I dënuari me burg të përjetshëm në rastin “Lagja e Trimave”, Demë Shehu është dërguar jashtë procedurave ligjore për të vuajtur dënimin në një burg tjetër, përkatësisht është dërguar nga Idrizova në Shtip. Në këtë burg nuk ka kushte për sistemimin e të burgosurve që vuajnë dënime të përjetshme. Mësohet jo zyrtarisht se Shehu është sistemuar në qeli në kundërshtim me Ligjin për Zbatimin e Sanksioneve. Që nga e dita e martë nga Drejtoria për Zbatimin e Sanksioneve heshtin rreth pyetjeve tona se për cilat arsye Demë Shehu është dërguar nga Idrizova në Shtip. Sektori për marrëdhënie me publikun as nuk na ka konfirmuar nëse ka pranuar kërkesën tonë dhe nëse do të përgjigjet ose jo të paktën brenda afateve ligjore.Komunikuam me Avokatin e Popullit nga ku na njoftuan se ka rast të evidentuar mbi denoncimin e bashkëshortes së Shehut. Shërbimet e Avokatit të Popullit na thanë se janë informuar nga Drejtoria e Zbatimit të Sanksioneve se vendimi për Shehun është marrë për shkak të sjelljeve të tij ndaj gardianëve, refuzimeve që ka bërë për t’i kontrolluar ushqimin që i kanë sjell familjarët dhe mos respektimin e rregullave të burgut.Demë Shehu ndodhet në vuajtje të dënimit të përjetshëm si i akuzuar për terrorizëm në rastin Lagja e Trimave. Ai disa herë ka qenë objekt i bastisjeve brenda qelisë ku ishte sistemuar me arsyetimin se përdorë celular dhe mbanë armë të ftohta. Deri tani mjete ilegale apo që bien në kundërshtim me ligjin në qelinë e tij nuk janë gjetur.

Kryetarja e Qytetit të Shkupit, Danella Arsovska është sulmuar fizikisht nga persona akoma të panjohur derisa ndodhej në territorin e Komunës së Çairit bashkë me ekipin e saj për të detektuar siç pretendon ajo ndërtimet pa leje. Arsovska mësohet se është goditur në fytyrë pas çka ka kërkuar ndihmën mjekësore dhe është dërguar në emergjencë në Spitalin 8 Shtatori në Shkup. Policia është adresuar në vendin e ngjarjes për të marrë masa mbi zbardhjen e rastit. Arsovska tashmë disa javë frekuenton në Çair me pretendimet se po detekton ndërtesa pa leje që sipas saj datojnë në dy mandatet e fundit të kreu të Komunës së Çairit, Visar Ganiu. Për pretendimet e saja, Arsovska ka dorëzuar dokumente edhe në polici dhe prokurori. /Alsat.mk

Ministria e Punëve të Jashtme e Bullgarisë ka reaguar me tone të ashpra pas thirrjes së ambasadorit të saj në Shkup në Ministrinë e Jashtme, duke e cilësuar këtë hap si të papritur dhe të pajustifikuar. Në një deklaratë zyrtare, MPJ bullgare thekson se është befasuese që ky veprim vjen në një kohë kur, sipas saj, për muaj me radhë, përfaqësues të lartë të qeverisë maqedonase kanë transmetuar mesazhe dhe veprime armiqësore ndaj Bullgarisë. Sipas deklaratës, ambasadori bullgar në Maqedoninë e Veriut ka theksuar mungesën sistematike dhe të qëllimshme të respektit nga autoritetet në Shkup ndaj Bullgarisë, në qëndrimet e tyre publike. Ministria bullgare gjithashtu shpreh “shqetësim serioz” për një sërë deklaratash “të ashpra, manipuluese dhe shpesh fyese” nga përfaqësues të lartë të qeverisë maqedonase, që nuk kanë pasur në shënjestër vetëm Bullgarinë, por edhe Bashkimin Evropian.

Reagimi përfshin edhe një dënim të drejtpërdrejtë ndaj kryeministrit Hristijan Mickoski, për përdorimin e një gjuhe të ashpër ndaj ministrit të jashtëm bullgar.

“Këto deklarata janë të papërputhshme me normat minimale të dialogut diplomatik dhe politik, si dhe me parimet e fqinjësisë së mirë,” thuhet në deklaratë.

Mickoski një ditë më parë, i pyetur për të komentuar ministrin e Jashtëm bullgar Georg Georgiev, që e quajti “kryeministër verimaqedonas” kishte deklaruar se atij ashtu i është dhënë për detyrë.

“Nuk do të komentoja për atë djalë. Ju bëj thirrje juve, mediave, lëreni atë djalë aty. Ajo është një qeveri që dikush tjetër po e drejton në sfond, ata njerëz duhet të bëjnë punën e tyre që u është thënë dhe atij i është dhënë tyre “tani shko tallu”. Është si kur një mi ngacmon një luan”, deklaroi Hristijan Mickoski, Kryeministër.
Shteti bullgar thotë se këto deklarata jo vetëm që dëmtojnë besimin mes dy vendeve, por hedhin dyshime serioze mbi angazhimin e vërtetë të Maqedonisë së Veriut për respektimin e Marrëveshjes së Miqësisë dhe përkushtimin ndaj integrimit evropian.

Advertisement

“Bullgaria nuk do të tolerojë gjuhën e urrejtjes, sulmet personale dhe përpjekjet për të shtyrë me qëllim përkeqësimin e marrëdhënieve dypalëshe. Deklaratat e tilla krijojnë një klimë armiqësie dhe nuk tregojnë vullnet politik për rikthim në një dialog normal, respektues dhe konstruktiv”, përfundon reagimi i Ministrisë së Jashtme bullgare. /Alsat.mk