Lajme nga vendi
Safe City: Tetova me kamera, por pa sinjalizim adekuat
Në prag të fillimit të zbatimit të sistemit “Safe City”, i cili fillimisht do të implementohet në Shkup, Tetovë dhe Kumanovë, qyteti i Tetovës aktualisht rezulton i papërgatitur sa i përket infrastrukturës dhe sinjalistikës rrugore, shkruan gazeta KOHA.
Në rrugët kryesore dhe bulevardet e Tetovës nuk janë vendosur shenja paralajmëruese që sinjalizojnë praninë e kamerave për matjen e shpejtësisë. Po ashtu, në shumë prej bulevardeve kryesore mungojnë edhe shenjat që tregojnë shpejtësinë maksimale të lejuar, gjë që ka ngritur dilema serioze në opinion lidhur me zbatimin korrekt dhe të drejtë të sistemit “Safe City”.
Një problem shtesë mbetet edhe sinjalizimi vertikal dhe ndriçues, i cili në shumë raste është jashtë funksionit ose nuk punon në mënyrë të rregullt. Nga Komuna e Tetovës bëjnë të ditur se tenderi për furnizim me sinjalizim horizontal dhe vertikal është mbyllur dhe tashmë është përzgjedhur kompania fituese, ndërsa për këtë qëllim nga buxheti komunal janë ndarë 250 mijë euro. Zëvendëskryetari i Komunës së Tetovës, Albi Qamili, deklaron se në fillim të këtij muaji është hapur prokurimi publik për vendosjen e sinjalistikës ndriçuese, semaforëve dhe shenjave të komunikacionit.
“Është zgjedhur kompania dhe aktualisht jemi në fazën e ankesave. Besojmë se nga fillimi i muajit të ardhshëm do të nisë realizimi, përkatësisht vendosja e shenjave të komunikacionit, përfshirë edhe shenjat për matjen e shpejtësisë që lidhen me sistemin ‘Safe City’, i cili pritet të votohet dhe të hyjë në fuqi më 1 shkurt. Do të ketë edhe shenja paralajmëruese për kamerat, si dhe vendosje të semaforëve të rinj, ndërsa pjesë e këtij prokurimi janë edhe renovimet e semaforëve ekzistues”, tha Qamili.
Megjithatë, aktualisht mungesa e sinjalizimit adekuat është e dukshme në bulevardet kryesore të qytetit. Në bulevardin “Ilinden” pothuajse askund nuk ka shenja që tregojnë shpejtësinë maksimale të lejuar, ndërsa situatë e njëjtë vërehet edhe në bulevardin “Vidoja Smilevski – Bato”. Për më tepër, mungojnë edhe shenjat paralajmëruese për kamerat e matjes së shpejtësisë, ndonëse kamera tashmë janë vendosur në të dy bulevardet.
Problem në vete paraqet edhe parkimi në Tetovë, ku pothuajse gjatë gjithë ditës, përmes shërbimit të “merimangës”, largohen rreth 20 automjete për parkim të parregullt.
Sipas ekspertëve të komunikacionit, një tjetër sfidë në implementimin e sistemit “Safe City” është kaosi i përgjithshëm në komunikacionin rrugor në Tetovë. Ata theksojnë se, krahas vendosjes së shenjave të shpejtësisë para kamerave, është e domosdoshme të vendosen shenja edhe pas kamerave, të cilat aktualisht mungojnë në të gjithë qytetin. Nga Komuna e Tetovës sigurojnë se qyteti do të mbulohet me shenja paralajmëruese në të gjitha lokacionet ku do të funksionojnë kamerat për matjen e shpejtësisë dhe evidentimin e shkeljeve të tjera në komunikacion.
Më 06.08.2026 në ora 13:40 në SPB Tetovë, një 59-vjeçar nga një fshat i Tetovës ka raportuar se është mashtruar nga personi S.B. nga rajoni i Shkupit. Sipas denoncimit, në prill të vitit 2026 ai me S.B. është marrë vesh që t’i shesë një automjet motorik transportues me targa të Shkupit, pronë e një personi juridik nga Shkupi, për një shumë prej 11.000 eurove me marrëveshje për pagesë me këste. Mirëpo, deri në ditën e denoncimit, shuma e rënë dakord nuk është paguar dhe as automjeti nuk është kthyer. Po merren masa për zbardhjen e rastit.
Gjykata Kushtetuese për herë të parë ka kallëzuar një gjyqtar të Gjykatës Themelore Civile Shkup në Prokurorinë Publike dhe në Këshillin Gjyqësor për shkak të moszbatimit të një vendimi të saj, transmeton TV21.
Bëhet fjalë për rastin e gazetares Natasha Stojanovska, lidhur me ngjarjet e 27 prillit 2017.
Gjykata Kushtetuese më herët kishte konstatuar shkelje të së drejtës së saj për lirinë e shprehjes publike dhe kishte urdhëruar rishqyrtimin e rastit.
Megjithatë, Gjykata Themelore Civile e kishte hedhur poshtë kërkesën për përsëritjen e procedurës, duke vlerësuar se vendimi i Gjykatës Kushtetuese nuk përbënte bazë për një gjë të tillë.
Nga Gjykata Kushtetuese thonë se me një veprim të tillë nuk janë respektuar vendimi final.
Për këtë arsye, për herë të parë është aktivizuar mekanizmi i ri për zbatimin e vendimeve, i paraparë me Aktin e Gjykatës, i cili është në fuqi që nga shtatori i vitit 2024.
Lajme nga vendi
DAP: “TURIZËM I DREJTË” – QYTETARËT QË JAPIN ME QIRA AKOMODIME DUHET TË DEKLAROJNË TË ARDHURAT
Me vizita në destinacionet turistike vendase, Drejtoria e të Ardhurave Publike (DAP) po vazhdon fushatën për një sezon turistik të drejtë, me qëllim që të nxisë pagesën e barabartë të tatimeve nga të gjithë qytetarët që realizojnë të ardhura nga dhënia me qira e kapaciteteve të akomodimit të çdo lloji. Në kulmin e sezonit turistik, nga DAP thonë se shumë pronarë privatë presin mijëra turistë dhe realizojnë të ardhura nga dhënia me qira e pronave të tyre, pa i deklaruar ato për qëllime tatimore, duke mos përmbushur detyrimet ligjore.
Përfaqësuesit e DAP informuan se janë vazhdimisht në terren për t’u ofruar qytetarëve udhëzime praktike për deklarimin e të ardhurave që personat fizikë realizojnë nga dhënia me qira e apartamenteve, banesave, shtëpive, uikend-shtwpive, dhomave dhe kapaciteteve të tjera të akomodimit, si dhe nga veprimtari të tjera sezonale të lidhura me turizmin.
Deklarimi i të ardhurave nga qiraja ose nënqiraja bëhet në mënyrë elektronike përmes sistemit e-Shërbime Tatimore. Qytetarët që janë të punësuar ose që tashmë kanë përdorur sistemin për skanimin e kuponëve fiskalë kanë profil të krijuar, ndërsa ata që nuk kanë profil duhet ta hapin një të tillë për të deklaruar të ardhurat në kohë.
FIKRET ZENUNI – Në rastet kur qiraja zgjat më pak se 31 ditë gjatë një muaji, deklarimi duhet të bëhet deri më 10 të muajit pasues. Kur pagesa realizohet përmes platformave të huaja, afati është gjithashtu deri më 10 të muajit pasues pas pagesës. Tatimi i miratuar duhet të paguhet jo më vonë se data 15 e muajit për muajin paraprak.
Tatimi mbi të ardhurat personale llogaritet mbi të ardhurat bruto, pra mbi shumën totale të paguar nga mysafiri.
Nga kjo shumë zbriten 10% shpenzime të njohura, nëse objekti jepet i pamobiluar ose 15%, nëse objekti është i mobiluar.
DAP vë theks të veçantë edhe te dhënia me qira përmes platformave digjitale si Airbnb, Booking, Facebook, Kajak dhe platforma të tjera.
Nëse qytetarët nuk i përmbushin detyrimet tatimore, Ligji për Tatimin mbi të Ardhurat Personale parashikon gjobë prej 50 deri në 250 euro, në kundërvlerë në denarë, për personat fizikë që nuk paraqesin deklarimin për të ardhurat nga qiraja ose nënqiraja./Tv Koha/
Mashtrohet tetovari, mbetet pa veturë e pa para
Gjykata Kushtetuese për herë të parë denoncon një gjyqtar
SALAH MBËRRIN NË TRABZON – TURQIA “DIGJET” NGA EMOCIONET!
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Azizi zbulon dyfytyrësinë e Ali Ahmetit: Ja vazali që e mbronte Gruevskin
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
