Sot mbushen dhjetë vjet nga një prej tragjedive natyrore më të mëdha në historinë e re të Maqedonisë. Më 6 gusht 2016, një mot i fuqishëm i shoqëruar me shi të rrëmbyeshëm, vetëtima dhe erë të fortë goditi fillimisht rajonin e Pollogut, e më pas edhe rajonin e Shkupit, duke lënë pas vetes shkatërrim dhe 22 viktima.

Në Shkup, brenda vetëm 24 orëve ranë 93 litra shi për metër katror, ndërsa në dy orët e para u regjistruan mbi 800 vetëtima. Më të goditura ishin pjesët verilindore të kryeqytetit – Stajkovci, Singeliq, Smilkovci, Çreshevo dhe Haraçinë, ku ujërat e vërshimeve shkaktuan dëme të mëdha materiale dhe morën jetë njerëzish. Mes viktimave ishte edhe një fëmijë dyvjeçar.

Pasojat e katastrofës ishin të mëdha. Në klinikat e Shkupit u trajtuan 22 persona të lënduar, mbi 1.000 banorë u evakuuan, ndërsa shumë familje mbetën pa shtëpitë e tyre. Përmbytjet shkaktuan dëmtime serioze në infrastrukturën rrugore dhe komunale, si dhe në një numër të madh pronash private.

Në ditët pas tragjedisë, qytetarët u organizuan përmes rrjeteve sociale dhe hapën pika për mbledhjen dhe shpërndarjen e ndihmës humanitare për familjet e goditura. Qeveria shpalli gjendje krize në rajonin e Shkupit dhe Tetovës për 15 ditë, ndërsa 8 gushti u shpall Ditë Zie.

Edhe dhjetë vjet më vonë, 6 gushti mbetet i ngulitur në kujtesën kolektive si dita kur moti i fuqishëm, brenda pak orësh, ndryshoi jetën e mijëra qytetarëve dhe la gjurmë të thellë në historinë e Shkupit dhe Maqedonisë. përcjell Zhurnal.mk .

Advertisement

SPB Tetovë njofton se ka shpërthyer zjarr në një banesë në Gostivar, ndërsa tre persona, mes tyre dy policë, përfundojnë në urgjencë.

“Më 05.08.2026 në orën 17:15, në DPB Gostivar është denoncuar se ka shpërthyer zjarr në një banesë në rrugën “18 Nëntori” në Gostivar, pronë e G.S. (36).

Ekipi i Njësisë Territoriale Kundër Zjarrit Gostivar e ka fikur zjarrin, ndërsa për shkak të thithjes së tymit, për kontroll në Qendrën Urgjente Gostivar janë paraqitur H.Xh. nga Gostivari dhe dy zyrtarë policorë nga DPB Gostivar, të cilët kanë ndihmuar gjatë ndërhyrjes.

Kontroll në vendin e ngjarjes e ka kryer ekipi nga DPB Gostivar”, thuhet në njoftimin e SPB Tetovë.

Ministria e Arsimit dhe Shkencës ka bërë publike rezultatet përfundimtare të afatit të qershorit të maturës, dy muaj pas zhvillimit të provimit të parë ekstern dhe pas përfundimit të shqyrtimit të ankesave.

Nga të tri format e maturës është regjistruar një mesatare e përgjithshme prej 3.66. Në maturën shtetërore rezultati mesatar ishte 3.62, në maturën shtetërore profesionale arriti në 3.91, kurse në maturën shtetërore artistike ishte 3.59.

Ministrja e Arsimit dhe Shkencës, Vesna Janevska, u shpreh e kënaqur me rezultatet. Ajo vuri në dukje se mesatarja është thuajse e njëjtë me atë të vitit të kaluar, e cila ishte 3.69, ndërsa është më e lartë se në vitin 2024, kur u shënua mesatarja 3.26.

“Vlerësoj se këto janë rezultate objektive për shkak të përgatitjes së të gjithë të përfshirëve në organizimin e maturës”, deklaroi Janevska.

Për provimet eksterne të afatit të qershorit u regjistruan 14.587 nxënës që e kanë përfunduar arsimin e mesëm gjatë vitit shkollor 2025/2026. Maturën shtetërore e kanë dhënë 12.184 prej tyre, maturën shtetërore profesionale 2.276, ndërsa maturën shtetërore artistike 127 nxënës.

Advertisement

Nga të regjistruarit, 348 nxënës nuk u paraqitën në provime. Kjo shifër përbën 2,39 për qind të numrit të përgjithshëm.

Për herë të parë këtë vit, maturantët iu nënshtruan tri llojeve të provimeve: maturës shtetërore, maturës shtetërore profesionale dhe maturës shtetërore artistike.

Gjuha angleze ishte provimi më i përzgjedhur, me 13.208 nxënës të paraqitur. Sipas llojit të maturës, kandidatët mund të zgjidhnin gjithashtu matematikën, gjuhën frënge, gjermane, ruse ose italiane, ndërsa historia ofrohej si zgjedhje në maturën artistike.