Njësia mobile pranë Ministrisë së Punëve të Brendshme (MPB) në Maqedoninë e Veriut, përmes automjetit policor “përgjues” me radar të integruar, ka sanksionuar një shofer i cili drejtonte automjetin me një shpejtësi prej 178 km/h jashtë vendbanimit.

Dje, në orën 18:55, në rrugën eksprese Shtip – Radovish, zyrtarët policorë me ndihmën e automjetit special – përgjues të MPB-së, kanë matur shpejtësinë e lëvizjes së një automjeti tip “Mercedes” me targa të Shkupit. Automjeti po lëvizte me 178 kilometra në orë jashtë vendbanimit, ku shpejtësia maksimale e lejuar është 110 kilometra në orë.

“Ndaj shoferit P.K. (33) nga Radovishi janë ndërmarrë masat përkatëse dhe ai do të përballet me sanksionin e paraparë me ligj. Kontrollet e trafikut me automjetet speciale – përgjues do të vazhdojnë edhe në periudhën e ardhshme në të gjithë territorin e shtetit, me qëllim sanksionimin e shkelësve, rritjen e sigurisë dhe mbrojtjen e pjesëmarrësve në komunikacion,” njoftoi MPB.(INA)

Më 29 mars 2026, në orën 17:43, Shërbimi i Sigurisë Publike Shkup mori një njoftim se rreth orës 15:10 në zonën e Bit Pazarit, I.K. (51) nga Shkupi është sulmuar fizikisht nga një person. Si pasojë e sulmit, ai ka pësuar lëndime të rënda trupore, të cilat janë diagnostikuar në Kompleksin e Klinikave “Nëna Terezë”.

Policia menjëherë ka ndërmarrë masa për sqarimin e rastit, duke mbledhur prova, duke marrë deklarata nga dëshmitarët dhe duke ndërmarrë veprime për identifikimin dhe ndalimin e autorit të krimit. Organet kompetente u bëjnë apel qytetarëve që kanë informacione për incidentin të bashkëpunojnë me qëllim sqarimin më të shpejtë të rastit.