Në muajin shtator pritet të ketë rreth 4.900 nxënës të klasës së parë më pak krahasuar me vitin e kaluar, deklaroi sot ministrja e Arsimit dhe Shkencës, Vesna Janevska, duke theksuar se shifra ende nuk është përfundimtare.

Edhe për vitin e ri shkollor, ekspertët si shkak kryesor të kësaj rënieje përmendin problemet kronike me të cilat përballet vendi. Sipas tyre, numri i nxënësve të klasës së parë po zvogëlohet për shkak të rënies së natalitetit, por edhe si pasojë e emigrimit të përhershëm të popullsisë në moshë riprodhuese dhe asaj në moshë pune.

Në konferencën për media në Ministrinë e Arsimit dhe Shkencës, ku u publikuan rezultatet e maturës shtetërore, ministrja tha se po zvogëlohet numri i nxënësve të shkollave të mesme dhe i studentëve, por rënia më drastike vërehet te numri i nxënësve që regjistrohen në klasën e parë.

“Numri i studentëve po zvogëlohet, pasi kemi gjithnjë e më pak nxënës edhe në shkollat fillore, edhe në ato të mesme. Këtë vit numri i nxënësve në shkollat e mesme është ulur, por jo në mënyrë drastike. Këto shifra nuk janë përfundimtare, pasi në muajin gusht do të ketë edhe afatin e tretë të regjistrimit. Megjithatë, numri i nxënësve në arsimin fillor është ulur ndjeshëm dhe aktualisht bëhet fjalë për mbi 4.000 fëmijë më pak se vitin e kaluar. Shifra ende nuk është përfundimtare, sepse regjistrimet vazhdojnë dhe shpresojmë të zvogëlohet pak, por ajo mbetet shumë shqetësuese nga aspekti demografik. Më vjen keq ta them, por ky është fakt dhe është publikuar edhe nga Enti i Statistikës – deri tani kemi rreth 4.900 nxënës të klasës së parë më pak se vitin e kaluar. Edhe nëse regjistrohen të tjerë, do të kemi së paku 3.000 nxënës më pak. Këtë trend e presim edhe vitin e ardhshëm, gjë që është dëshpëruese për vendin”, deklaroi Janevska.

Në Komunën e Tetovës pritet që 1025 nxënës të regjistrohen në shkollat fillore. Nëse bëjmë një krahasim me vitin e kaluar, ky numër është rritur për rreth 90 nxënës, por mbetet për t’u parë se sa nga këta fëmijë ndodhen aktualisht në Maqedoni dhe nuk janë shpërngulur.

Advertisement

Nga sektori për arsim në Komunën e Tetovës thonë se të dhënat nga librat amë tregojnë se ka një rritje të numrit të nxënësve.

Nga ky sektor përmendën edhe njoftimin se Komuna e Tetovës do të subvencionojë me nga 100 euro çdo nxënës që regjistrohet në klasën e parë në shkollat fillore të qytetit./Tv Koha/

Me nënshkrimin e marrëveshjes për grantin investues të Bashkimit Evropian dhe të marrëveshjeve të financimit me Bankën Evropiane të Investimeve dhe Bankën Evropiane për Rindërtim dhe Zhvillim, nis faza e tretë e financimit për ndërtimin e segmentit hekurudhor Kriva Pallankë–Deve Bair në Korridorin 8.

Për këtë projekt, përmes Kornizës Investuese për Ballkanin Perëndimor, Bashkimi Evropian ka siguruar grant prej 149 milionë eurosh.

Kryeministri Hristijan Mickoski tha se bëhet fjalë për një projekt që është premtuar për më shumë se tri dekada. Ai theksoi se Qeveria ka arritur marrëveshje me palën bullgare dhe se ndërtimi i pjesës lindore të Korridorit 8 do të përfundojë.

Unë kam qenë në moshë shumë të re, kur për herë të parë përmendej pjesa lindore e Korridorit 8. Sot jam kryeministër dhe me kënaqësi mund të them se pjesa lindore e Korridorit 8 përfundimisht do të përfundojë. Nëse atëherë kam qenë në moshë të re kurse tani kam rreth 48 vite, kjo nënkupton se për më shumë se 30 vite kemi pritur që atë që dikush dikur e paralajmëronte kjo Qeveri e përmbylli si proces.

Përfaqësuesi i Bankës Evropiane të Investimeve, Björn Gabriel, tha se me nënshkrimin e marrëveshjeve hapet rruga për shpalljen e tenderit për ndërtimin e këtij segmenti hekurudhor.

Advertisement

Ai njoftoi gjithashtu se BE-ja ka siguruar fonde edhe për përgatitjen e projekteve në pjesën perëndimore të Korridorit 8, drejt Shqipërisë.

Në pjesën perendimore drejtë Shqipërisë, Banka Evropiane tashmë ka siguruar fonde në formë grantesh nga Bashkimi Evropian për të mbështetur përgatitjen teknike të segmenteve përkatëse në të dyja anët e kufirit. Sa u përket segmenteve në Maqedoninë e Veriut, analiza e mangësive në dokumentacionin teknik ekzistues për segmentin Kërçovë–Strugë pritet të fillojë në tetor. Paralelisht me këtë, Komisioni Evropian aktualisht është duke shqyrtuar termat e referencës për studimin e fizibilitetit të segmentit që lidh Strugën me kufirin shqiptar.

Drejtori i Hekurudhave të Maqedonisë së Veriut, Sinisha Ivanovski, tha se segmenti Kriva Pallankë–Deve Bair është një nga projektet më sfiduese infrastrukturore, pasi mbi 60 për qind e trasesë do të përbëhet nga ura dhe tunele.

Është interesante se nga 22 kilometra sa ka gjithësej, do të ketë 21 tunele me gjatësi prej 7.8 kilometrash. Do të ketë gjthashtu edhe 52 ura me gjatësi prej 5 kilometrash. Kjo nënkupton se nga 22 kilometra, thuajse 13 kilometra apo më shumë se 60 përqind nga kjo trase do të jetë e përbërë nga urat dhe tunelet dhe kjo vërtetë është sfiduese, përshkak se vet terreni është me lartësi mbidetare, prandaj edhe duhen këto ura e tunele.  

Autoritetet gjithashtu njoftuan se marrëveshjet e nënshkruara sigurojnë mbylljen e strukturës financiare të projektit.

Advertisement

Sipas njoftimeve, ndërtimi i kësaj linje hekurudhore do të përmirësojë lidhjen ndërmjet Detit Adriatik dhe Detit të Zi, do të lehtësojë transportin e njerëzve dhe mallrave dhe do të krijojë mundësi të reja për zhvillimin ekonomik të vendit dhe rajonit./Tv Koha – Shkup/

Sot, zyrtarët policorë nga SPB Tetovë kanë privuar nga liria një 60-vjeçar nga fshati Bogovinë, rrethina e Tetovës, për shkak të ekzistimit të dyshimit se më 05.08.2026 rreth orës 23:00 ka gjuajtur me armë zjarri në një aheng familjar, me ç’rast një nga plumbat ka dëmtuar çatinë e shtëpisë së një 66-vjeçari nga fshati Siniçan, rrethina e Tetovës. Pas marrjes së urdhrit gjyqësor, është kryer kontroll në shtëpi me ç’rast në oborr janë gjetur tri gëzhoja të kalibrit 9 mm dhe dy gëzhoja nga pistoleta me gaz. Në lidhje me rastin, është kryer kontroll edhe në shtëpinë e një 50-vjeçari në fshatin Bogovinë, ku në oborr janë gjetur gëzhoja nga pistoleta me gaz. Pas zbardhjes dhe dokumentimit të plotë të rastit, do të vijojë parashtresa përkatëse.

……Dje në orën 08:25, zyrtarët policorë nga SPB Tetovë kanë privuar nga liria një 32-vjeçar nga Tetova, duke vepruar sipas denoncimit të mëparshëm se gjatë javës së kaluar në shtëpinë familjare vazhdimisht i ka kërcënuar prindërit me një mjet të mprehtë, ndërsa më 03.08.2026, pasi nuk i kanë dhënë para, ka thyer një pjesë të mobilieve dhe ka tentuar të sulmojë me mjet të mprehtë babanë e tij 61-vjeçar. 32-vjeçari është ndaluar në stacionin policor dhe pas dokumentimit të rastit do të vijojë parashtresa përkatëse.

…….Dje në orën 12:00, në SPB Tetovë, nga EVN Maqedoni është denoncuar se në një shtyllë ku kanë qenë të vendosur me matës elektrik në pronësi të një banori, e përdorur nga një 52-vjeçar nga fshati Reçicë e Vogël, është konstatuar lidhje ilegale, gjegjësisht ura lidhëse para matësit me kabllo bakri, dhe energjia elektrike e marrë ilegalisht është përdorur për furnizimin e një objekti hotelerie dhe një kati të shtëpisë. Personat e autorizuar nga EVN kanë larguar lidhjen ilegale, ndërsa ekipi i këqyrjes nga SPB Tetovë, në bashkëpunim me ekip nga EVN Maqedoni, ka kryer këqyrjen e vendit të ngjarjes dhe pas dokumentimit të plotë të rastit do të vijojë parashtresa përkatëse.

……Dje në orën 16:15, në DPB Gostivar, një 52-vjeçar nga Gostivari ka denoncuar se rreth orës 13:00 në vendin e saj të punës në një objekt hotelerie është sulmuar fizikisht nga dy persona të gjinisë femërore, të cilat kanë drejtuar kërcënime ndaj punonjësve të tjerë dhe kanë thyer një pjesë të inventarit. Po merren masa për zbardhjen e rastit.

……Dje në orën 17:15, në DPB Gostivar është denoncuar se ka shpërthyer zjarr në një banesë në rrugën “18 Nëntori” në Gostivar, pronë e një 36-vjeçari. Ekipi i Njësisë Territoriale Kundër Zjarrit Gostivar e ka fikur zjarrin, ndërsa për shkak të thithjes së tymit, për kontroll në Qendrën Urgjente Gostivar janë paraqitur një qytetar nga Gostivari dhe dy zyrtarë policorë nga DPB Gostivar, të cilët kanë ndihmuar gjatë ndërhyrjes. Këqyrjen e vendit të ngjarjes e ka kryer ekipi nga DPB Gostivar.

Advertisement

……Dje në orën 22:00, zyrtarët policorë nga SPB Tetovë kanë privuar nga liria një 35-vjeçar nga rrethina e Tetovës. Paraprakisht, ish-bashkëshortja e tij 31-vjeçare ka denoncuar se përkundër Vendimit të Gjykatës Themelore Tetovë me të cilin i është caktuar masa e përkohshme mbrojtëse nga dhuna në familje dhe ndalimi i shqetësimit, ai në disa raste e ka kërcënuar përmes telefonit, ndërsa më 04.08. dhe 05.08.2026 e ka shqetësuar në vendin e saj të punës. Ai është ndaluar në stacionin policor për procedurë të mëtejshme dhe ndaj tij do të vijojë parashtresa përkatëse.

……Dje në orën 18:35, në rrugën rajonale Tetovë – fshati Bërvenicë, zyrtarët policorë nga SPB Tetovë kanë privuar nga liria një 32-vjeçar nga fshati Reçicë e Vogël. Ai është kapur duke drejtuar një moped “Hamachi” pa targa regjistrimi dhe pa leje drejtimi, gjegjësishtë pa patentë shoferi. Mopedi i është konfiskuar, ndërsa pas dokumentimit të plotë të rastit do të vijojë parashtresa përkatëse.

……Dje në orën 20:50, në rrugën “Bllagoja Toska” në Tetovë, zyrtarët policorë nga SPB Tetovë kanë privuar nga liria një 35-vjeçar nga Tetova, i cili drejtonte një moped me targa regjistrimi të Tetovës pa leje drejtimi. Mopedi është konfiskuar, ndërsa pas dokumentimit të plotë të rastit do të vijojë parashtresa përkatëse.

…….Dje në SPB Tetovë, një grua 42-vjeçare nga Tetova ka denoncuar se rreth orës 15:20 është sulmuar fizikisht nga nusja e vllaut të saj. Po merren masa për zbardhjen e rastit.

…….Dje në orën 20:10, në SPB Tetovë, një 37-vjeçar nga Tetova ka denoncuar se rreth orës 17:45 në rrugën “Jordan Zllatanovski”, djali i tij 13-vjeçar është sulmuar fizikisht nga disa të mitur. Po merren masa për zbardhjen e rastit.

Advertisement

……Më 06.08.2026 në orën 01:30, në rrugën “107” në Tetovë, zyrtarët policorë nga SPB Tetovë kanë privuar nga liria personin S.J. (20) nga Tetova, pasi gjatë kontrollit tek ai është gjetur dhe konfiskuar marihuanë. Ai është ndaluar në stacionin policor dhe pas dokumentimit të rastit, ndaj tij do të vijojë parashtresa përkatëse.

…….Pas mesnate  në orën 01:35, në rrugën rajonale Gostivar – fshati Çegran, në fshatin Çajlë, zyrtarët policorë nga DPB Gostivar kanë privuar nga liria një 19-vjeçar nga fshati Forinë, rrethina e Gostivarit. Paraprakisht, ai me moped me targa regjistrimi të Gostivarit ka qenë i përfshirë në një aksident komunikacioni, ndërsa gjatë kryerjes së këqyrjes është konstatuar se e ka drejtuar mopedin pa leje drejtimi. Pas dokumentimit të plotë të rastit do të vijojë parashtresa përkatëse.

…….Dje në orën 22:15, në rrugën “Zhivko Brajkovski” në Gostivar, zyrtarët policorë kanë arrestuar një 18-vjeçar nga fshati Bogovinë dhe një 18-vjeçar tjetër nga Gostivari, sepse kanë prishur rendin dhe qetësinë publike me një përleshje fizike mes tyre. Pas dokumentimit të plotë të rastit, ndaj të dyve do të ngrihen parashtresat përkatëse.