47 persona kanë mbetur të plagosur nga ngjarja në Liverpool të hënën, teksa një makinë përplasi këmbësorët.

Incidenti ndodhi teksa në shesh ishin mbledhur turma të mëdha tifozësh që po festonin shpalljen kampion të Premier League të ekipit të futbollit të Liverpool.

Gëzimi dhe festa u shndërrua shpejt në kaos dhe frikë. Sipas autoriteteve angleze, 27 persona u dërguan në spital për trajtim mjekësor për shkak se pësuan lëndime serioze. Ndërsa 20 të tjerë u trajtuan në vendin e ngjarjes. Mes të plagosurve, 4 janë fëmijë.

Shoferi i makinës që përplasi këmbësorët u arrestua nga policia.

Sipas autoriteteve, ngjarja nuk po hetohet për terrorizëm dhe se asnjë person tjetër deri tani nuk rezulton i përfshirë në incident.

Advertisement

Një dëshmitar tha se turmat e njerëzve filluan të godisnin makinën dhe i thyen xhamat. Sipas dëshmitarit, shoferin e mbërtheu paniku dhe i dha gaz makinës duke përplasur këmbësorët.

Një delegacion palestinez e fitoi të drejtën për ta valëvitur flamurin e vet në Organizatën Botërore të Shëndetësisë (OBSh) pas një fitoreje simbolike në një votim të zhvilluar të hënën. I dërguari palestinez shpreson që kjo fitore do të çojë në njohje më të madhe brenda OKB-së e jashtë saj.

Propozimi i paraqitur nga Kina, Pakistani, Arabia Saudite e disa vende të tjera në asamblenë vjetore të OBSh-së në Gjenevë u miratua me 95 vota “për” dhe vetëm katër “kundër” – Izraeli, Gjermania, Hungaria dhe Republika Çeke. 27 vende abstenuan, raporton agjencia e lajmeve “Reuters”.

Fitimi i së drejtës për ngritjen e flamurit në OBSh vjen pas nismës së suksesshme të palestinezëve për anëtarësim të plotë në Asamblenë e Përgjithshme të Kombeve të Bashkuara vitin e kaluar dhe në kohën e sinjaleve se Franca mund të njohë një shtet të pavarur palestinez.

Në një referencë të qartë ndaj luftës shkatërruese mes Izraelit e Hamasit në Gaza, e dërguara e Libanit, Rana el Khoury, tha se rezultati i votimit ofron “një rreze të vogël shprese për popullin trim palestinez, vuajtja e të cilit ka arritur nivele të papërballueshme”.

Izraeli argumentoi kundër rezolutës së OBSh-së dhe bëri thirrje për një votim. Aleatet kryesore, Shtetet e Bashkuara, të cilat planifikojnë që të tërhiqen nga kjo organizatë, nuk morën pjesën.

Advertisement

Edhe pse gati 150 shtete kanë njohur një shtet të pavarur palestinez, shumica e fuqive perëndimore dhe disa të tjera nuk e kanë bërë ende këtë, përfshirë Shtetet e Bashkuara, Britaninë, Francën, Gjermaninë dhe Japoninë.

Franca dhe Japonia votuan për propozimin që flamuri palestinez të valëvitet në OBSh, ndërsa Britania abstenoi.

“Është simbolike dhe një akt, por një shenjë se ne jemi pjesë e një komuniteti ndërkombëtar që ndihmon për nevoja shëndetësore. Shpresoj që së shpejti të kemi anëtarësi të plotë në OBSh dhe në të gjitha forumet e OKB-së” – i tha agjencisë “Reuters” ambasadori palestinez në Kombet e Bashkuara, Ibrahim Khraishi.

Javën e kaluar, palestinezët e fituan të drejtën për të pranuar njoftime sipas Rregulloreve Shëndetësore Ndërkombëtare të OKB-së – një grumbull rregullash globale për vëzhgimin e përhapjeve të sëmundjeve.

Advertisement

Të paktën 45 persona humbën jetën nga sulmet ajrore izraelite këtë të hënë në Rripin e Gazës, përfshirë 33 civilë që ndodheshin në një shkollë të shndërruar në strehë, e cila u godit teksa njerëzit flinin. Sulmi shkaktoi zjarr që përfshiu ndërtesën dhe dogji sendet personale të banorëve.

Ushtria izraelite deklaroi se godina strehonte “terroristë kryesorë” dhe shërbente si qendër komanduese për Hamasin.

Kreu i shërbimit të emergjencës së Ministrisë së Shëndetësisë në Gaza njoftoi se godina u godit tri herë dhe u përfshi nga flakët ndërsa njerëzit ishin ende në gjumë.

Ky sulm ndodhi në kuadër të ofensivës së ripërtërirë izraelite në Rripin e Gazës, me synimin për të “shkatërruar plotësisht Hamasin”, ndërkohë që përpjekjet për arritjen e një armëpushimi kanë dështuar.