Lajme nga vendi
DAP për protestat kundër tatimeve: Qëndrimi jashtë vendit 183 ditë nuk është i mjaftueshëm për statusin e jorezidentit
Drejtoria për të Ardhura Publike (DAP) ka sqaruar për Portalb.mk disa nga dilemat e ngritura nga qytetarët të cilët tani e disa javë po protestojnë kundër tatimeve që DAP u kërkon të paguajnë për periudhën sa kanë punuar jashtë vendit. Qytetarët kanë paralajmëruar se do vazhdojnë me protesta.
Drejtoria e të Ardhurave Publike thotë se nuk se po vendosen detyrime të reja tatimore me efekt retroaktiv.
“Bëhet fjalë për zbatimin e dispozitave ekzistuese ligjore nga Ligji për Tatimin mbi të Ardhurat Personale, të cilat kanë qenë në fuqi edhe në periudhën kur qytetarët i kanë realizuar të ardhurat nga jashtë vendit. Detyrimi tatimor për rezidentët e Republikës së Maqedonisë së Veriut për të deklaruar dhe tatimuar të ardhurat nga jashtë vendit ekziston në vazhdimësi, ndërsa procedurat aktuale paraqesin konstatim dhe arkëtim të detyrimit tashmë ekzistues, e jo interpretim apo praktikë të re”, thanë nga DAP.
Nga aty sqaruan se nëse tatimi është paguar jashtë vendit, obliguesi mund të shfrytëzojë të ashtuquajturin kredit tatimor në Maqedoni, përkatësisht t’i njihet tatimi i paguar jashtë vendit dhe t’i zvogëlohet tatimi i llogaritur në Maqedoni, më së shumti deri në shumën e tatimit që do të rezultonte me zbatimin e normës ligjore prej 10%.
“Rrjedhimisht, nëse tatimi i paguar jashtë vendit është më i ulët se tatimi i llogaritur sipas normës ligjore prej 10%, obliguesi do të ketë detyrim të paguajë diferencën deri në nivelin e normës 10%. Nëse obliguesi nuk mund të dëshmojë, me prova përkatëse relevante (si vërtetim/certifikatë nga organi kompetent tatimor i huaj, apo vërtetim nga punëdhënësi), se tatimi është paguar jashtë vendit, ai do të ketë detyrim ta paguajë tatimin që i takon në Maqedoni”, thanë nga DAP
Nga aty thonë se veprojnë ekskluzivisht në përputhje me ligjet në fuqi dhe nuk ka mundësi ligjore për anulimin në mënyrë të përgjithshme të detyrimeve tatimore të përcaktuara me ligj.
“Pas aktvendimeve paraprake, çdo obligues tatimor mund të paraqesë dëshmi për tatimin e paguar jashtë vendit, me qëllim që të vlerësohet mundësia e shfrytëzimit të kreditit tatimor. Çdo rast shqyrtohet individualisht dhe aktvendimi përfundimtar tatimor për secilin obligues do të merret në bazë të dokumentacionit të dorëzuar dhe gjendjes faktike të konstatuar”, thanë nga DAP.
Lidhur me mosnjohjen e statusit të jorezidentit për qytetarët që kanë qëndruar dhe punuar jashtë shtetit më shumë se 183 ditë, siç parashihet me Ligjin për Tatimin mbi të Ardhurat Personale, DAP thotë se ky nuk është kriteri i vetëm.
“Gjatë përcaktimit të rezidencës tatimore, DAP merr parasysh edhe kriteret e tjera ligjore, si vendbanimi i përhershëm, qendra e interesave jetësore dhe ekonomike, si dhe lidhjet familjare dhe pronësore. Për këtë arsye, mungesa fizike nga shteti, në vetvete, nuk është e mjaftueshme për fitimin automatik të statusit të jorezidentit”, thanë nga DAP.
Qytetarët të cilët kanë punuar jashtë vendit, kryesisht në Irak dhe Afganistan javëve të fundit kanë protestuar duke kundërshtuar tatimet që DAP u kërkon t’i paguajnë.
Ata thonë se shumë prej tyre kanë qëndruar jashtë vendit mbi 183 ditë dhe siç thonë sipas ligjit për tatimin personal duhet të trajtohen si jorezidentë tatimorë, por ky status nuk na njihet nga DAP. Ata madje thonë se DAP u kërkon dëshmi të cilat ata tani nuk mund t’i sigurojnë nga vendet ku kanë punuar. Qytetarët kanë paralajmëruar se do të vazhdojnë me protesta derisa të dëgjohet zëri i tyre.
Më 13 dhjetor 2025, qytetarët u befasuan nga vendimi i Drejtorisë së të Ardhurave Publike për mbledhjen e taksës mbi të ardhurat e padeklaruara nga jashtë Maqedonisë.
Disa prej tyre thanë se nuk janë të informuar mjaftueshëm për detyrimin e deklarimit të rregullt të këtyre të ardhura, ndërsa të tjerë kishin theksuar se njoftimet nga DAP-i u kishin ardhur me vonesë, për të ardhura të realizuara vite më parë.
Pas kësaj, qytetarët të cilët kanë punuar jashtë kanë mbajtur disa protesta, kryesisht në Tetovë dhe Kumanovë.
Lajme nga vendi
Zjarri dhe tymi që ngulfati Shkupin, akuza për magazinim të paligjshëm të mbetjeve toksike në Vizbegovë
Tre pronarë dhe menaxherë kompanish do të përgjigjen për ndotje serioze në Vizbegovë të Shkupit, pasi prokuroria ngriti akuza për magazinim të paligjshëm të mbetjeve të rrezikshme që çoi në një zjarr të madh dhe ndotje masive të ajrit.
Sipas aktakuzës, nga fundi i shkurtit deri në fillim të korrikut të vitit të kaluar, të pandehurit ruajtën dhe menaxhuan mbetje të rrezikshme në një parcelë toke në Vizbegovë pa leje. Këto janë materiale me veti shpërthyese, të ndezshme dhe toksike, si dhe substanca që mund të jenë kancerogjene dhe të dëmshme për mjedisin.
Më 9 korrik 2025, në vend shpërtheu një zjarr, i cili, për shkak të shkallës dhe rrezikut të tij, nuk mund të vihej menjëherë nën kontroll. Një pjesë e mbetjeve u dogj, duke lëshuar tym të zi të trashë në ajër. Matjet nga shërbimet kompetente konfirmuan ndotje të konsiderueshme.
Prokuroria deklaron se veprime të tilla krijuan një rrezik serioz për shëndetin e qytetarëve dhe mjedisin.
Përgjegjësia i takon menaxherit dhe pronarit të kompanisë, i cili, së bashku me një person tjetër, mori pjesë aktive në operacionin e paligjshëm. Janë ngritur akuza edhe kundër një pronari tjetër të kompanisë dhe të truallit, i cili, sipas prokurorisë, duhet të kishte qenë në dijeni të rreziqeve që paraqiste ruajtja e mbetjeve të tilla.
Të pandehurit akuzohen për krimin e rrezikimit të mjedisit dhe natyrës me mbetje.
Për nder të Pavarësisë së Kosovës, mbrëmë në Shkup, në skenën e Operës dhe Baletit Kombëtar, u dha premierë opera “Goca e Kaçanikut” opera e parë kosovare e kompozitorit të njohur Rauf Dhomi, duke u shndërruar në një ngjarje të madhe kulturore dhe thellësisht emocionale.
“Goca e Kaçanikut” u prit me interes të madh nga publiku, duke dëshmuar se arti mbetet një nga mënyrat më të forta për ta ruajtur dhe për ta përcjellë historinë tonë.
Kjo premierë në Shkup ishte edhe një dëshmi e lidhjes së gjallë kulturore mes shqiptarëve si dhe një urë e rëndësishme bashkëpunimi ndërmjet institucioneve artistike.
Salla u mbush me emocion, ndërsa publiku ndoqi një vepër që nuk ishte thjesht art, por një rrëfim i gjallë për historinë, qëndresën dhe identitetin kombëtar.
“Goca e Kaçanikut” solli në skenë frymën e Kaçanikut dhe jetën e shqiptarëve ndër breza, duke e kthyer muzikën në kujtesë kolektive dhe skenën në një dëshmi të gjallë të asaj që jemi dhe çfarë kemi kaluar.
Agjencia e lajmeve INA mëson se mbrëmë në Qeveri ka pasur takim të përfaqësuesve të studentëve të peticionit për provimin e jurisprudencës në gjuhën shqipe me Kryeministrin Mickoski dhe Zëvendës-Kryeministrin Sali ku mes tjerash është rënë dakord që të formohet një grup pune i ekspertëve të së drejtës kushtetuese për hartimin e zgjidhjes juridike të kësaj çështjeje.
INA ekskluzivisht i mëson dy emrat e profesorëve që do të jenë pjesë e këtij grupi të punës: Jeton Shasivari profesor i së drejtës kushtetuese në UEJL dhe Denis Preshova profesor i së drejtës kushtetuese në UKIM.
Përndryshe profesor Shasivari njihet në opinion si “thyes i barrierave gjuhësore” sepse siç kemi raportuar më herët, në shtator të vitit të kaluar e “theu akullin” para Gjykatës Kushtetuese duke folur për herë të parë në histori plotësisht në gjuhën shqipe duke treguar se shqipja e ka vendin e merituar para gardianit të kushtetutës.
Kujtojmë se më parë, politikani si Talat Xhaferi kishte filluar fjalimin shqip në këtë institucion, por për mungesë të përkthimit kishte vazhduar në maqedonisht.
Zjarri dhe tymi që ngulfati Shkupin, akuza për magazinim të paligjshëm të mbetjeve toksike në Vizbegovë
“GOCA E KAÇANIKUT”: SHKUPI SKENË E KULTURËS SHQIPTARE!
Ekskluzive: Qeveria formon grup pune për provimin e jurispudencës në gjuhën shqipe
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
