Lajme nga vendi

Safe City: Siguri në trafik apo shkelje e të drejtave të njeriut!?

Published

9 months ago

January 22, 2026

Zbatimi i sistemit Safe City vazhdon të mbetet kryetemë në opinion. Kjo çështje morri interes të veçantë edhe në seancën për pyetje deputetësh në Parlament, pasi deputeti i Aleancës për Shqiptarët të krahut të Taravarit, Halil Snopçe pyeti publikisht ministrin e Brendshëm, Pançe Toshkovski se përse ende qytetarët shqiptarë po vazhdojnë të marrin porosi vetëm në gjuhën maqedonase.

“Ende nuk e kam marrë përgjigjen me shkrim, në lidhje me atë se a keni pranuar SMS porosi nga kryeministri Mickoski se përse nuk e zbatoni sistemin e Safe Cityt edhe në gjuhën shqipe. Vetëm ditën e parë, mbi 40 mijë qytetarë shqiptarë kanë pranuar SMS vetëm në gjuhën maqedonase me çka është thyer Ligji për gjuhët. Pse nuk e zbatoni Ligjin për gjuhën shqipe”, e pyeti deputeti Snopçe ministrin Toshkovki. Snopçe gjithashtu kërkoi nga Toshkovski të jep përgjigje se a kanë bërë llogari se sa porosi janë dërguar në fazën e testimit dhe sa ky sistem do t’u kushtojë qytetarëve.

“Sa rroga minimale do të kishin qenë të barabartë me shumën e atyre dënimeve. Unë bëra vetëm një statistikë, vetëm për 12 orët e para. Ishin dërguar 65 mijë porosi, nëse marrim se dënimi mesatar është 50 euro, ne mund të konstatojmë se do të ishin mbledhur 3 milionë euro, ndërsa për një vit – mbi 1 miliard euro. A jeni të vetëdijshëm se çfarë shumash janë këto në një krizë ekonomike me të cilën ballafaqohen qytetarët e vendit tonë, në këtë krizë që qytetarët mezi mbushin shportën e konsumit, ndërsa ne i ngarkojmë me dënime”, theksoi Snopçe.

Në përgjigjen e tij, ministri i Punëve të Brendshme, Pançe Toshkovski ironizoi me matematikën e Snopçes, duke thënë se Snopçe ka një matematikë argëtuese, kurse tha se jeta e njeriut nuk ka çmim. Sipas Toshkovskit, vetëm faza e testimit të këtij sistemi, ka kontribuar në uljen e aksidenteve me fatalitet.

“Mund ta klasifikoj si një matematikë zbavitëse, e bazuar në muhabete të Çarshisë. Sa kushton një jetë njeriu, cili është çmimi i një jete të njeriut, a ka çmim një jetë njeriu? Snopçe, prej kur ka filluar zbatimi i ‘Safe City’, meritë e qytetarëve është shpëtimi i nëntë jetë njerëzish, krahasuar me periudhën e njëjtë të vitit të kaluar. Nëse në vitin e kaluar kemi pasur 11 aksidente me fatalitet, tani kemi dy, nëntë më pak dhe kjo është meritë e qytetarëve të Maqedonisë së Veriut”, tha Toshkovski. Kurse në përgjigjen për gjuhën shqipe, Toshkovski tha se në përputhje me ligjin, të gjitha aktet që do të dalin nga MPB do të jenë në përputhje me ligjin. “Të gjitha aktet do të dorëzohet në gjuhën e vërtetuar me Ligj dhe Kushtetutë”, theksoi Toshkovki. Nga kjo përgjigje nuk ishte i kënaqur deputeti Snopçe, i cili tha se pushteti po dëmton xhepat e qytetarëve.

FILIPÇE: NUK E PËRKRAHIM LIGJIN PËR SISTEMIN SAFE CITY

Ndërkohë, LSDM zyrtarisht u deklaruar se nuk do të përkrah Ligjin për Kundërvajtje, i cili është kyç për t’u miratuar për të filluar të funksionojë sistemi “Safe City”. Këtë e konfirmoi kryetari i kësaj partie Venko Filipçe, i cili tha se si parti – nuk janë kundër sigurisë në komunikacion, por se në ligj ekzistojnë zbrazëtira serioze që e vënë në pikëpyetje zbatimin normal të këtij sistemi.

“Ne atë ligj nuk do ta përkrahim. Ne nuk jemi kundër sigurisë në trafik. Dëshmi për këtë është që e kemi filluar atë sistem, por nuk mund të lejojmë që ai sistem të zbatohet në mënyrë parciale. Përveç që jemi për siguri në trafik, ne jemi edhe për sigurinë e të dhënave personale, të cilin qeveria as nuk e komenton, as nuk përpiqet ta rregullon”, theksoi Filiçe. Ai më tej tha se nuk lejon që partia e tij të jetë e kontrolluar nga ana e pushtetit. “Ja u ulen në tryezën e takimit të liderëve, u morrën vesh, do të shohim se cili është rezultati tjetër i asaj marrëveshje, ne jemi opozitë konstruktive, por nuk jemi opozitë e kontrolluar. Nuk do të lejojmë që të mbështesim ligj, ku një aspekt serioz i gjërave nuk janë rregulluar, e ajo është baza e madhe e të dhënave, për të cilat askush në ligj nuk tregon se si do të kontrollohet”, theksoi FIlipçe.

VLEN: “SAFE CITY” DUHET TË PËRKRAHET

Nga ana tjetër, koalicioni VLEN tha se sistemi “Safe City” është çështje e sigurisë publike, e mbrojtjes së jetës së qytetarëve dhe e vendosjes së rendit në rrugë dhe si e tillë duhet të përkrahet. “Kur flasim për “Safe City”, flasim për jetë njerëzish. Flasim për rrugë ku sot humb dikush babanë, djalin, motrën sepse dikush tjetër ka menduar se rregullat vlejnë vetëm për të tjerët”, theksojnë nga VLEN. Nga koalicioni i partive shqiptare në pushtet gjithashtu kritikojnë qasjen e BDI-së për sa i përket këtij ligji, duke theksuar se partia e Ali Ahmetit nuk është e aftë të prodhojë as një qëndrim të vetëm.

“Në një konferencë të vetme, qytetarët dëgjuan dy versione nga e njëjta parti. Në parim ishte “po”, pastaj del Sadulla Duraku dhe e pranon vetë se “gjërat u janë pështjell”. Pra për çfarë janë, pro apo kundër. E votojnë ligjin apo e bllokojnë. Kjo është pikërisht mënyra si BDI ka funksionuar gjithmonë, plot 20 vite me stërkembëza, gjysmë-zgjidhje dhe mjegull, shumë propagandë, shumë alibi dhe pak zgjidhje”, theksojnë nga VLEN. Më tej nga ky koalicion theksojnë se qytetarët kanë nevojë për institucione që punojnë, ndërsa Safe City s’është temë për politikë ditore por është temë për rend dhe për shpëtim jetësh. (koha.mk)

Lajme nga vendi

ZGJEDHJET NË SERBI – REAGIME NGA MAQEDONIA E VERIUT!

Published

18 hours ago

October 26, 2026

TetovaExpres

Presidentja e Maqedonisë së Veriut, Gordana Siljanovska-Davkova, ka uruar Listën Studentore për fitoren në zgjedhjet e parakohshme parlamentare në Serbi.
“Urime për rezultatin e zgjedhjeve në Serbi! Qytetarët serbë treguan pjekuri demokratike përmes transferimit paqësor të pushtetit politik”, shkroi Siljanovska-Davkova në platformën X.

Ministri i Punëve të Jashtme dhe Tregtisë së Jashtme, Timço Mucunski, uroi qytetarët e Serbisë fqinje për zgjedhjet e zhvilluara parlamentare, ndërsa Listës Studentore i dëshiroi sukses për rezultatin e arritur.

Në një postim në platformën “X”, Mucunski theksoi se Maqedonia e Veriut mbetet e përkushtuar për thellimin e mëtejshëm të miqësisë dhe marrëdhënieve të fqinjësisë së mirë me Serbinë.

VLEN përmes një komunikate ka uruar Koalicionin Shqiptar për rezultatin e arritur teksa ka përshëndetur edhe ndryshimin politik në Serbi.

Presim që qeveria e re të formohet sa më shpejt, të respektojë të drejtat e shqiptarëve të Luginës dhe t’i japë fund diskriminimit sistematik, përfshirë pasivizimin e adresave. Shpresojmë që qeveria e re e Serbisë të gjejë forcën dhe vullnetin politik për dialog e bashkëpunim me Republikën e Kosovës. Një dialog mes të barabartëve, që duhet të kulmojë me njohjen reciproke mes dy shteteve të pavarura.

Përmes rrjeteve sociale rezultati I zgjedhjeve është komentuar edhe nga liderë partiak dhe parti politike.

Urime qytetarëve të Serbisë për fitoren e madhe historike! – shkroi kreu i LSDM-së, Venko Filipçe.

“Ashtu siç paralajmëruam, në vijim vjen çlirimi nga strukturat kriminale të pushtetit. Ra Orbani. Ra Vuçiqi. Të gjithë e dimë se kush është i radhës. Pres që Serbia dhe Maqedonia e Veriut të ndërtojnë marrëdhëniet më të mira të mundshme, të bazuara në respektin e ndërsjellë dhe bashkëpunimin. Qytetarëve të Maqedonisë së Veriut u them se na pret një betejë aspak e lehtë, sepse po luftojmë kundër pjesës së mbetur të kësaj grupi kriminal ballkanik” – shkruan Filipçe.

Por, nga ana tjetër, krahu i LSDM-së që kërkon dorëheqje të Filipçes, pas zgjedhjeve në Serbi, ka bërë thirrje për bashkimin e opozitës.

Nuk kanë munguar postimet nëpër rrjetet sociale edhe nga eksponent të BDI-së.

“Fillimisht Orbani, tani Vuçiqi. Kremlini ka humbur papritur dy nga aleatët e tij kryesorë në Evropë… P.S Vuçiqi paska fituar në Maqedoninë e Veriut” – ka shkruar Bujar Osmani në Facebook./Tv Koha/

Lajme nga vendi

NGA E ENJTJA LETËRNJOFTIMI DHE PATENT SHOFERI EDHE NË CELULAR!

Published

18 hours ago

October 26, 2026

TetovaExpres

Nga e enjtja, qytetarët do të mund t’i përdorin letërnjoftimet dhe patentë shoferët përmes telefonit mobil, me fillimin e zbatimit zyrtar të portofolit elektronik. Aplikacioni do të promovohet të mërkurën, më 28 tetor.

Ministri i Transformimit Digjital, Stefan Andonovski, sqaroi se aplikacioni është i sigurt dhe u mundëson përdoruesve të zgjedhin vetë se cilat të dhëna personale dëshirojnë të ndajnë.

Gjatë identifikimit në bankë, bar apo në ndonjë lokal tjetër, qytetarët nuk do të kenë nevojë t’i zbulojnë të gjitha të dhënat që përmbajnë dokumentet e tyre.

Në vend të kësaj, ata do të mund të ndajnë vetëm informacione të caktuara përmes një kodi QR për përdorim të vetëm.

Kodi mund të skanohet, ndërsa të dhënat do të jenë të qasshme vetëm me lejen e përdoruesit. Pas 10 deri në 15 sekondash, kodi skadon dhe nuk mund të përdoret përsëri.

Andonovski theksoi se kjo është faza e parë drejt krijimit të një portofoli digjital evropian, i cili synon të mundësojë digjitalizimin e plotë të dokumenteve.

Ai shpreson se me zhvillimin e mëtejshëm të aplikacionit do të shtohen shërbime, mundësi dhe dokumente të reja për qytetarët.

Ministri i bëri këto deklarata para fillimit të panel-diskutimit me temë „Parakushtet dhe sfidat për digjitalizimin e përshpejtuar të sektorit privat“.

Lajme nga vendi

Kronika e zezë – Tetovë dhe Gostivar, 22 Tetor

Published

4 days ago

October 23, 2026

TetovaExpres

Dje, zyrtarë policorë nga Sektori për Polici Kriminalistike pranë SPB Tetovë dhe nga ekipi mobil “Task Force”, në koordinim me përfaqësues të Inspektoratit Shtetëror të Tregut dhe Drejtorisë së të Ardhurave Publike, kanë realizuar kontroll aksional në një objekt hotelerie në Qendrën Tregtare të Qytetit në Tetovë.
Me këtë rast, para objektit është zënë një 48-vjeçar nga Tetova dhe gjatë kontrollit tek ai është gjetur një substancë e bardhë pluhur, pas çka është privuar nga liria.
Ndërsa, brenda në objekt, te pronari 54-vjeçar nga fshati Trebosh janë gjetur 15 paketime me substancë të bardhë pluhur, pas çka edhe ai është privuar nga liria.
Të dy janë ndaluar në stacionin policor dhe pas dokumentimit të plotë të rasteve, ndaj tyre do të vijojë parashtresë përkatëse.
…….
Dje në orën 12:00 në Stacionin Policor Gostivar, nga Ndihma e Shpejtë Mjekësore Gostivar është denoncuar se te ata është sjellë një 15-vjeçar nga Gostivari pa shenja jete. Sipas denoncimit, në shtëpinë e tij në Gostivar ai kishte rrëshqitur dhe ka rënë shkallëve, ndërsa pasi është pranuar në spital, pas reanimimit të kryer ka shfaqur shenja jete dhe me automjet të Ndihmës së Shpejtë Mjekësore Gostivar është transferuar në Kompleksin e Klinikave “Nënë Tereza” në Shkup, ku i janë konstatuar lëndime të rënda trupore. Është njoftuar prokurori publik, është kryer këqyrje në vendngjarje dhe po merren masa për zbardhjen e ngjarjes.
…….
Dje në orën 19:10 në Stacionin Policor Tetovë, një 38-vjeçar nga Tetova ka denoncuar se rreth orës 18:30 në rrugën “Todor Cipovski Merxhan”, djali i saj 11-vjeçar është sulmuar fizikisht nga një i mitur tjetër. Po merren masa për zbardhjen e rastit.
……
Dje në orën 22:30 në Hanet e Mavrovës, zyrtarë policorë nga Stacioni Policor Mavrovë kanë privuar nga liria një 22-vjeçar nga Shkupi. Gjatë një kontrolli në trafik është ndaluar automjeti i udhëtarëve “Volksëagen Golf” me targa të Shkupit, të cilin e drejtonte ai, me ç’rast është konstatuar se e drejtonte pa pasur leje drejtimi. Automjeti është konfiskuar dhe pas dokumentimit të plotë të rastit do të vijojë parashtresë përkatëse.
……..
Dje në orën 20:00 në Stacionin Policor Gostivar, një 71-vjeçar nga Gostivari ka denoncuar se rreth orës 18:30 te Stacioni i Autobusëve në Gostivar, derisa po kryente detyrat e punës si taksist, është sulmuar fizikisht nga një person. Po merren masa për zbardhjen e rastit.
…….
Dje në orën 13:25, zyrtarë policorë nga Stacioni Policor Gostivar kanë privuar nga liria një 29-vjeçar nga Gostivari, i cili ditën e mëparshme është denoncuar nga nëna e tij 53-vjeçare se në disa raste e ka kërcënuar. Pas dokumentimit të plotë të rastit, ndaj tij do të parashtrohet kallëzim përkatës.
……
Pas mesnate në orën 02:00 në SPB Tetovë është denoncuar se ka shpërthyer zjarr në një arë në fshatin Sellarcë e Epërme. Zyrtarë policorë nga Stacioni Policor Zherovjan kanë dalë në vendngjarje dhe kanë konstatuar se është djegur kashtë, e cila ishte grumbulluar në disa pirgje. Ekipi i Njësisë Territoriale Kundër Zjarrit e ka shuajtur zjarrin, ndërsa persona të lënduar nuk ka. Këqyrja e vendngjarjes është kryer nga ekipi i SPB Tetovë.