Lajme nga vendi
Kalaja e Shkupit, përplasen partitë shqiptare
Përplasje mes faktorëve politikë në vend pas paralajmërimeve të Ministrisë së Kulturës për revitalizimin e Kalasë së Shkupit. Bashkimi Demokratik për Integrim, bashkë me partnerët e saj në Frontit Evropian, dy Aleancat për Shqiptarët, akuzojnë se këto punime kanë për qëllim falsifikimin e historisë në Kalanë e Shkupit dhe rrjedhimisht dëmtimin e identitetit të saj.
“Bashkimi Demokratik për Integrim shpreh shqetësimin lidhur me projektin e paralajmëruar për ndërtimin e objekteve të reja në hapësirën e Kalasë së Shkupit, të cilat, në vend të ruajtjes dhe promovimit të vlerave historike, rrezikojnë të shëmtojnë dhe të tjetërsojnë origjinalitetin arkitektonik e kulturor të këtij lokaliteti me rëndësi të veçantë për të gjithë qytetarët”, thonë nga Bashkimi Demokratik për Integrim.
Megjithatë, zëvendëskryeministri i parë Izet Mexhiti, ka hedhur poshtë pretendimet e opozitës shqiptare, duke theksuar se nuk do të ketë ndërtime apo kishë në Kalanë e Shkupit, ndërsa aktivitetet janë për të revitalizuar një ndër monumentet më të rëndësishme të Shkupit që gjatë periudhës së kaluar është lënë në harresë.
“Tashmë Kalaja është pastruar, është rregulluar sistemi i ujitjes. Po rregullohet në të gjitha format, është e hapur për qytetarët, për turistët si vend atraktiv. Do të lëshohen në përdorim Muzeu Parahistorik dhe Muzeu i periudhës Osmane, të cilat kanë qenë plotësisht të ndërtuar vetëm do të lëshohen në përdorim, ndërsa kishë nuk ka pasur dhe nuk do të ketë.Pra, në Kala nuk do të ketë ndërtime. Kështu që s’kanë pse brengoset BDI-ja, por vetëm është një tendencë për të fituar ndonjë pikë politike apo për të manipuluar në marrëdhëniet ndëretnike në shtet”, deklaroi Izet Mexhiti, Zëvendëskryeministër.
Edhe nga Ministria e Kulturës hodhën poshtë akuzat e BDI-së dhe ASH-së, duke theksuar se janë ndërmarrë aktivitete pastrimi, por nuk është kryer kurrfarë aktiviteti ndërtimor.
“Njëkohësisht ju informojmë se në Kalanë e Shkupit nuk janë kryer punime ndërtimore. Përkundrazi, atje janë ndërtuar tashmë dy muze, Muzeu i Parahistorisë dhe Muzeu i Periudhës Osmane, të cilët do të vihen në përdorim deri në fund të vitit”, thonë nga Ministria e Kulturës.
Reagimet politike për punimet në Kalanë e Shkupit, janë në kontekst të ngjarjeve të vitit 2011. Pushteti i atëhershëm i Nikolla Gruevskit dhe Ali Ahmetit, nuk arriti të parandalojë incidentin ndëretnik për shkak të ndërtimit të një objekti në Kala që pretendohej të ishte kishë. Në përplasjen fizike, dhjetëra të rinj shqiptarë të udhëhequr nga Lëvizja Zgjohu e Artan Grubit përfunduan me lëndime, ndërsa dhjetëra të tjerë në burg.
Gjykata Kushtetuese ka formuar katër lëndë lidhur me sistemin “Safe City” që hyri në fuqi nga data një i këtij muaji dhe shumë shpejt pritet që për të njëjtat të diskutohet. Vërejtja kryesore është se sistemi në tërësi është diskriminues pasi i njëjti është vendosur vetëm në Shkup, Kumanovë e Tetovë. Kreu i Gjykatës Kushteteuse, Darko Kostadinovski thotë se mentaliteti ynë ndryshon vetëm me rregulla.
“Shpejtë do të veprohet mbi këto lëndë dhe nuk mund të jap analiza para kohe. Qëndrimi im personal është se ky projekt ka qëllim legjitim, është i arsyetueshëm në shoqëri, masat që parasheh janë proporcionale me qëllimin që duhet të arrihet. Mentaliteti ynë ndryshon shumë shpejt por ndryshon me rregull”, deklaroi Darko Kostadinovski – Kryetar i Gjykatës Kushtetuese.
Dy prej iniciativave janë dorëzuar nga dy krahët e Aleancës për Shqiptarët, ajo e Selës dhe ajo e Taravarit. Sipas tyre, projekti diskriminon qytetarët në baza etnike pasi kamerat kryesisht janë koncentruar në zonat dhe vendbanimet shqiptare. U kontestua gjithashtu edhe obligimi ligjor që të gjithë qytetarët të kenë numra telefoni dhe adresa elektronike që të realizohet komunikim për dërgimin e gjobave për kundërvajtje. Me 81 vota “PËR” Kuvendi më 23 janar miratoi ndryshimet në ligjin për kundërvajtje.
Badenterin e mundësuan deputetët Ilir Demiri dhe Bejxhan Iljas të cilët në Kuvend veprojnë si të pavarur. /Alsat.mk
Lajme nga vendi
Ndryshimet e fundit në Kodin Penal parashohin masa të rrepta tashmë edhe traktorët që konstatohen të parregullt do të konfiskohen?!
Ndryshimet e fundit në Kodin Penal parashohin masa të rrepta për sigurinë në rrugë, ku përveç makinave, tashmë edhe traktorët që konstatohen të parregullt teknikisht ose të paregjistruar do të konfiskohen menjëherë nga policia.
Fokus i veçantë i këtyre ndryshimeve janë traktorët që qarkullojnë pa sinjalizim adekuat (dritat e pasme), fenomen ky që ka shkaktuar reagime të shumta në opinion dhe ka qenë burim i aksidenteve të rënda.
Pse po ndërmerret kjo masë?
Sipas të dhënave nga Ministria e Punëve të Brendshme, çdo sezon bujqësor regjistrohen dhjetëra aksidente ku mjetet e udhëtarëve godasin traktorët nga mbrapa.
Mungesa e dritave: Shumica e traktorëve në zonat rurale lëvizin gjatë natës ose në muzg pa drita të pasme, duke u bërë “të padukshëm” për shoferët e tjerë.
Pasojat fatale: Çdo vit, një numër i konsiderueshëm i këtyre aksidenteve përfundojnë me viktima në njerëz.
Çfarë parashohin ndryshimet ligjore?
Nëse një traktorist ndalohet në trafik dhe mjeti i tij:
Nuk është i regjistruar;
Ka parregullsi teknike (sidomos në sistemin e dritave dhe frenimit); … policia ka autoritetin e plotë për odzim (konfiskim) të mjetit në vendngjarje.
Kjo masë synon të rrisë ndërgjegjësimin e bujqve për rëndësinë e mirëmbajtjes së mjeteve të tyre të punës, duke mbrojtur kështu jetën e të gjithë pjesëmarrësve në komunikacion
Badinteri në Kushtetuese, Kostadinovski: S’jemi organ politik
4 nisma kundër sistemit Safe City i janë adresuar Gjykatës Kushtetuese
Ndryshimet e fundit në Kodin Penal parashohin masa të rrepta tashmë edhe traktorët që konstatohen të parregullt do të konfiskohen?!
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
