy pjesëtarët janë në gjendje të mirë shëndetësore.
“Ju informojmë se për dy personat tanimë janë ndërmarrë masa në përputhje me rregullat ekzistuese. Ju informojmë se dy personat janë në gjendje të mirë shëndetësore. Armata ngelet e përkushtuar në respektimin e procedurave dhe standardeve gjatë kryerjes së aktiviteteve”, thonë nga ARM.
Sulmi fizik ndaj një ushtari profesionist nuk është i vetmi në kazermën e Shtipit pasi më herët atje ka pasur edhe disa incidente të tjera. Muaj më parë një ushtar me iniciale F.J pati përfunduar në Spitalin Psikiatrik pas disa sjelljeve të çuditshme në kazermë. /Alsat.mk
Nga Ministria e Transportit njoftojnë se kanë nisur procedurën për nënshkrimin e Marrëveshjes për Transportin Ajror me Mbretërinë e Arabisë Saudite. Nga Ministria thonë se qëllimi i marrëveshjes është krijimi i një kornize ligjore që do të mundësojë hapjen e linjave ajrore të rregullta mes Maqedonisë dhe Arabisë Saudite.
“Duam të theksojmë se deri më tani, nuk ka pasur transport ajror ndërmjet të dy vendeve. Marrëveshja krijon kushte liberale dhe fer për veprimtarinë e operatorëve ajrorë, duke nxitur konkurrencën, uljen e çmimeve për udhëtarët, si dhe mundësinë për ofrimin e shërbimeve të reja dhe më cilësore. Në të njëjtën kohë, Marrëveshja garanton nivelin më të lartë të sigurisë dhe mbrojtjes në transportin ajror, në përputhje me standardet ndërkombëtare. Maqedonia dhe Arabia Saudite mbajnë marrëdhënie miqësore, me angazhim të përbashkët për avancimin e bashkëpunimit ekonomik dhe tregtar, rritjen e investimeve, si dhe thellimin e bashkëpunimit në fusha të tjera me interes të përbashkët”, thonë nga Ministria e Transportit.
Nga MT thonë se pritet që krijimi i linjave ajrore të rregullta mes të dy vendeve të kontribuojë në rritjen e bashkëpunimit ekonomik, turizmit, shkëmbimit tregtar dhe marrëdhënieve bilaterale në përgjithësi.
Mickoski: Lufta sistematike kundër ekonomisë gri
Dy pjesëtarë të ARM-së sulmohen fizikisht nga eprori, përfundojnë në spital
Maqedonia nis procedurat për linjë ajrore direkte me Arabinë Saudite
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
